ନୟାଗଡ଼,(ବାଘୁଆବାର୍ତ୍ତା): ସାରା ବିଶ୍ୱରେ ମହାମାରୀ କରୋନା ଆତଙ୍କ ଖେଳାଇ ଥିବା ବେଳେ ଏହାର ମୁକାବିଲା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ସକାଳ ୭ ଘଟିକାରୁ ରାତି ୯ ଘଟିକା ଯାଏଁ ଜନତା କର୍ଫ୍ୟୁ ପାଳ ପାଇଁ ଦେଇଥିବା ଡାକରା ନୟାଗଡ଼ରେ ସଫଳ ହୋଇଛି । ଜନତା କର୍ଫ୍ୟୁକୁ ରାଜ୍ୟ ସରକାରଙ୍କ ସମର୍ଥନ ଏବଂ ଜିଲ୍ଲା ପ୍ରଶାସନର ସଚେତନତା ପାଇଁ ଆଜି ନୟାଗଡ଼ ସହର ସମେତ ସମଗ୍ର ଜିଲ୍ଲା ଶୂନଶାନ ହୋଇପଡ଼ିଛି । ନୟାଗଡ଼ ସହରରେ ରାସ୍ତାଘାଟ ଶୂନଶାନ ହୋଇ ପଡ଼ିଥିବା ବେଳେ ଦୋକାନ ବଜାର ସମ୍ପୁର୍ଣ୍ଣ ବନ୍ଦ ରହିଛି । ସେହିଭଳି ସାଧାରଣ ଜନତା ଏହାକୁ ସମର୍ଥନ ଜଣାଇ ଘରୁ ବାହରିନଥିବା ଜଣାଯାଇଛି । କରୋନାର ଭୟାବହତା ଜନସାଧାରଣଙ୍କୁ ଛୁଇଁଛି । ଯେଉଁଥି କାରଣରୁ ଆଜି କୈାଣସି ଲୋକଙ୍କୁ ଘରୁ ନବାହାରିଥିବା ଦେଖିବାକୁ ମିଳିଛି । ଏଥି ସହିତ ସହରେ ଗାଡ଼ି ଚଳାଚଳ ବନ୍ଦ ରହିଥିବା ବେଳେ ଶୂନଶାନ ରାଜରାସ୍ତା ଖାଁ ଖାଁ ହୋଇପଡ଼ିଛି । ସହରରେ କିଛି ପୁଲିସ ଓ ଗଣମାଧ୍ୟମ କର୍ମଚାରୀଙ୍କୁ ଛାଡ଼ି ଦେଲେ ଅନ୍ୟ କୈାଣସି ବ୍ୟକ୍ତିଙ୍କ ଯାଆସ ନଥିବା ଜଣାଯାଇଛି । ସେହିଭଳି ରବିବାର କାରଣରୁ ସମସ୍ତ ସରକାରୀ ଏବଂ ବେସରକାରୀ କାର୍ଯ୍ୟାଳୟ ବନ୍ଦ ରହିବା ଏହି ଶୂନଶାନ ପରିସ୍ଥିତିକୁ ଆହୁରୀ ଗମ୍ଭୀର କରି ଦେଇଛି ।
