ପରୀକ୍ଷା ଦେଇ ଫେରୁଥିବା ବେଳେ ଅଘଟଣ

ନୟାଗଡ଼, (ବାଘୁଆବାର୍ତ୍ତା) : ନୂଆଗାଁ ବ୍ଲକ ଅନ୍ତର୍ଗତ ଢେଙ୍କେଣା ନିକଟରେ ବାଇକ ଦୁର୍ଘଟଣା ଘଟି ଆଜି ୩ ଛାତ୍ରୀଙ୍କ ସମେତ ୪ ଜଣ ଆହାତ ହୋଇଛନ୍ତି । ସୂଚନାନୁସାରେ, ମାଳିସାହିଠାରେ ଅବସ୍ଥିତ ଗତିକେଶ ଉଚ୍ଚ ବିଦ୍ୟାଳୟର ଛାତ୍ରଛାତ୍ରୀଙ୍କ ପରୀକ୍ଷା ସେଣ୍ଟର ଚାହାଳୀ ଉଚ୍ଚ ବିଦ୍ୟାଳୟରୁ ଫେରୁଥିବା ବେଳେ ଅଘଟଣ ଘଟିଛି । ଏହି ସମୟରେ ଏକ ବାଇକରେ ମାଳିସାହିର କାଂଚନ ବାରିକଙ୍କ ଝିଅ ରଶ୍ମିତା ବାରିକ ଜଣେ ସଂମ୍ପର୍କୀୟ ଭାଇ ଅଭିମନ୍ୟୁ ବାରିକ ସହ ଫେରୁଥିବା ବେଳେ ଅନ୍ୟ ଏକ ବାଇକରେ ଜଣେ ଯୁବକ ରଙ୍କନିଧି ମହାରଣାଙ୍କ ଝିଅ ଲକ୍ଷ୍ମୀ ମହାରଣା ଏବଂ ପୂର୍ଣ୍ଣ ମହାରଣାଙ୍କ ଝିଅ ରଚନା ମହାରଣାଙ୍କୁ ଧରି ଫେରୁଥିଲେ । ଦୁଇଟି ବାଇକ ଆଗପଛ ହୋଇ ଆସୁଥିବା ବେଳେ ଭାରସାମ୍ୟ ହରାଇ ପରସ୍ପରକୁ ଧକ୍କା ଦେଇଥିଲେ । ଫଳରେ ଘଟଣା ସ୍ଥଳରେ ଗାଡ଼ିରୁ ଛିଟିକି ପଡ଼ି ରଶ୍ମିତା, ଅଭିମନ୍ୟୁ, ଲକ୍ଷ୍ମୀ, ରଚନା ଆହାତ ହୋଇଥିଲେ । ଖବରପାଇ ନୟାଗଡ଼ ଦମକଳ ବାହିନୀ ଘଟଣା ସ୍ଥଳରେ ପଂହଚି ଦୁର୍ଘଟଣା ଗ୍ରସ୍ତଙ୍କୁ ଉଦ୍ଧାର କରି ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତୀ କରିଥିଲେ ।