ଖଣ୍ଡପଡ଼ା, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ପ୍ରଶାସନର ସ୍ଥାଣୁତା ସାଙ୍ଗକୁ ଖଣ୍ଡପଡ଼ା ତହସିଲ ପ୍ରଶାସନର ଅଣଦେଖା ଯୋଗୁଁ ବନମାଳୀପୁର ବିମାନ ଅବତରଣ ପଡ଼ିଆ ସମୟାନୁକ୍ରମେ ଜବରଦଖଲକାରୀଙ୍କ କବଜାକୁ ଚାଲିଯାଉଥିବା ଜଣାପଡିଛି । ଉକ୍ତ ପଡିଆର ଚତୁଃପାଶ୍ୱର୍ରେ ଏବେ ଜବରଦଖଲକାରୀମାନେ ଅନଧିକାର ଭାବେ ବାସଗୃହ ନିର୍ମାଣ କରି ବସବାସ କରୁଥିବା ଅଭିଯୋଗ ହେଉଛି । ସେହିପରି ପଡିଆର କିଛି ଅଂଶରେ ବାଲି ଓ ପଥର ମାଫିଆମାନେ ବାଲି, ପଥର ଗଦାକରି ରଖିଥିବାବେଳେ କେତେକ ସ୍ଥାନରେ ମାଟି ଇଟାଭାଟି ପୋଡା ଚାଲିଥିବା ଜଣାପଡିଛି । ପୁଣି ପଡିଆର କିଛି ଅଂଶରୁ ମାଟି ତାଡି ଅନ୍ୟତ୍ର ଚୋରାରେ ଚାଲାଣ ହେଉଥିବା ଅଭିଯୋଗ ହେଉଛି । ଖଣ୍ଡପଡା ତହସିଲ କାର୍ଯ୍ୟାଳୟ ଅଧିନସ୍ଥ ବନମାଳୀପୁର ରାଜସ୍ୱ ନୀରିକ୍ଷକଙ୍କ କାର୍ଯ୍ୟାଳୟ ଅଧିନରେ ଥିବା ଏହି ବିମାନ ଅବତରଣ ପଡିଆଟି ରାଜରାଜୁଡା ଅମଳର ସ୍ୱାକ୍ଷର ବହନ କରୁଥିବାବେଳେ ଏହାର ରକ୍ଷଣାବେକ୍ଷଣ ଦିଗରେ ପ୍ରଶାସନ ନତୁବା ରାଜ୍ୟ ସରକାର ଆଦୈା ଧ୍ୟାନ ଦେଉନଥିବା ଅଭିଯୋଗ ହେଉଛି । ଫଳରେ ଏହାର ସୁଯୋଗ ନେଇ ଅସାମାଜିକ ବ୍ୟକ୍ତିବିଶେଷ ଓ ସ୍ଥାନୀୟ ଅଂଚଳର ପ୍ରଭାବଶାଳୀ ବ୍ୟକ୍ତିମାନେ ନୟାଗଡ ଜିଲ୍ଲାର ଏକମାତ୍ର ବିମାନ ଅବତରଣ ପଡିଆକୁ ନିଜ ନିଜର ପୈତୃକ ସମ୍ପତି ପରି ବ୍ୟବହାର କରୁଥିବା ନେଇ ସାଧାରଣରେ ଆଲୋଚନା ହେଉଛି । ୬୨ ଏକରରୁ ଉର୍ଦ୍ଧ ମୂଲ୍ୟବାନ ଜମି ଉପରେ ଅବସ୍ଥିତ ଏହି ଐତିହ୍ୟ ସମ୍ପନ୍ନ ବିମାନ ଅବତରଣ ପଡିଆରୁ ଜବରଦଖଲକାରୀମାନଙ୍କୁ ହଟାଯାଇ ପ୍ରଶାସନ ନିଜସ୍ୱ ନିୟନ୍ତ୍ରଣରେ ଉକ୍ତ ପଡିଆଟିକୁ ରଖିବାକୁ ଖଣ୍ଡପଡା ଅଂଚଳବାସୀ ଦାବି କରିଛନ୍ତି । ଏଥିପ୍ରତି ନୟାଗଡ ଜିଲ୍ଲାପାଳ, ରାଜସ୍ୱ ବିଭାଗ ସଚିବ ଓ ବିଭାଗୀୟ ମନ୍ତ୍ରୀ ଦୃଷ୍ଟିଦେବାକୁ ଅଂଚଳବାସୀ ଦାବି କରିଛନ୍ତି । ଖଣ୍ଡପଡା ତହସିଲ ପ୍ରଶାସନ ମଧ୍ୟ ଏଥିପ୍ରତି ଦୃଷ୍ଟିଦେବାକୁ ଦାବିହେଉଛି ।
