ଗୋଡ଼ିମଡ଼ା ଗ୍ରାମରେ ନବବଧୂକୁ ହତ୍ୟା

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ରଣପୁର ଥାନା ଅନ୍ତର୍ଗତ ଗୋଡ଼ିମଡ଼ା ଗ୍ରାମରେ ଆଜି ଜଣେ ନବବଧୂଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ଘଟଣାସ୍ଥଳରେ ପୁଲିସ ଓ ସାଇଣ୍ଟିଫିକ ଟିମ ପହଂଚି ତନାଘନା ଚଳାଇଥିବା ବେଳେ ସ୍ୱାମୀ, ଶାଶୁ, ଶ୍ୱଶୁର ଫେରାର ହୋଇଯାଇଛନ୍ତି । ସୂଚନାନୁସାରେ, ଶରଣକୂଳ ଥାନା ଅନ୍ତର୍ଗତ ଶିଙ୍ଗାରପୁର ଗ୍ରାମର ସୁବାସ ନାୟକଙ୍କ ଝିଅ ରଶ୍ମିତା ନାୟକ ରଣପୁର ଥାନା ଅନ୍ତର୍ଗତ ଗୋଡ଼ିମଡ଼ା ଗ୍ରାମର ଅନ୍ତରା ନାୟକଙ୍କ ପୁଅ ଟିକିନା ନାୟକଙ୍କୁ ବୈଦିକ ରୀତିରେ ବିବାହ କରିଥିଲେ । ବିବାହ ସମୟରେ ରଶ୍ମିତାଙ୍କ ପରିବାର ୩୦ ହଜାର ଟଙ୍କା ଯୌତୁକ ଦେବା ସହ ଅନ୍ୟନ ଆସବାବପତ୍ର ଦେଇଥିଲେ । ମାତ୍ର ବିବାହ ପରଠାରୁ ଶାଶୁ ଘର ପକ୍ଷରୁ ଏକ ମୋଟର ସାଇକେଲ ପାଇଁ ଦାବି କରାଯାଉଥିବା ବେଳେ ଆଜି ଉକ୍ତ କାରଣରୁ ରଶ୍ମିତାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ସ୍ୱାମୀ, ଶାଶୁ, ଶ୍ୱସୁର ଏବଂ ନଣନ୍ଦ ମିିଶି ଟିକିନାଙ୍କୁ ଦଳଚକଟା କରି ହତ୍ୟା କରିଥିବା ବାପଘର ପରିବାର ଲୋକେ ଅଭିଯୋଗ କରିଛନ୍ତି । ଖବରପାଇ ରଣପୁର ପୁଲିସ ଘଟଣାସ୍ଥଳରେ ପହଂଚି ଛାନ ଭିନ କରିଥିବା ବେଳେ ସାଇଣ୍ଟିଫିକ ଟିମ ମଧ୍ୟ ଅନୁସନ୍ଧାନ ଚଳାଇଛି । ପୁଲିସ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ବେଳେ ଶାଶୁ ଘର ପରିବାର ସମସ୍ତେ ଫେରାର ଥିବା ଜଣାପଡ଼ିଛି ।