ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ବ୍ଲକ୍ ଅନ୍ତର୍ଗତ ଇଟାମାଟି ଗ୍ରାମପଞ୍ଚାୟତର ପାନାଦେବୀ ବିଦ୍ୟାଳୟଠାରେ ଜିଲ୍ଲାର ଅଗ୍ରଣି ସ୍ୱେଚ୍ଛାସେବୀ ଅନୁଷ୍ଠାନ ମୈତ୍ରୀ ଯୁବସଂସଦ ନୟାଗଡ଼ ଆଜାଦ ୍ହିନ୍ଦ ଯୁବ ସଂସଦ ମାଙ୍କପଲ୍ଲୀ ଓ ଆଞ୍ଚଳିକ ମହିଳା ଉନ୍ନୟନ କମିଟି ଉଟାମାଟିଙ୍କ ମିଳିତ ସହଯୋଗରେ ଫାନ୍ସା ଇଣ୍ଡିଆ ଓ ଭାରତୀୟ ଯୁବବିକାଶ ସଂସ୍ଥା ସହାୟତାରେ ଏକ ସଚେତନତା ସଭା ମୈତ୍ରୀ ଯୁବ ସଂସଦର ସମ୍ପାଦକ ପ୍ରଦୀପ କୁମାର ସାହୁଙ୍କ ନେତୃତ୍ୱରେ ସାମାଜିକ ଦୂରତ୍ୱ ରକ୍ଷାକରି ଅନୁଷ୍ଠିତ ହୋଇଯାଇଛି । ଉକ୍ତ ସଭାରେ ମୁଖ୍ୟଅତିଥି ରୂପେ ଅବସରପ୍ରାପ୍ତ ଅଧ୍ୟାପକ ରଙ୍ଗନାଥ ବେହେରା ଯୋଗଦେଇ କରୋନା ମହାମାରିରୁ ରକ୍ଷାପାଇବା ପାଇଁ ଆମେ ସରକାରଙ୍କ କୋଭିଡ୍-୧୯ ନିୟମ ମାନି ଚଳିବା ପାଇଁ ପରାମର୍ଶ ଦେଇଥିଲେ । ଆରୋଗ୍ୟସେତୁ ଆପ୍ ଭଳି ବୈଷୟିକ ଜ୍ଞାନର ବ୍ୟବହାର ଉପରେ ପ୍ରାଧାନ୍ୟ ଦେଇଥିଲେ । ଏହି ରୋଗର ଉତ୍ପତି କେଉଁଠାରୁ ଆରମ୍ଭ ହୋଇଥିଲା ଏବଂ ଆମ୍ଭେମାନେ ଏହି ରୋଗରୁ ରକ୍ଷା ପାଇବା ପାଇଁ କ\’ଣ କରିବା ଉଚିତ୍ ଏବଂ କଣ ନକରିବା ତାହା ଉପରେ ନିଜର ସୁଚିନ୍ତିତ ମତାମତ ରଖିଥିଲେ । ଅନ୍ୟତମ ଅତିଥି ରୂପେ ଅବସରପ୍ରାପ୍ତ ଶିକ୍ଷକ ତଥା ପରିବେଶବିତ୍ ଅନାଦି ଚରଣ ମହାନ୍ତି ବକ୍ତବ୍ୟ ଛଳରେ ଏହି ରୋଗକୁ ନଡରି ଏହାର ମୁକାବିଲା କରିବା ପାଇଁ ପରାମର୍ଶ ଦେଇଥିଲେ । ଅନ୍ୟତମ ଅତିଥିରୂପେ ଆଜାଦ୍ହିନ୍ଦ ଯୁବ ସଂସଦର ସମ୍ପାଦକ ପ୍ରଫୁଲ୍ଲ କୁମାର ବେହେରା, ଆଞ୍ଚଳିକ ମହିଳା ଉନ୍ନୟନ କମିଟିର ସଂଗଠିକା ଅମିତା ପ୍ରଧାନ ପ୍ରମୁଖ ଯୋଗଦେଇ ହାତଧୋଇବା, ମାସ୍କ ପିନ୍ଧିବା, ଜରୁରୀ କାମ ନଥିଲେ ବାହାରକୁ ନଯିବା ଉପରେ ଗୁରୁତ୍ୱ ଦେଇଥିଲେ । ଶେଷରେ ମୈତ୍ରୀ ଯୁବ ସଂସଦର କର୍ମୀ ସବିତାମୟୀ ଦାସ ଧନ୍ୟବାଦ ଅର୍ପଣ କରିଥିଲେ ।
କରୋନା ଓ ସ୍ୱଚ୍ଛତା ସମ୍ପର୍କିତ ସଚେତନତା ସଭା
