ଭୁବନେଶ୍ୱର, (ବାଘୁଆବାର୍ତ୍ତା\ବ୍ୟୁରୋ): ନବୀନ ପଟ୍ଟନାୟକ ପଞ୍ଚମ ପାଳିର ସରକାରରେ ମନ୍ତ୍ରୀମାନେ ନିଜର ମାସକର ରିପୋର୍ଟ କାର୍ଡ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରିଛନ୍ତି । ସରକାର ଗଠନର ପ୍ରଥମ ଦିନରେ ଯେତେବେଳେ ମୁଖ୍ୟମନ୍ତ୍ରୀ ମନ୍ତ୍ରିପରିଷଦ ବୈଠକ ଡାକି ନିର୍ବାଚନରେ ଦିଆଯାଇଥିବା ପ୍ରତିଶ୍ରୁତିକୁ ପାଳନ କରିବାକୁ ନିଷ୍ପତ୍ତି କରିଥିଲେ ସେତେବେଳେ ମାସର ୭ ତାରିଖରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ । ସେହି ଅନୁସାରେ ପ୍ରଥମ ମନ୍ତ୍ରୀଙ୍କର ମାସକର ଦକ୍ଷତା: ନବୀନଙ୍କୁ ରିପୋର୍ଟ ଦେଲେ ମନ୍ତ୍ରୀ ମାସର ରିପୋର୍ଟ ମନ୍ତ୍ରୀମାନେ ପ୍ରଦାନ କରିଛନ୍ତି । ବିଭାଗ ସମ୍ପର୍କରେ ଜାଣନ୍ତୁ ଅବା ନଜାଣନ୍ତୁ ମନ୍ତ୍ରୀ ନିଜର ରିପୋର୍ଟ ଦାଖଲ କରିଛନ୍ତି ।
ମେ ୨୯ ତାରିଖରେ ନବୀନ ନୂଆ ମନ୍ତ୍ରୀମଣ୍ଡଳ ଶପଥ ଗ୍ରହଣ କରିଥିଲେ । ୧୧ଜଣ କ୍ୟାବିନେଟ ମନ୍ତ୍ରୀ ଓ ୯ଜଣ ସ୍ୱାଧୀନ ପାହ୍ୟା ରାଷ୍ଟମନ୍ତ୍ରୀ ଶପଥ ନେଇଥିଲେ । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ସୂଚନା ଅନୁଯାୟୀ ସମଗ୍ର ମନ୍ତ୍ରୀ ସେମାନଙ୍କର ବିଭାଗର ସମୀକ୍ଷା ସମ୍ପର୍କିତ ରିପୋର୍ଟ ମୁଖ୍ୟମନ୍ତ୍ରୀଙ୍କୁ ଦେଇଛନ୍ତି । ଗତ ମାସକ ମଧ୍ୟରେ ମନ୍ତ୍ରୀମାନେ କ’ଣ ପଦକ୍ଷେପ ନେଇଛନ୍ତି, ସେମାନଙ୍କ ବିଭାଗର ସ୍ଥିତି କ’ଣ ଆଗାମୀ ଦିନ ପାଇଁ ସେମାନଙ୍କ ରୋଡମ୍ୟାପ୍ କ’ଣ ରହିଛି ସେ ସମ୍ପର୍କରେ ଏହି ରିପୋର୍ଟ କାର୍ଡରେ ମୁଖ୍ୟମନ୍ତ୍ରୀଙ୍କୁ ଜଣାଇଛନ୍ତି । ନିଜ ରିପେର୍ଟ ନେଇ ମନ୍ତ୍ରୀମାନେ ମଧ୍ୟ ସନ୍ତୁଷ୍ଟ ଥିବା କହିଛନ୍ତି । ମନ୍ତ୍ରୀମାନେ ମେ ୨୯ ତାରିଖରେ ଶପଥ ଗ୍ରହଣ କରିଥିଲେ ମଧ୍ୟ ଜୁନ୍ ୧୫ ତାରିଖ ପର୍ଯ୍ୟନ୍ତ ପ୍ରାୟତଃ ଅଧିକାଂଶ ମନ୍ତ୍ରୀ ପୂର୍ଣ୍ଣରୂପେ ଦାୟିତ୍ବ ନେଇପାରି ନଥିଲେ ।
ସେମାନଙ୍କୁ ସଚିବାଳୟରେ ପ୍ରକୋଷ୍ଠ ନେବାକୁ ବେଶ କିଛିଦିନ ଲାଗି ଯାଇଥିଲା । ପରେ ଅଫିସ୍ କାମ ଆରମ୍ଭ କରିବା ପାଇଁ ନିଜର ବ୍ୟକ୍ତିଗତ ସଚିବ ନେବା କଷ୍ଟକର ହୋଇଥିଲା । ବେଶ କିଛିଦିନ ପରେ ବ୍ୟକ୍ତିଗତ ସଚିବଙ୍କୁ ନିଯୁକ୍ତି ଦିଆଯାଇଥିଲା । ଶେଷରେ କିଛି ମନ୍ତ୍ରୀ ମିଳିଥିବା ପ୍ରକୋଷ୍ଠରେ ପୂଜାପାଠ କରି କାମ ଆରମ୍ଭ କରିଥିବା ବେଳେ ଆଉ କିଛି ମନ୍ତ୍ରୀ ପ୍ରଥମ ଦିନରୁ ବିଭାଗ ବୁଲି କାମ ଆରମ୍ଭ କରିଥିବା ଦେଖାଇଥିଲେ ।
ବସ୍ତୁତଃ ମାସକରୁ ଅଧିକ ସମୟ ମନ୍ତ୍ରୀମାନଙ୍କର ପ୍ରକୋଷ୍ଠ ସଜଡା ଓ ବ୍ୟକ୍ତିଗତ ସଚିବ ନିଯୁକ୍ତି ସହ ଅଫିସ ସଜଡାରେ ଯାଇଥିଲା । ଅପରପକ୍ଷରେ ପୁରୁଣା ମନ୍ତ୍ରୀଙ୍କୁ ଛାଡିଲେ ନୂଆ ମନ୍ତ୍ରୀମାନେ ଆରମ୍ଭରୁ ବିଭାଗ ସମ୍ପର୍କରେ ଅବଗତ ନଥିଲେ । ପୁରୁଣା ମନ୍ତ୍ରୀମାନଙ୍କ ମଧ୍ୟରୁ ଅନେକଙ୍କର ବିଭାଗ ବଦଳିଥିବାରୁ ସେମାନେ ମଧ୍ୟ ବିଭାଗ ସମ୍ପର୍କରେ ଅବଗତ ହେବାକୁ ସମୟ ନେଇଥିଲେ । ତା ଭିତରେ ବିଧାନସଭା ଅଧିବେଶନ ଆସିଯାଇଥିଲା । ତେଣୁ ମନ୍ତ୍ରୀମାନେ ବିଭାଗ ସମ୍ପର୍କରେ ବୁଝିବା, ଜାଣିବା ଓ କାମ କରିବା ପୂର୍ବରୁ ରିପୋର୍ଟ ଦେବାକୁ ପଡିଥିବା କୁହାଯାଉଛି । ଏଥିରେ ରିପୋର୍ଟ ଯହା ହୋଇଥିବ ତାହା ସମସ୍ତଙ୍କୁ ଜଣା ।
ଉଲ୍ଲେଖ ଥାଉକି, ଶନିବାର ସମସ୍ତ ମନ୍ତ୍ରୀ ସେମାନଙ୍କର ରିପୋର୍ଟ ମୁଖ୍ୟମନ୍ତ୍ରୀଙ୍କୁ ଦେଇଥିଲେ ମଧ୍ୟ ଅନେକ ଉପସ୍ଥିତ ନଥିଲେ । କିଏ ନିର୍ବାଚନ ମଣ୍ଡଳୀରେ ଥିଲେ ତ ଆଉ କିଏ ଅନ୍ୟ କେଉଁ ଅଞ୍ଚଳକୁ ଗସ୍ତରେ ଯାଇଥିଲେ । ତେବେ ତାଙ୍କ କାର୍ଯ୍ୟାଳୟ ପକ୍ଷରୁ ରିପୋର୍ଟ ପଠାଇ ଦିଆଯାଇଥିବା କୁହାଯାଇଛି । ରିପୋର୍ଟରେ ମନ୍ତ୍ରୀମାନେ ମୁଖ୍ୟମନ୍ତ୍ରୀଙ୍କୁ କ’ଣ ଲେଖିଛନ୍ତି ତାହା ପ୍ରକାଶ କରିନାହାନ୍ତି । ତେବେ ରିପୋର୍ଟ ଦେଇଥିବା କଥା ସ୍ୱୀକାର କରିଛନ୍ତି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ମଧ୍ୟ ସବୁ ମନ୍ତ୍ରୀ ରିପୋର୍ଟ ଦେଇଥିବା କହିଛି । ତେବେ ଏହାକୁ ନେଇ ବିରୋଧୀ କଂଗ୍ରେସ ବେଶ୍ ସମାଲୋଚନା କରିଛି ।
କୁହାଯାଉଛି ସବୁ ମନ୍ତ୍ରୀଙ୍କର ରିପୋର୍ଟକୁ ମୁଖ୍ୟମନ୍ତ୍ରୀ ନିଜେ ଯାଞ୍ଚ କରିବେ । ଯାଞ୍ଚ କଲା ପରେ ମନ୍ତ୍ରୀ ଓ ବିଭାଗୀୟ ସଚିବ ତଥା ଅନ୍ୟ ଅଫିସରମାନଙ୍କୁ ଡାକି ସେ ସମାଲୋଚନା କରିବେ । କେଉଁ ବିଭାଗ କି ପ୍ରକାର ପଦକ୍ଷେପ ନେଇଛି ଏବଂ ଆଗକୁ ତାଙ୍କର କ’ଣ ରୋଡମ୍ୟାପ୍ ରହିଛି ତାହା ନିଜେ ମୁଖ୍ୟମନ୍ତ୍ରୀ ଦେଖିବେ । ସୂଚନାଯୋଗ୍ୟ, ନବୀନଙ୍କ ଚଳିତ ମନ୍ତ୍ରୀମଣ୍ଡଳରେ ନୂଆକରି ଟୁକୁନୀ ସାହୁ, ନବ କିଶୋର ଦାସ, ରଣେନ୍ଦ୍ର ପ୍ରତାପ ସ୍ୱାଇଁ, ଅରୁଣ ସାହୁ, ସୁଶାନ୍ତ ସିଂତ ଓ ସୁଦାମ ମାରାଣ୍ଡି କ୍ୟାବିନେଟ ମନ୍ତ୍ରୀ ହୋଇଥିବା ବେଳେ ଜଗନ୍ନାଥ ସାରକା, ଦିବ୍ୟଶଙ୍କର ମିଶ୍ର, ସମୀର ରଞ୍ଜନ ଦାଶ, ଜ୍ୟୋତିପ୍ରକାଶ ପାଣିଗ୍ରାହୀ, ପ୍ରେମାନନ୍ଦ ନାୟକ, ରଘୁନନ୍ଦନ ଦାସ, ପଦ୍ମିନୀ ଦିଆନ ଓ ତୁଷାରକାନ୍ତି ବେହେରା ପ୍ରଥମ ଥର ମନ୍ତ୍ରୀ ହୋଇଛନ୍ତି । କ୍ୟାବିନେଟ ମଧ୍ୟରେ ଟୁକୁନୀ ସାହୁ ଓ ନବ ଦାସ ମଧ୍ୟ ପ୍ରଥମଥର ମନ୍ତ୍ରୀ ହୋଇଛନ୍ତି ।
