ନୟାଗଡ଼, (ବାଘୁଆବାର୍ତ୍ତା) : ରାଜ୍ୟ କର୍ମଚାରୀମାନଙ୍କୁ ସପ୍ତମ ବେତନ କମିଶନ ଦରମାର ବକେୟା ଅର୍ଥରୁ ୧୦ ପ୍ରତିଶତ ଅର୍ଥ ପ୍ରଦାନ କରିବାକୁ ଅର୍ଥ ବିଭାଗ ପକ୍ଷରୁ ସବୁଜ ସଙ୍କେତ ମିଳିଛି । ଆସନ୍ତା ମାର୍ଚ୍ଚ ୨୦ ସୁଦ୍ଧା କର୍ମଚାରୀମାନେ ଏହି ଅର୍ଥ ଉଠାଇପାରିବେ । ପୂର୍ବରୁ ବକେୟା ଦରମା ଅର୍ଥରୁ ୪୦ପ୍ରତିଶତ ମିଳିଥିଲା । ୧୦ପ୍ରତିଶତ ମିଶିବା ପରେ କର୍ମଚାରୀମାନେ ସରକାରଙ୍କ ଠାରୁ ୫୦ ପ୍ରତିଶତ ବକେୟା ପାଇବେ । ୧.୭.୨୦୧୯ରୁ ୧.୧.୨୦୨୦ ପର୍ଯ୍ୟନ୍ତ ୬ମାସର ବକେୟା ମହଙ୍ଗାଭତ୍ତା ପ୍ରଦାନ କରାଯାଇ ନଥିବାରୁ ଓଡ଼ିଶା ରାଜସ୍ୱ ଅମଲା ସଂଘ ନୟାଗଡ଼ ଜିଲ୍ଲା ଶାଖା ପକ୍ଷରୁ ଆଜି ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ଏହାସହିତ କେନ୍ଦ୍ରୀୟ ହାରରେ ଘରଭଡ଼ା ପ୍ରଦାନ କରିବା ପାଇଁ ମଧ୍ୟ ଦାବି ହୋଇଛି । ଏହାସହିତ ୬୦ ଭାଗ ଏରିଅର୍ ପ୍ରଦାନ ପାଇଁ ଉକ୍ତ ଦାବିପତ୍ରରେ ଉପସ୍ଥାପନ କରାଯାଇଛି । ଓଆର୍ଏସ୍ପି ନିୟମ ୨୧୭ ଅନୁସାରେ ଘରଭଡ଼ା ବୃଦ୍ଧି ପାଇଁ ଦାବି କରାଯାଇଥିବା ବେଳେ ନୟାଗଡ଼ ରାଜସ୍ୱ ଅମଲା ସଂଘ ପକ୍ଷରୁ ସଭାପତି ମନୋଜ କୁମାର ଜେନା, ସମ୍ପାଦକ ବିପିନ୍ବିହାରୀ ପଟ୍ଟନାୟକ ଏବଂ ଅନ୍ୟାନ୍ୟ କର୍ମକର୍ତ୍ତା ଜିଲ୍ଲାପାଳ ଡ. ପୋମା ଟୁଡୁଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି ।
