ମୃତ୍ୟୁ ପରେ ଆସିଲା ପଜିଟିଭ୍, ମାନପୁରରେ ସରିଥିଲା ଶବ ସତ୍କାର
ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା କରୋନା ମହାମାରୀ କବଳରେ ଦିନକୁ ଦିନ ବୁଡ଼ି ଚାଲିଥିବା ବେଳେ ଗତକାଲି ଏକ ଅଭାବନୀୟ ଘଟଣା ଘଟିଥିବା ଜଣାଯାଇଛି । ନୟାଗଡ଼ ଜିଲ୍ଲା ଶରଣକୁଳ ଥାନା ଅନ୍ତର୍ଗତ ପଂଚରିଡ଼ା ମାନପୁର ଗ୍ରାମରେ ଏହି ଅଭାନୀୟ ଘଟଣା ଘଟିଥିବା ଜଣାଯାଇଛି । ଉକ୍ତ ଗ୍ରାମର ଜଣେ ଯୁବକଙ୍କୁ କିଛି ଦିନ ହେବ ଜ୍ୱର ହେଉଥିଲା । ତାଙ୍କର ପରିଶ୍ରା ସଂକ୍ରମଣ ହୋଇ ଜ୍ୱର ହେଉଥିବା ନେଇ ସେ ନୟାଗଡ଼ର ଜଣେ ଘରୋଇ ଡାକ୍ତରଙ୍କ ପାଖକୁ ଆସି ଚିକିତ୍ସିତ ହୋଇଥିଲେ । ମାତ୍ର ତାଙ୍କର ସ୍ୱାସ୍ଥ୍ୟବସ୍ଥା ବିଗିଡ଼ି ଯିବାରୁ ତାଙ୍କୁ ପରିବାର ଲୋକେ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତୀ କରିଥିଲେ । ଗତକାଲି ଚିକିତ୍ସାଧିନ ଅବସ୍ଥାରେ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ତାଙ୍କର ମୃତ୍ୟୁ ଘଟିଥିବା ବେଳେ ତାଙ୍କର ପୂର୍ବରୁ ଦେଇଥିବା ସ୍ୱାବ ନେଗେଟିଭ୍ ଆସିଥିବା କହି ଡାକ୍ତର ତାଙ୍କ ଶବକୁ ପରିବାର ଲୋକଙ୍କୁ ହସ୍ତାନ୍ତର କରି ଦେଇଥିଲେ । ଫଳରେ ଗ୍ରାମରେ ଶବ ପହଂଚିବା ପରେ ଏକ ଶୋକାକୂଳ ପରିସ୍ଥିତି ସୃଷ୍ଟି ହୋଇଥିଲା । ସେ ଜଣେ ମେଳାପୀ ଯୁବକ ହୋଇଥିବାରୁ ତାଙ୍କ ଶେଷ ଯାତ୍ରାରେ ଶତାଧିକ ଲୋକ ସାମିଲ ହୋଇ ଅପରାହ୍ନରେ ଶବ ସତ୍କାର କରାଯାଇଥିଲା । ମାତ୍ର ଗତକାଲି ରାତିରେ ତାଙ୍କର କରୋନା ପଜିଟିଭ୍ ଆସିଥିବା ନେଇ ଜଣାପଡ଼ିବା ପରେ ଏବେ ମାନପୁର ଗାଁରେ ଭୟର ବାତାବରଣ ସୃଷ୍ଟି ହୋଇଛି । ତାଙ୍କ ସଂସ୍ପର୍ଶରେ ଶତାଧିକ ଲୋକ ଆସିଥିବାରୁ ଏହି ଅଂଚଳକୁ କଣ୍ଟେନ୍ମେଣ୍ଟ କରାଯିବା ସହ ସମସ୍ତଙ୍କ କରୋନା ପରୀକ୍ଷା କରିବାକୁ ଦାବି ହୋଇଛି । ଏଥିସହିତ ଜିଲ୍ଲା ପ୍ରଶାସନ ଏହି ଯୁବକଙ୍କ ମୃତ୍ୟୁକୁ ଯଥାଶୀଘ୍ର କରୋନା ମୃତ୍ୟୁ ଘୋଷଣା କରିବାକୁ ଦାବି ହେଉଛି ।
