୨୩ କୋଟି ଭାରତୀୟଙ୍କୁ ଗରିବ କଲାଣି ମହାମାରୀ, କାଙ୍ଗାଳ କରିଦେଲା କରୋନା

ନୂଆଦିଲ୍ଲୀ (ବାଘୁଆବାର୍ତ୍ତା): କୋଭିଡ ସଂକ୍ରମଣ ଆରମ୍ଭ ହେବାର ବର୍ଷକ ମଧ୍ୟରେ ପ୍ରାୟ ୨୩ କୋଟି ଭାରତୀୟ ଗରିବ ହୋଇସାରିଲାଣି । ଏହି ସମୟରେ ସହରାଞ୍ଚଳ ଦାରିଦ୍ର୍ୟ ହାର ୨୦% ବଢ଼ିଥିବା ବେଳେ ଗ୍ରାମାଞ୍ଚଳରେ ଏହା ୧୫% ବୃଦ୍ଧି ପାଇଛି । ଆଜି ପ୍ରେମଜି ୟୁନିଭର୍ସିଟି ଦ୍ୱାରା ପ୍ରସ୍ତୁତ ଏକ ରିପୋର୍ଟରେ ଏହା କୁହାଯାଇଛି । ରିପୋର୍ଟରେ ଦର୍ଶାଯାଇଛି ଯେ କୋଭିଡ-୧୯ର ମୁକାବିଲା ପାଇଁ ଲକଡାଉନ ଲାଗୁ କରାଯାଇଛି । ଏହାଦ୍ୱାରା ଯାତାୟତ ପ୍ରଭାବିତ ହେବାରୁ ଲୋକଙ୍କ ଆୟ ହ୍ରାସ ପାଇଛି । ସର୍ବୋପରି ଅର୍ଥନୈତିକ କାର୍ଯ୍ୟକଳାପ ସଂକୁଚିତ ହୋଇଛି । ଯାତାୟତ ୧୦% ହ୍ରାସ ପାଇବା ଯୋଗୁ ଆୟ ୭.୫ % ସଂକୁଚିତ ହୋଇଛି । ଶ୍ରମ ବଜାର ବାବଦରେ ରିପୋର୍ଟ କହିଛି ଯେ ୨୦୨୦ ଶେଷସୁଦ୍ଧା ପ୍ରାୟ୧.୫ କୋଟି ଶ୍ରମିକ ଜୀବିକା ହରାଇ ବସିଛନ୍ତି । ପାରିବାରିକ ଆୟ ମଧ୍ୟ ଅନେକାଂଶରେ ପ୍ରଭାବିତ ହୋଇଛି । ୨୦୨୦ ଅକ୍ଟୋବରରେ ମୁଣ୍ଡ ପିଛା ହାରାହାରି ମାସିକ ପାରିବାରିକ ଆୟ ୪,୯୭୯ ଟଙ୍କାକୁ ହ୍ରାସ ପାଇଛି, ଯାହା ସେହିବର୍ଷ ଜାନୁଆରୀରେ ୫,୯୮୯ ଟଙ୍କା ରହିଥିଲା ।