କ୍ଲିନ୍ ସୁଇପ ଲକ୍ଷରେ ବିଜେଡି, ସମ୍ମାନ ବଞ୍ଚାଇବା ଲକ୍ଷରେ ବିରୋଧି

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ପୌର ନିର୍ବାଚନ ଯେତିକି ନିକଟତ୍ତର ହେଉଛି, ରାଜନୈତିକ ଉଷ୍ମତା ସେତିକି ବଢ଼ୁଛି । ନୟାଗଡ଼ରେ ବିରୋଧି ଶିବିର ଫାଙ୍କା ପଡ଼ିଥିବା ବେଳେ ବିଜେଡି ଶିବିରରେ ନାହିଁ ନଥିବା ଗହଳୀ ଦେଖିବାକୁ ମିଳିଛି । ବିଜେଡି ପଞ୍ଚାୟତ ନିର୍ବାଚନ ଭଳି ପୈାର ନିର୍ବାଚନକୁ ଏକପାଖିଆ ଭାବେ ବିଜୟ କରିବା ତଥା କ୍ଲିନ ସୁଇପ୍ କରିବା ପାଇଁ ଉଦ୍ୟମ ଚଳାଇଛି । ସହରାଞ୍ଚଳ ପ୍ରଚାରରେ ମଧ୍ୟ ସମାନ ଅବସ୍ଥା ଦେଖାଯାଇଛି । ସୋସିଆଲ ମିଡିଆଠାରୁ ଆରମ୍ଭ କରି ରାସ୍ତାଘାଟରେ ପୋଷ୍ଟର ବ୍ୟାନର ପର୍ଯ୍ୟନ୍ତ ସବୁଥିରେ ବିଜେଡି ଆଗୁଆ ଥିବା ଲକ୍ଷ କରାଯାଉଛି । ନୟାଗଡ଼ ବିଧାୟକ ତଥା ମନ୍ତ୍ରୀ ପ୍ରାର୍ଥୀ, କର୍ମୀଙ୍କ ସହ ଶତାଧିକ ସମର୍ଥକଙ୍କ ଗହଣରେ ପ୍ରଚାର କରୁଥିବା ବେଳେ ବିରୋଧି ଦଳ ନେତାମାନେ ଲୁଚାଛପାରେ ବୁଲୁଥିବା ଦେଖାଯାଇଛି । ମନ୍ତ୍ରୀ ଆଜି ସହରର ବିଭିନ୍ନ ସାହି ଏବଂ କଲୋନୀରେ କ୍ୟାମ୍ପେନିଂ କରିବା ସହ ବିଜେଡି ନପକ୍ଷରୁ ମାଇକ ପ୍ରଚାର ମଧ୍ୟ ଆରମ୍ଭ ହୋଇଛି । ସହରାଞ୍ଚଳ ଭୋଟରଙ୍କୁ ଆକୃଷ୍ଟ କରିବା ପାଇଁ ବିଜେଡି ବିକାଶକୁ ମୁଦ୍ଦା କରିଛି । ପୈାର ପରିଷଦ ଅଞ୍ଚଳରେ ବିଗତ ଦିନରେ ହୋଇଥିବା ବିକାଶ ମୂଳକ କାର୍ଯ୍ୟକୁ ନେଇ ପ୍ରାର୍ଥୀ ଭୋଟରଙ୍କ ଦୂଆରେ ପହଞ୍ଚୁଥିବା ଦେଖାଯାଇଛି ।