ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଚିନିକଳ ପୁନଃ କାର୍ଯ୍ୟକ୍ଷମ ନେଇ ଚିନିକଳ କ୍ରିୟାନୁଷ୍ଠାନ କମିଟି ପକ୍ଷରୁ ପୂର୍ତ୍ତ ବିଭାଗ ଡାକବଙ୍ଗଳାଠାରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏଥିରେ ବିଶ୍ୱନାଥ ମହାପାତ୍ର, ପ୍ରଶାସନ ମନୋଜ ସାହୁ, ସନ୍ତୋଷ ପ୍ରଧାନ, ଯୋଗେନ୍ଦ୍ର ଖୁଣ୍ଟିଆ, ଗୋଲଖ ମୁଦୁଲି ପ୍ରମୂଖ ଯୋଗ ଦେଇଥିଲେ । କମିଟର ଅଭିଯୋଗ କ୍ରମେ ୨୦୦୪ରୁ ତ୍ରୈଲୋକ୍ୟ ମିଶ୍ର ୨୦୧୫ ପର୍ଯ୍ୟନ୍ତ ଚିନିକଳ ଚାଲୁ ରଖିଥିଲେ । ଏହା ମଧ୍ୟରେ କୃଷକଙ୍କ ଟଙ୍କା ଏବଂ କର୍ମଚାରୀଙ୍କ ଟଙ୍କା ବାକି ରଖି ଚିନିକଳରେ ଅଘୋଷିତ ତାଲା ପକାଇ ଦେଲେ । ଏହା ପରଠାରୁ ଚିନିକଳ ଚାଲୁ କରିବା ପାଇଁ କ୍ରିୟାନୁଷ୍ଠାନ କମିଟି ପକ୍ଷରୁ ଦଳଗତ ନିର୍ବିଶେଷରେ ସମସ୍ତଙ୍କୁ ସାମିଲ କରି ଚନିକଳ ଚାଲୁ କରିବା ପାଇଁ ପ୍ରୟାସ ଚାଲିଛି । ଗତକିଛି ଦିନ ଧରି ଆମେ ଯେପରି ଅନୁଭବ କରୁଛୁ ପ୍ରକୃତରେ କାହାର ଆନ୍ତରିକତା ନାହିଁ । ନୟାଗଡ଼ ଜିଲ୍ଲାବାସୀଙ୍କର ତଥା ଚାଷୀମାନଙ୍କର ଆର୍ଥିକ ମେରୁଦଣ୍ଡକୁ ଆଧାର କରି ଦଳଗତ ନିର୍ବିଶେଷରେ ଆନ୍ଦୋଳନ ଦ୍ୱାରା ଚାପ ସୃଷ୍ଟି କରି ଆସନ୍ତା ୩୦ ତାରିଖରୁ ପଦଯାତ୍ରା ଆରମ୍ଭ ହେବ । ପାଣିପୋଇଲାସ୍ଥିତ ଚିନିକଳଠାରୁ ନବୀନ ନିବାସ ପର୍ଯ୍ୟନ୍ତ ଏହି ପଦଯାତ୍ରା କରାଯାଇ ମୁଖ୍ୟମନ୍ତ୍ରୀଙ୍କୁ ଚାଷୀଙ୍କ ଦୁଃଖ ଓ ସମସ୍ୟା ଅବଗତ କରାଯିବ । ଗତ ନିର୍ବାଚନରେ ବିଜେଡି ପକ୍ଷରୁ ନ୍ୟାୟିକ ପ୍ରକିୟା ଶେଷ ହେବାର ସାତଦିନ ମଧ୍ୟରେ ଚିନିକଳ ଚାଲୁ ପାଇଁ ପ୍ରତିଶୃତି ଦିଆଯାଇଥିବା ବେଳେ ବିଜେପି ପକ୍ଷରୁ ସରକାର ଆସିଲେ ପନ୍ଦରଦିନ ମଧ୍ୟରେ ଚିନିକଳ ଚାଲୁ କରିବା ପାଇଁ ପ୍ରତିଶୃତି ଦିଆଯାଇଥିଲା । ଆଜିର ଦିନରେ ଚିନିକଳକୁ ନେଇ ବ୍ୟାଙ୍କ, ପରିଚାଳନା କମ୍ପାନୀ, ସରକାରଙ୍କ ମଧ୍ୟରେ ଅନେକ କେସ କୋର୍ଟରେ ରହିଛି । ଏତଦ୍ ବ୍ୟତିତ ଶ୍ରମ ଆଇନକୁ ନେଇ ମଧ୍ୟ କୋର୍ଟରେ ମାମଲା ରହିଥିବା ଜଣାପଡ଼ିଛି । ଏପରିସ୍ଥଳେ ଚିନିକଳର ଭାଗ୍ୟ ଆଗକୁ କଣ ହେବ ତାକୁ ପ୍ରଶ୍ନବାଚୀ ସୃଷ୍ଟି ହୋଇଛି ।
