ଭାଟସାହି ଚାଷ ଜମିରୁ ରକ୍ତାକ୍ତ ଶବ ଉଦ୍ଧାର, ଦୁଇ ଅଟକ

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ ଆଇନ ଶୃଙ୍ଖଳା ପରିସ୍ଥିତି ଦିନକୁ ଦିନ ବିପର୍ଯ୍ୟସ୍ତ ହୋଇ ପଡ଼ୁଥିବା ବେଳେ ଗତକାଲି ଜଣେ ବ୍ୟକ୍ତିଙ୍କୁ ନିର୍ମମ ହତ୍ୟା କରାଯାଇ ଚାଷ ଜମିରେ ଫିଙ୍ଗି ଦିଆ ଯାଇଥିବା ଅଭିଯୋଗ ହୋଇଛି । ମୃତ ବ୍ୟକ୍ତି ଜଣଙ୍କ ହେଲେ ନୟାଗଡ଼ ଟାଉନଥାନା ଅନ୍ତର୍ଗତ ଭାଟସାହି ଗ୍ରାମର ଅର୍ଜ୍ଜୁନ ପ୍ରଧାନ (୫୫) । ସୂଚନାନୁସାରେ, ଭାଟସାହି ଗ୍ରାମର ଅର୍ଜ୍ଜୁନ ଆଜି ଦିନ ୧୦ଟା ବେଳକୁ କୈାଣସି କାରଣ ପାଇଁ ଘରୁ ବାହାରକୁ ଯାଇଥିଲେ । ସେ କେଉଁ ଆଡ଼େ ଯାଇଥିଲେ, ଏନେଇ ପରିବାରକୁ କୈାଣସି ସୂଚନା ଦେଇନଥିବା ବେଳେ ଘର ଲୋକ ଜମିକୁ ଯାଇ କାମ କରୁଥିବା ଭାବିଥିଲେ । ମାତ୍ର ଅର୍ଜ୍ଜୁନ ଖାଇବା ସମୟରେ ଘରକୁ ନଫେରିବାରୁ ପôତୀ କାଳିକା ପ୍ରଧାନ ତାଙ୍କୁ ଖୋଜିବାକୁ ବିଲକୁ ଯାଇଥିଲେ । ରାସ୍ତା ଉପରେ ଠିଆ ହୋଇ ବିଲକୁ ଦେଖିଥିଲେ ମଧ୍ୟ କୈାଣସି ସନ୍ଧାନ ନପାଇବାରୁ ସେ ଘରକୁ ଫେରି ଆସି ଅପରାହ୍ନ ୪ଟା ବେଳକୁ ଅର୍ଜ୍ଜୁନଙ୍କ ଜଣେ ବନ୍ଧୁଙ୍କୁ ଏ ବିଷୟରେ ପଚାରିଥିଲେ । ସେ ଅର୍ଜ୍ଜୁନଙ୍କୁ ଦେଖିନଥିବା ସୂଚନା ଦେବା ପରେ କାଳିକା ତାଙ୍କର ଦୁଇ ପୁଅଙ୍କୁ ଏନେଇ ଜଣାଇଥିଲେ । ଫଳରେ ଘର କାମରେ ବ୍ୟସ୍ତ ଥିବା ଅର୍ଜ୍ଜୁନଙ୍କ ପୁଅ ହାଡ଼ୁବନ୍ଧୁ ପ୍ରଧାନ, ବୁଲା ପ୍ରଧାନ ଏବଂ ଅନ୍ୟ ଜଣେ ପୁତୁରା ରାଉଳି ପ୍ରଧାନ ସବୁ ଆଡ଼େ ଖୋଜା ଖୋଜି କରି ସଂନ୍ଧ୍ୟା ସମୟରେ ନୟାଗଡ଼ ଭାଟସାହି ରାସ୍ତାରେ କଡ଼ରେ ତଥା ଭାଟସାହି ନାଳ ପାଖରେ ଥିବା ତାଙ୍କ ପଡ଼ୋଶୀ ଜମିରେ ଅର୍ଜ୍ଜୁନଙ୍କ ରକ୍ତାକ୍ତ ମୃତ ଦେହ ପଡ଼ିଥିବା ଦେଖିବାକୁ ପାଇଥିଲେ । ଡାକ୍ତରଖାନା ନେବା ଲକ୍ଷ୍ୟରେ ଅର୍ଜ୍ଜୁନଙ୍କ ପୁଅ ଓ ପୁତୁରାମାନେ ତାଙ୍କୁ ଭାଟସାହି ନୟାଗଡ଼ ରାସ୍ତା ଉପରକୁ ଉଠାଇ ଆଣିବା ପରେ ତାଙ୍କର ମୃତ୍ୟୁ ଘଟିଥିବା ଜାଣିଥିଲେ । ଖବରପାଇ ନୟାଗଡ଼ ଅତିରିକ୍ତ ଆରକ୍ଷୀ ଅଧିକ୍ଷକ ଉମାକାନ୍ତ ମଲ୍ଲିକ, ନୟାଗଡ଼ ଏସ୍‌ଡିପି ନୀରଞ୍ଜନ ପାଢ଼ୀ, ଟାଉନଥାନା ଅଧିକାରୀ ଜୟଦୀପ ମହାନ୍ତିଙ୍କ ସହ ଟାଉନଥାନା ପୁଲିସ ଘଟଣାସ୍ଥଳରେ ପହଂଚି ଘଟଣାର ଅନୁଧ୍ୟାନ ଆରମ୍ଭ କରିଛି । ଅର୍ଜ୍ଜୁନଙ୍କ ବଡ଼ପୁଅ ଅଭିଯୋଗ ମୁତାବକ ଉକ୍ତ ଗ୍ରାମର ରାଜନ ଦାଶଙ୍କ ପୁଅ କାବୁଲି ଦାଶ, ବାବୁଲି ଦାଶ ଏବଂ ଚରଣ ବେହେରାଙ୍କ ପୁଅ ବିଜୟ ବେହେରାଙ୍କ ସହ ତାଙ୍କ ବାପାଙ୍କର ପୂର୍ବ ଶୁତ୍ରତା ରହିଥିଲା । ଏହି ବ୍ୟକ୍ତିମାନଙ୍କ ସହ ଜମିବାଡ଼ି ବିବାଦକୁ ନେଇ ପୂର୍ବରୁ ତାଙ୍କର ଗଣ୍ଡଗୋଳ ହୋଇଥିବା ବେଳେ ଏନେଇ ଟାଉନଥାନାରେ ଏକ ମାମଲା ରୁଜୁ ହେବା ସହ ଅର୍ଜ୍ଜୁନ ପ୍ରଧାନ ଏବଂ ଅନ୍ୟ କେତେ ଜଣ ଜାମିନରେ ଛାଡ଼ ପାଇଥିଲେ । ସେହି ଦିନଠାରୁ ଉକ୍ତ ଚାରି ଜଣ ବ୍ୟକ୍ତି ଅର୍ଜ୍ଜୁନଙ୍କୁ ହତ୍ୟା କରିବା ନେଇ ବାରମ୍ବାର ଧମକ ଦେଉଥିବା ବେଳେ ସେ ଏକୁଟିଆ ଜମିକୁ ଯିବା ସମୟରେ ତାଙ୍କର ପିଛା କରୁଥିବା ହାଡ଼ୁବନ୍ଧୁ କହିଛନ୍ତି । ଆଜି ସୁଯୋଗ ପାଇଁ ଏହି ବ୍ୟକ୍ତିମାନେ ତାଙ୍କ ବାପାଙ୍କୁ ହତ୍ୟା କରିଥିବା ନେଇ ହାଡ଼ୁବନ୍ଧୁ ଅଭିଯୋଗ କରିଥିବା ଜଣାଯାଇଛି । ଅଭିଯୋଗ ଆଧାରରେ ପୁଲିସ ଦୁଇ ଜଣଙ୍କ ଧରି ଥାନାରେ ଅଟକ ରଖିଥିବା ବେଳେ ଅନ୍ୟ ଦୁଇ ଜଣଙ୍କୁ ଧରିବା ପାଇଁ ଜାଲ ବିଛାଇଥିବା ସୂଚନା ମିଳିଛି । ଅନ୍ୟପକ୍ଷେ, ଗତକାଲି ରାତି ହୋଇ ସାରିଥିବାରୁ ଆଜି ପଂଚନାମା କରାଯିବା ପରେ ଶବକୁ ବ୍ୟବେଚ୍ଛଦ ପାଇଁ ପଠାଯିବ ବୋଲି ଜଣାଯାଇଛି ।