ନୟାଗଡ଼, (ବାଘୁଆବାର୍ତ୍ତା) : କରୋନା ମହାମାରୀ ପାଇଁ ସାରା ରାଜ୍ୟରେ ଶିକ୍ଷାନୁଷ୍ଠାନ ଗୁଡ଼ିକ ବନ୍ଦ ରହିଥିବା ବେଳେ ରାଜ୍ୟ ସରକାରଙ୍କ ନିର୍ଦ୍ଦେଶରେ ଏବେ ଅନ୍ଲାଇନ୍ ଶିକ୍ଷାଦାନ ଚାଲିଛି । ଏହି ଅବସରରେ ନୟାଗଡ଼ ସ୍ୱୟଂ ଶାସିତ ମହାବିଦ୍ୟାଳୟରେ ଅନ୍ଲାଇନ୍ ମାଧ୍ୟମରେ ଶିକ୍ଷା ଦାନ ହେବା ସହ ଅନ୍ଲାଇନ୍ ଉପସ୍ଥାନ ଗ୍ରହଣ କରାଯାଉଛି । +୩ ତୃତୀୟ ସେମିଷ୍ଟାର ଓ ପଞ୍ଚମ ସେମିଷ୍ଟାର ଛାତ୍ରଛାତ୍ରୀମାନଙ୍କୁ ଅନ୍ଲାଇନ୍ ଶିକ୍ଷାଦାନ ଅନୁଷ୍ଠିତ ହେଉଥିବା ବେଳେ ଅନେକ ଅଧ୍ୟାପକ ଓ ଅଧ୍ୟାପିକା ହ୍ୱାଟସ୍ଆପ୍ ଗ୍ରୁପ ଗଠନ କରି ଶିକ୍ଷାଦାନ କରୁଛନ୍ତି । ଏଥିସହିତ ଏହି ଗ୍ରୁପରେ ଉପସ୍ଥାନ ମଧ୍ୟ ଗ୍ରହଣ କରାଯାଉଥିବା ଜଣାଯାଇଛି । ଅନ୍ୟପକ୍ଷେ, ମହାବିଦ୍ୟାଳୟ ତରଫରୁ ଛାତ୍ରଛାତ୍ରୀଙ୍କୁ ପାଠ୍ୟ ଉପକରଣ ହ୍ୱାଟସ୍ଆପ୍ ଗ୍ରୁପ ମାଧ୍ୟମରେ ପଠାଯାଉଛି । ଛାତ୍ରଛାତ୍ରୀମାନେ ଅନ୍ଲାଇନ୍ ପାଠ ପଢ଼ାରେ ଅନୁପସ୍ଥିତ ରହିଲେ, ଆଗାମୀ ଦିନରେ ଏହା ସେମାନଙ୍କ ପାଇଁ କ୍ଷତିକାରକ ହେବ ବୋଲି ମହାବିଦ୍ୟାଳୟ ତରଫରୁ କୁହାଯାଇଛି ।
