ଭୁବନେଶ୍ୱର,(ବାଘୁଆବାର୍ତ୍ତା): ମିଶନଶକ୍ତିର ଖୋଲିବ ସ୍ୱତନ୍ତ୍ର କାର୍ଯ୍ୟାଳୟ । ଏଥିପାଇଁ ପ୍ରତି କାର୍ଯ୍ୟାଳୟ ନିର୍ମାଣ ପାଇଁ ଖର୍ଚ୍ଚ ହେବ ୫୦ଲକ୍ଷ ଟଙ୍କା । ଏନେଇ ଆଜି ମହିଳା, ଶିଶୁ ବିକାଶ ଓ ମିଶନଶକ୍ତି ମନ୍ତ୍ରୀ ଟୁକୁନୀ ସାହୁ ପ୍ରକାଶ କରିଛନ୍ତି । ରାଜ୍ୟର ପ୍ରତି ବ୍ଲକରେ ମିଶନଶକ୍ତି କାର୍ଯ୍ୟାଳୟର ସ୍ୱତନ୍ତ୍ର ଗୃହ ନିର୍ମାଣ କରାଯିବ । ତତସହିତ ମିଶନଶକ୍ତି ମାଧ୍ୟମରେ ରାଜ୍ୟର ମହିଳାମାନଙ୍କ ବିକାଶ ଓ ସେମାନଙ୍କୁ ସ୍ୱାବଲମ୍ବୀ କରିବା ପାଇଁ ରାଜ୍ୟ ସରକାର ସ୍ୱତନ୍ତ୍ର ଯୋଜନା କରିଛନ୍ତି । ମିଶନଶକ୍ତିରେ ରାଜ୍ୟ ସରକାର ରାଜ୍ୟରେ ୬ଲକ୍ଷ ୨ହଜାର ୧୩ମହିଳା ସ୍ୱୟଂ ସହାୟକ ଗୋଷ୍ଠୀ ଗଠନ କରି ୭୦ଲକ୍ଷ ୧୦ଜଣ ମହିଳାଙ୍କୁ ସଂପୃକ୍ତି କରିଛନ୍ତି । ସିଡମନି ନିମନ୍ତେ ସ୍ୱୟଂ ସହାୟକ ଗୋଷ୍ଠୀମାନଙ୍କୁ ୧୫ହଜାର ଓ ଡିଜିଟାଲ ସଶକ୍ତିକରଣ ପାଇଁ ୩ହଜାର ଟଙ୍କା ଦିଆଯାଇଛି । ସେହିପରି ୩୩୮ଟି ମହାସଂଘକୁ ୨୫ଲକ୍ଷ ଟଙ୍କା ଦିଆଯିବା ସହିତ ମିଶନଶକ୍ତି ଋଣ ମଧ୍ୟ ଦିଆଯାଇଛି । ତେବେ ଚଳିତ ବର୍ଷ ୨ଲକ୍ଷ ୨୪ହଜାର ୬୨୮ଟି ସ୍ୱୟଂ ସହାୟକ ଗୋଷ୍ଠୀକୁ ୩ହଜାର ୭୮୯କୋଟି ୯୦ଲକ୍ଷ ଟଙ୍କା ଋଣ ପ୍ରଦାନ କରାଯାଇଛି ।
