ସାଙ୍ଗ ହୋଇ ମଦ ପିଇଲେ, ସକାଳେ ଗଛରେ ଝୁଲୁଛି ମୃତଦେହ

କଣ୍ଟାବାଞ୍ଜି, (ବାଘୁଆବାର୍ତ୍ତା): ହତ୍ୟା କରି ଗଛରେ ଟାଙ୍ଗିଦେଲେ । ଏଭଳି ଘଟଣା ଘଟିଛି ବଲାଙ୍ଗୀର ଜିଲ୍ଲା ତୁରେକେଲା ଥାନା ଜାମକୀ ଗାଁରେ । ଗାଁର ନୂଆପଡାର ଦଶରଥ ପୁଟେଲଙ୍କୁ ସେହି ଗାଁର ଖଇରାପଡାର ଦୁଇ ବାପ ପୁଅ ମିଶି ହତ୍ୟା କରିଥିବା ଅଭିଯୋଗ ହେଉଛି । ହତ୍ୟାକାଣ୍ଡର ପ୍ରକୃତ କାରଣ ଜଣା ପଡ଼ିନାହିଁ । ମୃତକ ଦଶରଥ ପୁଟେଲଙ୍କ ପରିବାରଙ୍କ ଅଭିଯୋଗ ଅନୁସାରେ, ଶନିବାର ଅପରାହ୍ନ ସମୟରେ ଦଶରଥ ପୁଟେଲ ଏବଂ ଆତ୍ମାଶୀତକ ମାଝୀ ଗାଁରେ ବୁଲାବୁଲି କରିଥିଲେ । ଦୁଇ ଜଣ ସାଙ୍ଗ ହୋଇ ମଦ ପିଇ ଥିଲେ । ତେବେ ଆତ୍ମାଶୀତକଙ୍କ ପୁଅ ବାହାରେ ରହୁଥିବା ବେଳେ ସେ ଗାଁକୁ ଆସିବା ପରେ ସନ୍ଧ୍ୟା ସମୟରେ ଆତ୍ମାଶୀତକ ଏବଂ ତାଙ୍କ ପୁଅ ପୂରଣ ମାଝୀ କୌଣସି କଥାକୁ ନେଇ ଦଶରଥଙ୍କୁ ମାଡ଼ ମାରିଥିଲେ । ରାତିରେ ଦଶରଥ ଘରକୁ ଆସିନଥିବା ବେଳେ ରବିବାର ସକାଳେ ସମୟରେ ତାଙ୍କ ମୃତଦେହ ଆତ୍ମାଶୀତକ ମାଝୀଙ୍କ ଘର ସମ୍ମୁଖରେ ଥିବା ଏକ ଗଛରେ ଝୁଲୁଥିବା ଦେଖିବାକୁ ମିଳିଛି । ତେବେ ଆତ୍ମାଶୀତକ ଏବଂ ତାଙ୍କ ପୁଅ ପୂରଣ ଦଶରଥଙ୍କୁ ହତ୍ୟା କରି ଗଛରେ ଟାଙ୍ଗି ଦେଇଥିବା ମୃତ ଦଶରଥଙ୍କ ପୁଅ ଅଭିଯୋଗ କରିଛନ୍ତି ।