ବ୍ରହ୍ମପୁର, (ବାଘୁଆବାର୍ତ୍ତା): ଗ୍ଲାମର୍ ଜଗତରେ ଚମକିବାରେ ଲାଗିଛନ୍ତି ରେଶମ ସହରର ସୁନ୍ଦରୀ । ମଡେଲିଂ ହେଉ କି ଅଭିନୟ, ଫ୍ୟାସନ୍ କୋରିଓଗ୍ରାଫି ହେଉ ବା ସୁନ୍ଦରୀ ପ୍ରତିଯୋଗିତା ଅଥବା ଫଟୋ ସୁଟ୍ଟ୍ଟ ବ୍ରହ୍ମପୁରର ବହୁ କିଶୋରୀ ଓ ଯୁବତୀ ଏ କ୍ଷେତ୍ରରେ ଅଗ୍ରଣୀ ହେଲେଣି । ବ୍ରହ୍ମପୁରର ଦୁଇ ଭଉଣୀ ରାଜସ୍ଥାନ ଜୟପୁରରେ ମିସ୍ ଇଣ୍ଡିଆ ୨୦୨୧ ଚାର୍ମିଂ ଫେସ୍ ସୋ’ରେ ନିଜର ଜଲୱା ଦେଖାଇଛନ୍ତି । ସାନ ଭଉଣୀ ଶିଳ୍ପା ନାୟକ ସୋ’ରେ କ୍ରାଉନ୍ ହାସଲ କରିଥିବା ବେଳେ ବଡ଼ ଭଉଣୀ ସନ୍ଧ୍ୟାରାଣୀ ନାୟକ ହାସଲ କରିଛନ୍ତି ବେଷ୍ଟ୍ ଡିଜାଇନର୍ ଆୱାର୍ଡ । ଉକ୍ତ ସୋ’ର ସମସ୍ତ ବିଜେତାଙ୍କ ପାଇଁ ସନ୍ଧ୍ୟାରାଣୀଙ୍କ ଡିଜାଇନ୍ କରାଯାଇଥିବା ଡ୍ରେସ୍ ବ୍ୟବହୃତ ହୋଇଥିଲା । ଗତ ୨୮ ଏବଂ ୨୯ରେ ହୋଇଥିବା ଏହି ସୋ’ର ତିନୋଟି କ୍ୟାଟେଗୋରୀ ଥିଲା ମିସ୍ ଇଣ୍ଡିଆ, ମିଷ୍ଟର୍ ଇଣ୍ଡିଆ ଓ ମିସେସ୍ ଇଣ୍ଡିଆ ଚାର୍ମିଂ ଫେସ୍ ୨୦୨୧ । ଦେଶର ବିଭିନ୍ନ ରାଜ୍ୟରୁ ପ୍ରାୟ ୪୦ ଯୁବତୀଙ୍କୁ ପଛରେ ପକାଇ ମିସ୍ ଇଣ୍ଡିଆ ଚାର୍ମିଂ ଫେସ୍ (ୱାର୍ଲ୍ଡ) ଟାଇଟଲ୍ ହାତେଇଥିଲେ ବ୍ରହ୍ମପୁରର ଶିଳ୍ପା । ଭୁବନେଶ୍ୱରର ସ୍ମୃତିରେଖା ହୋଇଛନ୍ତି ଟୁରିଜମ୍ ୱିନର୍ । ଉକ୍ତ ସୋ’ର ବିଭିନ୍ନ ବର୍ଗରେ ବିଜେତା ସମସ୍ତ ପ୍ରତିଯୋଗୀଙ୍କ ପାଇଁ ଶିଳ୍ପାଙ୍କ ବଡ଼ ଭଉଣୀ ସନ୍ଧ୍ୟାରାଣୀ ଡ୍ରେସ୍ ଡିଜାଇନ୍ କରିଥିଲେ । ଏଥିସହ ସେ ପାଇଛନ୍ତି ବେଷ୍ଟ୍ ଡିଜାଇନର୍ ଆୱାର୍ଡ । ରବିବାର ବିଶାଖାପାଟଣାରେ ହେବ ମିସ୍ ଭାଇଜାଗ୍ ସୁନ୍ଦରୀ ପ୍ରତିଯୋଗିତା । ସେଠାକୁ ମଧ୍ୟ ପ୍ରତିଯୋଗୀଙ୍କ ଡ୍ରେସ୍ ଡିଜାଇନ୍ ପାଇଁ ଆମନ୍ତ୍ରିତ ହୋଇଛନ୍ତି ସନ୍ଧ୍ୟାରାଣୀ । ସେମାନଙ୍କ ପରିବାର ଲୋକ ଆଇଆର୍ଇ କୃଷ୍ଣନଗରରେ ରହୁଛନ୍ତି । ଶିଳ୍ପାଙ୍କ ପ୍ରଥମ ତେଲୁଗୁ ଚଳଚ୍ଚତ୍ର ‘ହନିଟ୍ରାପ୍’ ନିକଟରେ ମୁକ୍ତିଲାଭ କରିଛି । ଏଥିରେ ନାୟକ ଭୂମିକାରେ ରିଶି କୁମାର ସହ ନାୟିକା ଅଛନ୍ତି ଶିଳ୍ପା ।
