ନୟାଗଡ଼,(ବାଘୁଆବାର୍ତ୍ତା): ଖୋର୍ଦ୍ଧା ବଲାଙ୍ଗିରି ୫୭ ନମ୍ବର ଜାତୀୟ ରାଜପଥ ଦଶପଲ୍ଲା ଠାରୁ ୩୦ କିଲୋମିଟର ବାଣିଗିରି ଘାଟିରେ ପାହାଡ଼ ଧସିବାରୁ ଜାତୀୟ ରାଜପଥରୁ ପିଚୁ ଉଠି ଯାଇଥିବା ଦେଖା ଯାଇଛି । ଗତକାଲି ବିଳମ୍ବିତ ରାତିରେ ଏହି ଅଘଟଣ ଘଟିଥିବା ବେଳେ ଏଥିରୁ ଅଳ୍ପକେ କିଛି ଟ୍ରକ ଦୁର୍ଘଟଣାରୁ ବର୍ତ୍ତୀ ଯାଇଥିବା ସୂଚନା ମିଳିଛି । ରାସ୍ତା ଉପରେ ପଥର, ମାଟି ଏବଂ ଗଛ ଗଦା ହୋଇଯିବାରୁ ରାସ୍ତାର ଉଭୟ ପାଶ୍ୱର୍ରେ ରାସ୍ତା ମଧ୍ୟ ସଂକୀଣ୍ଣ ହୋଇ ପଡ଼ଥିବା ଦେଖା ଯାଇଛି । ସୂଚନାନୁସାରେ, ଜାତୀୟ ରାଜପଥ ବିଭାଗ ପାହାଡ଼ କାଟି ୨୦୧୮ ମସିହା ସେପ୍ଟମ୍ବର ମାସରେ ରାସ୍ତା ପ୍ରଶସ୍ତି କରଣ କାମ କରିଥିଲା । ଠିକା ସଂସ୍ଥା ପାହାଡ଼କୁ ଠିକରେ କାଟି ନଥିବା କାରଣରୁ ୨୦୧୮ ସେପ୍ଟମ୍ବରରେ ମଧ୍ୟ ବଡ଼ ଧରଣର ଅତଡ଼ା ଖସିଥିଲା । ଯାହାକୁ ନେଇ ଜାତୀୟ ରାଜପଥ ବିଭାଗ ପକ୍ଷରୁ ପାହାଡ଼କୁ ଲଗାଇ ଢଳେଇ ପ୍ରାଚୀର ନିର୍ମାଣ କରା ଯାଇଥିବା ବେଳେ ଏହା ଆବଶ୍ୟକ ଉଚ୍ଚତାଠାରୁ କମ ରହିଥିବା ଜଣାଯାଇଛି । କିଛିଦିନ ହେବ ଲଗାଣ ବର୍ଷାରେ ମାଟି ଭିଜି ରହିଥିବା ବେଳେ ଗତକାଲି ଦଶପଲ୍ଲା ଅଂଚଳରେ ଭୀଷଣ ବର୍ଷା ଯୋଗୁଁ ଏହା ଧସି ପଡ଼ିଥିବା ଜଣାପଡ଼ିଛି । ମାତ୍ର ବିଭାଗ ପକ୍ଷରୁ ରାସ୍ତା ଉପରୁ ଆଜି ମାଟି ପଥର ଉଠା ଯାଇନଥିବା ବେଳେ ରାସ୍ତା ସଂକୀର୍ଣ୍ଣ ହେବା ଦ୍ୱାରା ଯାନବାହାନ ଯାତଆତରେ ଅସୁବିଧା ସୃଷ୍ଟି ହୋଇଛି ।
