ଭୁବନେଶ୍ୱର, (ବାଘୁଆବାର୍ତ୍ତା): ଜରୁରି ସେବା ଯୋଗାଉଥିବା ୧୧୨ କେନ୍ଦ୍ର ବାହାରେ ଜଣେ ମହିଳା କର୍ମଚାରୀଙ୍କୁ ଦୁଷ୍କର୍ମ ଉଦ୍ୟମ ହୋଇଥିବା ଅଭିଯୋଗ ହୋଇଛି । ଦୁଷ୍କର୍ମ ଉଦ୍ୟମର ଶିକାର ହୋଇଥିବା ଯୁବତୀ ମଞ୍ଚେଶ୍ୱର ଥାନାରେ ଏତଲା ଦେଇଛନ୍ତି । ପୁଲିସ୍ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ମିଳିଥିବା ସୂଚନା ମୁତାବକ, ୧୧୨ କେନ୍ଦ୍ରରେ କାମ କରୁଥିବା ଜଣେ ଯୁବତୀ ଗତକାଲି ସକାଳ ୫ଟା ୪୫ରେ ଅଫିସ୍ ପାଖକୁ ଲାଗିଥିବା ପଛପଟ ରାସ୍ତାରେ ଆସୁଥିଲେ । ଏହି ସମୟରେ ଜଣେ ଯୁବକ ଏକ ବାଇକ୍ରେ ଆସି ତାଙ୍କୁ ଅକଟାଇ ବଳାତ୍କାର ଉଦ୍ୟମ କରିଥିଲେ । ଯୁବତୀ ଜଣଙ୍କ ଚିତ୍କାର କରିବାରୁ ଭୟରେ ଯୁବକ ଜଣଙ୍କ ସେଠାରୁ ଖସି ପଳାଇଥିଲେ । ଅଫିସ୍ରେ ପହଞ୍ଚିବା ପରେ ଯୁବତୀ ଜଣଙ୍କ ଘଟଣା ସଂପର୍କରେ କର୍ତ୍ତୃପକ୍ଷଙ୍କୁ ଜଣାଇବା ପରେ ଥାନାରେ ଏତଲା ଦେବେ ବୋଲି କହିଥିଲେ । ହେଲେ ବରିଷ୍ଠ ଅଧିକାରୀମାନେ ଯୁବତୀଙ୍କ ସାହସ ଦେବା ବଦଳରେ ଥାନାରେ ଏତଲା ନ ଦେବାକୁ ପ୍ରବର୍ତ୍ତାଇ ଥିଲେ ବୋଲି ଯୁବତୀ ଅଭିଯୋଗ କରିଛନ୍ତି । ତେବେ ଦ୍ୱନ୍ଦ୍ୱରେ ରହିବା ପରେ ଯୁବତୀ ଜଣଙ୍କ ଘର ଲୋକଙ୍କ ସହ କଥା ହୋଇଥିଲେ । ପରିବାର ଲୋକ ଏତଲା ଦେବାକୁ କହିବାରୁ ଶନିବାର ଯୁବତୀ ଜଣଙ୍କ ଡ୍ୟୁଟି ଆସି ଥାନାରେ ଏତଲା ଦେବେ ବୋଲି କହିଥିଲେ । ଅଫିସର ବରିଷ୍ଠ ଅଧିକାରୀମାନେ କିଛି ଉପାୟ ନ ପାଇ ଘଟଣା ବିଷୟରେ ପ୍ରଥମେ କଣ୍ଟ୍ରୋଲ ରୁମ ମୁଖ୍ୟଙ୍କୁ ଜଣାଇଥିଲେ । ତାଙ୍କ ଠାରୁ ଅନୁମତି ମିଳିବା ପରେ ଶନିବାର ଅପରାହ୍ଣରେ ଥାନାରେ ଏତଲା ଦେଇଥିଲେ ପୀଡ଼ିତା । ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । କାର୍ଯ୍ୟାଳୟ ନିକଟରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିଛି । ଡିସିପି ପିନାକ ମିଶ୍ରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପୁଲିସ ଏହାର ତଦନ୍ତ କରୁଛି । ଖୁବଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଡିସିପି କହିଛନ୍ତି । ରାଜ୍ୟର ସର୍ବାଧିକ ମହିଳା କର୍ମଚାରୀ ମଞ୍ଚେଶ୍ୱର ଥାନା ଅଞ୍ଚଳରେ କାମ କରୁଛନ୍ତି । ସବୁ ଦିନ ଏମାନଙ୍କ ସହ କିଛି ନା କିଛି ଅଘଟଣ ଘଟୁଥିବା ଅଭିଯୋଗ ହେଉଛି । କିଛି ଦିନ ତଳେ ଚକେଇଶିଆଣି ଅଞ୍ଚଳରେ ଘଟିଥିଲା ସମାନ ଘଟଣା । ରାତି ପ୍ରାୟ ୯ଟା ବେଳେ ଡ୍ୟୁଟି ସାରି ଘରକୁ ଫେରୁଥିବା ଜଣେ ଯୁବତୀ ମଧ୍ୟ ଅସଦାଚରଣର ଶିକାର ହୋଇଥିଲେ । ଲୋକ ଲଜ୍ଜା ଓ ଚାକିରି ଯିବା ଭୟରେ ପୁଲିସର ଦ୍ୱାରସ୍ଥ ହୋଇନଥିଲେ ।
ଅଫିସ ବାହାରେ ଯୁବତୀଙ୍କୁ ଦୁଷ୍କର୍ମ ଉଦ୍ୟମ ଅଭିଯୋଗ
