ଭୁବନେଶ୍ୱର (ବାଘୁଆବାର୍ତ୍ତା ବ୍ୟୁରୋ): ରାଜ୍ୟବାସୀଙ୍କୁ ସ୍ୱାସ୍ଥ୍ୟ ସେବା ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଗଷ୍ଟ ୧୫ରୁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ଶୁଭାରମ୍ଭ ହେବ ବୋଲି ନିଷ୍ପତ୍ତି ନେଇଛନ୍ତି । ରାଜ୍ୟବାସୀଙ୍କୁ ସ୍ୱାସ୍ଥ୍ୟ ସେବା ଯୋଗାଇ ଦେବାପାଇଁ ରାଜ୍ୟ ସରକାର ଅନେକ ପଦକ୍ଷେପ ଗ୍ରହଣ କରିଛନ୍ତି । ତନ୍ମଧ୍ୟରୁ ରହିଛି ବିନା ମୂଲ୍ୟରେ ଔଷଧ ବିତରଣ ପାଇଁ “ନିରାମୟ, ନିଶୁଳ୍କ ରୋଗ ନିରୂପଣ ପାଇଁ “ନିଦାନ’ ଓ ନିଶୁଳ୍ପ ଡାୟାଲିସସ୍ ସେବା ପାଇଁ “ସହାୟ’ ଆଦି ଯୋଜନା ରାଜ୍ୟ ସରକାର ପୂର୍ବରୁ ଘୋଷଣା କରିଛନ୍ତି । ସେହିପରି ଭାବେ ବିନା ମୂଲ୍ୟରେ ଜରୁରୀକାଳୀନ ଆମ୍ବୁଲାନ୍ସ ସେବା ଓ ଜନନୀ ଏକ୍ସପ୍ରେସ୍ ସେବା ମଧ୍ୟ କାର୍ଯ୍ୟକାରୀ ହେଉଛି । ଦୁର୍ଗମ ଅଞ୍ଚଳରେ ଗର୍ଭବତୀ ମହିଳାମାନଙ୍କ ନିମନ୍ତେ ସରକାରୀ ଡାକ୍ତରଖାନାରେ ପ୍ରସବକୁ ପ୍ରୋତ୍ସାହିତ କରିବା ପାଇଁ ପ୍ରତ୍ୟେକ ଗର୍ଭବତୀ ମହିଳାଙ୍କୁ ୧ହଜାର ଟଙ୍କାର ସ୍ୱତନ୍ତ୍ର ସହାୟତା ରାଶି ପ୍ରଦାନ କରାଯାଉଛି । ରକ୍ତ ସମସ୍ୟାର ଆକ୍ରାନ୍ତ ରୋଗୀମାନଙ୍କୁ ଯାତାୟତ ଖର୍ଚ୍ଚ ପାଇଁ ୫୦୦ ଟଙ୍କା ପ୍ରଦାନ କରାଯାଉଛି । ବିଭିନ୍ନ ପ୍ରକାର ସଂକ୍ରାମକ ଓ ଅଣ ସଂକ୍ରାମକ ରୋଗ ପାଇଁ ମାଗଣା ଚିକିତ୍ସାର ବ୍ୟବସ୍ଥା କରାଯାଇଛି ।
ଏତଦ୍ବ୍ୟତୀତ ବିଜୁ କୃଷକ କଲ୍ୟାଣ ଯୋଜନା, ଓଡ଼ିଶା ରାଜ୍ୟ ଚିକିତ୍ସା ପାଣ୍ଠି ଓ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠି ଜରିଆରେ ବିନା ମୂଲ୍ୟରେ ସ୍ୱାସ୍ଥ୍ୟସେବା ଯୋଗାଇ ଦିଆଯାଉଛି । ପ୍ରକାଶଥାଉ କି, ରାଜ୍ୟ ସରକାର ସ୍ୱାସ୍ଥ୍ୟସେବା ପାଇଁ ଏତେସବୁ କାର୍ଯ୍ୟକ୍ରମ କରିଥିଲେ ମଧ୍ୟ ପୁଣି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଆରମ୍ଭ କରିଛନ୍ତି । ରାଜ୍ୟରେ ସ୍ୱାସ୍ଥ୍ୟସେବା ବ୍ୟବସ୍ଥାକୁ ଅଧିକ ଲୋକାଭିମୁଖୀ କରିବା ଉଦ୍ଦେଶ୍ୟରେ ପୁଣି ଏକ ନୂତନ ଯୋଜନା ରାଜ୍ୟ ସରକାର ପ୍ରଣୟନ କରିଛନ୍ତି । ଏହି ଯୋଜନାର ନାମ ରହିଛି “ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା’ । ଏହି ଯୋଜନା ରାଜ୍ୟର ସମସ୍ତ ସରକାରୀ ସ୍ୱାସ୍ଥ୍ୟ ଅନୁଷ୍ଠାନରେ କାର୍ଯ୍ୟକାରୀ ହେବ । ଯୋଜନା ଅଧିନରେ ୭୦ଲକ୍ଷ ପରିବାର ଉପକୃତ ହେବେ । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଅଧିନରେ ଉପକେନ୍ଦ୍ର, ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର, ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର, ଉପଖଣ୍ଡ ଚିକିତ୍ସାଳୟ ଓ ଜିଲ୍ଲା ମୁଖ୍ୟ ଚିକିତ୍ସାଳୟଗୁଡି୍କରେ ମାଗଣା ଚିକିତ୍ସା ସେବା ଉପଲବ୍ଧ ହେବ । ରାଜ୍ୟର ସ୍ୱାସ୍ଥ୍ୟ ଅନୁଷ୍ଠାନ ଗୁଡିକରେ ବାର୍ଷିକ ପ୍ରାୟ ୪କୋଟି ୮୪ଲକ୍ଷ ରୋଗୀ ଉପସ୍ଥାନକୁ ଦୃଷ୍ଟିରେ ରଖି ସମସ୍ତ ପ୍ରକାର ଯୋଗ ପାଇଁ ବିନା ମୂଲ୍ୟରେ ସ୍ୱାସ୍ଥ୍ୟସେବା ଓ ଔଷଧ ଯୋଗାଇ ଦିଆଯିବ । ଏତଦ୍ବ୍ୟତୀତ ପୂର୍ବରୁ ଲାଗୁ ହୋଇଥିବା ୟୁଜର୍ସ ଫି ସମସ୍ତ ସରକାରୀ ଡାକ୍ତରଖାନାରୁ ଉଚ୍ଛେଦ କରାଯିବ । ଅର୍ଥାତ୍ ସବୁ ପ୍ରକାର ସ୍ୱାସ୍ଥ୍ୟସେବା ମାଗଣା କରାଯିବ । ଏହି ଯୋଜନାରେ ଆର୍ଥିକ ଦୃଷ୍ଟିରୁ ପଛୁଆ ଓ ବିପଦଶଙ୍କୁଳ ଅବସ୍ଥାରେ ରହୁଥିବା ପରିବାରଗୁଡିକ ପାଇଁ ପ୍ରାଥମିକ ଚିକିତ୍ସା ଠାରୁ ଆରମ୍ଭ କରି ଶୀର୍ଷ ସ୍ତରୀୟ ଚିକିତ୍ସା ନିମନ୍ତେ ବର୍ଷକୁ ୫ଲକ୍ଷ ଟଙ୍କାର ସୁବିଧା ମିଳିପାରିବ । ରାଜ୍ୟ ଜନସଂଖ୍ୟାର ୭୦ ପ୍ରତିଶତ ଅର୍ଥାତ୍ ୭୦ଲକ୍ଷ ପରିବାରର ସ୍ୱାସ୍ଥ୍ୟ ସୁରକ୍ଷା ସମ୍ପୂର୍ଣ୍ଣ ହେବ । ଏହି ପରିବାର ଗୁଡିକର ମୋଟ୍ ରାଜ୍ୟର ୩.୫ କୋଟି ଲୋକ ଏହି ଯୋଜନାରେ ସାମିଲ ହେବେ ।
ଆସନ୍ତା ଅଗଷ୍ଟ ୧୫ ତାରିଖ ସ୍ୱାଧୀନତା ଦିବସରେ ଏହି ଯୋଜନା କାର୍ଯ୍ୟକାରୀ ହେବ । ସେହିଦିନ ଠାରୁ ସରକାରୀ ସ୍ୱାସ୍ଥ୍ୟ ଅନୁଷ୍ଠାନ ଗୁଡିକୁ ଆସୁଥିବା ସମସ୍ତ ଗର୍ଭବତୀ ମହିଳା ଓ ଅଶୁସ୍ଥ ଶିଶୁଙ୍କୁ ନିଜ ଘରକୁ ଫେରିବା ନିମନ୍ତେ ୫୦୦ ଟଙ୍କାର ଯାତାୟତ ଖର୍ଚ୍ଚ ପ୍ରଦାନ କରାଯିବ । ଏହାଦ୍ୱାରା ବର୍ଷକ ୁ ୬କୋଟି ୫୦ ଲକ୍ଷରୁ ଊଦ୍ଧ ୍ୱର୍ ଗଭର୍ବ ତୀ ମହଳି । ଓ ଅସୁସ୍ଥ ନବଜାତ ଶିଶୁ ଉପକୃତ ହେବେ ବୋଲି ଜଣାପଡିଛି । ଅନ୍ୟଏକ ପକ୍ଷରେ ରାଜ୍ୟ ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଓ କେନ୍ଦ୍ର ସରକାରଙ୍କ ଆୟୁଷ୍ମାନ ଯୋଜନାକୁ ନେଇ ଟଣାଓଟରା ଲାଗି ରହିଛି । ଆୟୁଷ୍ମାନ ଯୋଜନାକୁ ରାଜ୍ୟ ସରକାର ସହଜରେ ଗ୍ରହଣ କରିପାରି ନାହାନ୍ତି । ଆୟୁଷ୍ମାନ ଯୋଜନାରେ ରାଜ୍ୟର ୯ଲକ୍ଷ ପରିବାର ବାଦ୍ ପଡିଥାନ୍ତେ । ଏତଦ ବ୍ୟତୀତ ରାଜ୍ୟ ସରକାର ୪୦ଭାଗ ଅର୍ଥ ଖର୍ଚ୍ଚ କରିଥାନ୍ତେ । ଏଥିଲାଗି ପ୍ରତ୍ୟେକ ଗାଁ ଗାଁରେ ପୁଣି କନ୍ଦଳ ଦେଖା ଯାଇଥାନ୍ତା । ୯୦ ପ୍ରତିଶତ ସହରବାସୀ ଏହି ଯୋଜନାରେ ସାମିଲ ହୋଇପାରି ନଥାନ୍ତେ । ଯାହାକି ଆଗାମୀ ଦିନରେ ଅସୁବିଧା ସୃଷ୍ଟି ହୋଇଥାନ୍ତା ।
ଏହି ଯୋଜନାକୁ ନେଇ ବିଜେପି ଓ ବିଜେଡି ମୁହାଁମୁହିଁ ହୋଇଛନ୍ତି । ଆୟୁଷ୍ମାନ ଯୋଜନା ଏକ ବୀମା ହୋଇଥିବା ବେଳେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଏକ ଆଶ୍ୱାସନା ଭିତ୍ତିକ ଯୋଜନା । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ଜଣେ ନାଗରିକ ସିଧାସଳଖ ଉପକୃତ ହୋଇପାରିବେ । ଏଥିରେ କୌଣସି ବୀମା କରିବାକୁ ପଡିବ ନାହିଁ ।
