ବିଜୁ ଜନତା ଦଳ ପଞ୍ଚମପାଳିର ଗୋଟିଏ ବର୍ଷ ପୂରଣ ହେବାକୁ ଯାଉଛି । ପାଂଚଥର ମୁଖ୍ୟମନ୍ତ୍ରୀ ଭାବେ କାର୍ଯ୍ୟ କରି ନବୀନ ପଟ୍ଟନାୟକ ସଫଳ ନେତୃତ୍ୱର ପରାକାଷ୍ଠା ଦେଖାଇବା ସହ ବିଜୁ ଜନତା ଦଳକୁ ଦେଶର ଏକ ପ୍ରମୂଖ ଆଂଚଳକି ଦଳ ଭାବେ ଗଢ଼ି ତୋଳିବାରେ ସମର୍ଥ ହୋଇଛନ୍ତି । କେବଳ ସେତିକି ନୁହେଁ, ତାଙ୍କ ଶାସନ କାଳ ଭିତରେ ରାଜ୍ୟକୁ ଆସିଥିବା ଭିନ୍ନ ଭିନ୍ନ ସମୟର ବାତ୍ୟା, ବନ୍ୟାଠୁ ଆରମ୍ଭ କରି ପାକୃତିକ ବିପର୍ଯ୍ୟୟ ସଫଳତାର ସହ ମୁକାବିଲା କରିବା ନବୀନଙ୍କ ପାଇଁ ବଡ଼ ଆର୍ଶୀବାଦ ପାଲଟିଛି । ଜନଜୀବନର କ୍ଷୟକ୍ଷତିକୁ ହ୍ରାସ କରିବା ପରି ପଦକ୍ଷେପ ନେଇ ସେ ଦେଶ ତଥା ବିଦେଶର ଚର୍ଚ୍ଚିତ ବ୍ୟକ୍ତିତ୍ୱ ପାଲଟିଛନ୍ତି । ନବୀନଙ୍କର ପରିଚାଳନା ଗତ ସଫଳତାକୁ କେନ୍ଦ୍ର ସରକାରଙ୍କ ନେତୃବୃନ୍ଦ, ଏପରିକି ବିରୋଧି ଦଳର ନେତାମାନେ ମଧ୍ୟ ପସନ୍ଦ କରି ଆସିଛନ୍ତି । ଅନ୍ୟପକ୍ଷରେ ଦେଖିଲେ ତାଙ୍କର ରାଜନୈତିକ ଗୋଟି ଚାଳନା ସର୍ବଭାରତୀୟ ସ୍ତରରେ ଅନ୍ୟମାନଙ୍କୁ ଚକିତ କରିଛି । ରାଷ୍ଟ୍ରିୟ ନିଷ୍ପତ୍ତି ବେଳେ ସେ ସ୍ୱତନ୍ତ୍ର ନିଷ୍ପତ୍ତି ନେଇ ସମସ୍ତଙ୍କୁ ବିସ୍ମିତ କରି ଦେଇଛନ୍ତି । ରାଜନୈତିକ ସମୀକ୍ଷକମାନେ ତାଙ୍କୁ ଗୋଟିଏ ପକ୍ଷରେ ବାନ୍ଧି ରଖିବା କଷ୍ଟକର ବୋଲି କହିଥାନ୍ତି । ଅନେକ ସମୟରେ ଚିରାଚରତ ଧାରାରେ ରାଜନୈତିକ ନିଷ୍ପତ୍ତି ନନେଇ ରାଜ୍ୟର ସ୍ୱାର୍ଥକୁ ଆଗରେ ରଖି, ମତ ସ୍ଥିର କରିଥାନ୍ତି । କେନ୍ଦ୍ରରେ କଂଗ୍ରେସ ସରକାର ହେଉ କି, ବିଜେପି ନେତୃତ୍ୱ ସରକାର, ସମସ୍ତଙ୍କ ସହ ଭଲ ତାଳମେଳ ଦେଇ ଶାସନ କରି ଆସିଛନ୍ତି ନବୀନ ବାବୁ । ରାଜ୍ୟରେ ତାଙ୍କର ଭିନ୍ନ ଭିନ୍ନ ଯୋଜନା ଗୁଡ଼ିକର ସଫଳତାକୁ କେବେ ରାଜନେତା ନୁହଁନ୍ତି, ବିଶ୍ୱସ୍ତରୀୟ ଅର୍ଥନୀତିଜ୍ଞମାନେ ମଧ୍ୟ ନବୀନଙ୍କୁ ପ୍ରଶଂସା କରି ଆସୁଛନ୍ତି । ସମସ୍ତ ସରକାରୀ ଯୋଜନାର ସଫଳତା ନବୀନଙ୍କୁ ଲୋକପ୍ରିୟତା କରାଇବାରେ ସହାୟକ ହୋଇଛି । ଏହା କେହି ଏଡ଼ାଇ ପାରିବେ ନାହିଁ । ଆଂଚଳକି ଦଳ ରାଜନୀତିରେ ପଶ୍ଚିମବଙ୍ଗର ଦୀର୍ଘତମ ନେତୃତ୍ୱ ନେଇଥିବା ସ୍ୱର୍ଗତ ଜ୍ୟୋତି ବସୁଙ୍କ ପରେ ଦ୍ୱିତୀୟ ମୁଖ୍ୟମନ୍ତ୍ରୀ ଯେ, କି ଏହି ସଫଳତା ହାସଲ କରିଛନ୍ତି । ବିଶେଷ କରି ହକି ପ୍ରରି କ୍ରୀଡ଼ାକୁ ପ୍ରୋତ୍ସାହନ ଦେଇ ସେ ଦେଶ ବିଦେଶରେ ଅନେକ ପ୍ରଶଂସା ସାଉଁଟିଛନ୍ତି । କରୋନା ପରିସ୍ଥିତିରେ ଆଗୁଆ ସତର୍କ ରହିବା ଏବଂ ସମସ୍ତ କାର୍ଯ୍ୟକୁ ସଂପାଦନା କରିବା, ସ୍ୱତନ୍ତ୍ର ଚିକିତ୍ସାଳୟ ସ୍ଥାପନା କରି ରାଜ୍ୟ ବାହାରୁ ପ୍ରବାସୀ ଶ୍ରମିକମାନଙ୍କୁ ଆଣି ସେମାନଙ୍କ ବ୍ୟବସ୍ଥା କରିବା ଏକ ଚ୍ୟାଲେଞ୍ଜ ସଦୃଶ କାର୍ଯ୍ୟ କରିଛନ୍ତି । ଯାହାକୁ ନେଇ ଦେଶର ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ବହୁ ନେତୃମଣ୍ଡଳୀ ପ୍ରଶଂସା କରିଛନ୍ତି । ତାଙ୍କ ନେତୃତ୍ୱ ନିକଟରେ ରାଷ୍ଟ୍ରିୟ ଦଳ ବିଜେପି ଏବଂ କଂଗ୍ରେସ ହାର ମାନିଛନ୍ତି । ତାହା କଷ୍ଟକର ହେଲେ ମଧ୍ୟ ସମସ୍ତେ ସ୍ୱୀକାର କରିବାକୁ ହେବ ଯେ, ରାଜ୍ୟ ରାଜନୀତିରେ ନବୀନଙ୍କ ବିକଳ୍ପ କେହି ନାହିଁନ୍ତି, ସେ ରାଜ୍ୟର ଅପ୍ରତିଦ୍ୱନ୍ଦୀ । ପଂଚମ ପାଳିର ପାଂଚ ବର୍ଷ ଶାସନରୁ ସେ ଗୋଟିଏ ବର୍ଷ ପୂରଣ କରିଛନ୍ତି ।
