ନାଗରିକ ସଂଶୋଧନ ବିଲକୁ ସିପିଆଇଏମ୍ ବିରୋଧ

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ସିପିଆଇଏମ୍ ତରଫରୁ ନାଗରିକ ସଂଶୋଧନ ବିଲକୁ ବିରୋଧ କରାଯିବା ସହ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଘେରାର କରାଯାଇଛି । ସୂଚନାନୁସାରେ, କେନ୍ଦ୍ର ସରକାରଙ୍କ ଦ୍ୱାରା ଗୃହୀତ ନାଗରିକତ୍ୱ ସଂଶୋଧନ ଆଇନର ସମ୍ବିଧାନ ବିରୋଧି ଆଭିମୁଖ୍ୟ ବିରୁଦ୍ଧରେ ଏବଂ ଏହାର ପ୍ରତ୍ୟାହାର ଦାବି ନେଇ ସିପିଆଇଏମ୍ ଏବଂ ଜନ ଅଧିକାର ସୁରକ୍ଷା ମଂଚ ମିଳିତ ଭାବେ ବିକ୍ଷୋଭ ପଦର୍ଶନ କରିଥିଲେ । ସିନ୍ଦୁରିଆଠାରୁ ବ୍ୟାନର ଓ ପ୍ଲାକାଡ଼ ଧରି ସଂଗଠନର ସଦସ୍ୟମାନେ ରାଜରାସ୍ତାରେ ମୋଦି ସରକାର ସାଂପ୍ରଦାୟିକ ଧୃବି କରଣ ନୀତିର ବିରୁଦ୍ଧରେ ସ୍ଲୋଗାନ ଦେଇ ନୟାଗଡ଼ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇଛନ୍ତି । ସିଏଏ ପ୍ରତ୍ୟାହାର ଦାବିରେ ବିକ୍ଷୋଭକାରୀମାନେ ସିପିଆଇଏମ୍ ନେତା ବିଶ୍ୱନାଥ ମହାପାତ୍ରଙ୍କ ଅଧ୍ୟକ୍ଷତାରେ ଜିଲ୍ଲାପାଳଙ୍କ କାର୍ଯ୍ୟାଳୟ ସାମନା ଦେଇ ଯାଇଥିବା ଜାତୀୟ ରାଜପଥ ଉପରେ ସଭା କରିବା ସହ ଧାରଣାରେ ବସିଥିଲେ । ଏକ ପ୍ରତିନିଧି ଦଳ ନୟାଗଡ଼ ଜିଲ୍ଲାପାଳଙ୍କ ଜରିଆରେ ଭାରତର ରାଷ୍ଟ୍ରପତିଙ୍କୁ ଏହି କାନୁନ୍ ପ୍ରତ୍ୟାହାର ଦାବି ପୂର୍ବକ ସ୍ମାରକ ପତ୍ର ପ୍ରଦାନ କରିଥିଲେ । ଏହି ବିକ୍ଷୋଭରେ ସିପିଆଇଏମ୍ ନେତା ଶରତ ଚନ୍ଦ୍ର ବେହେରା, ଗଙ୍ଗାଧର ପଣ୍ଡା, ସୁରେଶ ସ୍ୱାଇଁ, ବୁଦ୍ଧି ନାୟକ, ଏସଏ କରିମ୍, ସୁରକ୍ଷା ମଂଚର ନେତା ଏସ୍ଏ ଆହାତ୍, ଗୋଲଖ ବିହାରୀ ମୁଦୁଲୀ ପ୍ରମୂଖ ଉଦ୍ବୋଧନ ଦେଇଥିଲେ ।