ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଶରଣକୂଳ ନିକଟସ୍ଥ କୁଟୁଣୀ ଗ୍ରାମର ଚଳଚ୍ଚିତ୍ର ଏବଂ ନାଟ୍ୟ ଅଭିନେତା ସନ୍ତୋଷ ନାୟକଙ୍କର ଆଜି ଭୂବନେଶ୍ୱର ସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ପରଲୋକ ଘଟିଛି । ସେ ଜଣେ ପ୍ରଖ୍ୟାତ କଳାକାର ହୋଇଥିବା ବେଳେ ଅଂଚଳରେ ତାଙ୍କର ସୁଖ୍ୟାତି ରହିଥିଲା । ସେ ଆକାଶବାଣୀ କଟକ କେନ୍ଦ୍ରର ସ୍ୱୀକୃତ୍ତି ପ୍ରାପ୍ତ ଅଭିନେତା ଭାବେ ୭୫ରୁ ଉର୍ଦ୍ଧ୍ୱ ନାଟକରେ ଅଭିନୟ କରିଥିବା ବେଳେ ଅନେକ ଚଳଚ୍ଚିତ୍ରରେ ମଧ୍ୟ ବାପା ଭୂମିକାରେ ଅଭିନୟ କରୁଥିଲେ । ମୋ ଭାଇ ଜଗା ଚଳଚ୍ଚିତ୍ର ମାଧ୍ୟମରେ ସେ ସିନେମା ଜଗତରେ ପାଦ ଦେଇଥିବା ବେଳେ ଏଇ ସଂଘର୍ଷ, ମନମାନେନା, ବଡ଼ ଭାଉଜ ପ୍ରଭୃତି ଚଳଚ୍ଚିତ୍ରରେ ଅଭିନୟ କରିଥିଲେ । ଜଣେ ନାଟ୍ୟ ନିର୍ଦ୍ଦେଶକ ଭାବେ ତାଙ୍କର ଜିଲ୍ଲା ତଥା ରାଜ୍ୟରେ ଖ୍ୟାତି ରହିଥିବା ବେଳେ ସେ ନୟାଗଡ଼ ମହାବିଦ୍ୟାଳୟରେ ଅଧ୍ୟୟନ କରୁଥିବା ବେଳେ ନାଟ୍ୟ ସଂପାଦକ ଭାବେ ନିର୍ବାଚିତ ହୋଇଥିଲେ । ତାଙ୍କ ବିୟୋଗରେ ଚଳଚ୍ଚିତ୍ର ଓ ନାଟ୍ୟ ଜଗତରେ ଅପୂରଣୀୟ କ୍ଷତି ହୋଇଥିବା ବେଳେ ଏହାକୁ ଶରଣକୂଳ ଅଂଚଳରେ ଗଭୀର ଶୋକ ପ୍ରକାଶ ପାଇଛି ।
