ନୟାଗଡ଼, (ବାଘୁଆବାର୍ତ୍ତା ବ୍ୟୁରୋ): ନୟାଗଡ଼ ନିକଟସ୍ଥ ଇଟାମାଟି ଥାନା ଅଞ୍ଚଳରୁ ଜନୈକ ନାବାଳିକାକୁ ଅପହରଣ କରିବା ଯୁବକଙ୍କୁ ମହଙ୍ଗା ପଡିଛି । ଇଟାମାଟି ପୋଲିସ ଦ୍ୱାରା ଅନ୍ୟ ରାଜ୍ୟରୁ ଧରା ହୋଇଛନ୍ତି ଉଭୟ ଯୁବକ ଓ ନାବାଳିକା । ପରିଣାମ ସ୍ୱରୂପ ଯୁବକ ଜଣକୁ ଶେଷରେ ଜେଲ୍ ଯିବାକୁ ପଡିଛି । ପ୍ରକାଶଥାଉ କି, ଜନୈକ ନାବାଳିକା +୨ ପ୍ରଥମ ଶ୍ରେଣିରେ ଅଧ୍ୟୟନ କରୁଥିବା ବେଳେ ସେହି ଗ୍ରାମର ଯୁବକ ବସନ୍ତ ପାତ୍ର ଅପହରଣ କରିନେଇ ଯାଇଥିବା ପରିବାର ପକ୍ଷରୁ ଥାନାରେ ଅଭିଯୋଗ ହୋଇଥିଲା । ଅଭିଯୋଗ ପରେ ପୋଲିସ ଏକ ମାମଲା ରୁଜୁ କରିଥିଲା । ଗତ ମାର୍ଚ୍ଚ ୨୩ ତାରିଖ ବିଳମ୍ବିତ ରାତିରେ ଜନୈକ ଯୁବକ ନାବାଳିକାକୁ ଅପହରଣ କରି ଗୁଜୁରାଟ ରାଜ୍ୟର ସୁରଟ ସହରରେ ରଖିଥିଲା । ଖବରପାଇ ଇଟାମାଟି ପୋଲିସ ସୁରଟ ଯାଇ ସେଠାରେ ପୋଲିସ ସହାୟତାରେ ନାବାଳିକାକୁ ଉଦ୍ଧାର କରିବା ସହିତ ବସନ୍ତକୁ ଗିରଫ କରିଥିଲା । ଉଭୟଙ୍କୁ ଡାକ୍ତରୀ ମାଇନା କରାଯିବା ପରେ ନାବାଳିକାକୁ ଏକ ଆଶ୍ରମରେ ଛଡାଯାଇଛି । ଅପରପକ୍ଷରେ ଅଭିଯୁକ୍ତ ବସନ୍ତକୁ କୋର୍ଟ ଚାଲାଣ କରାଯାଇଛି ।
