ଗର୍ଜିଲେ ମମତା, କହିଲେ ଆମେ କ’ଣ କାଠ ପୁତୁଳା, ପ୍ରଧାନମନ୍ତ୍ରୀଙ୍କ ସମୀକ୍ଷା ବୈଠକ

କୋଲକତା (ବାଘୁଆବାର୍ତ୍ତା): ଦେଶରେ କରୋନା ସ୍ଥିତିର ସମୀକ୍ଷା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ଦେଶର ୧୦ ରାଜ୍ୟ ୫୪ ଜିଲ୍ଲାପାଳଙ୍କ ସହ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି । ଏଥିରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ଯୋଗ ଦେଇଥିଲେ । ମାତ୍ର ବୈଠକ ପରେ ମମତା ବାନାର୍ଜୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧରେ ବଡ଼ ଅଭିଯୋଗ ଆଣିଛନ୍ତି । ମମତା ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ପ୍ରଧାନମନ୍ତ୍ରୀ ଆମକୁ କହିବାକୁ ମଧ୍ୟ ଦେଲେ ନାହିଁ । ଗଣମାଧ୍ୟମରେ ନିଜର ଅସନ୍ତୋଷ ବ୍ୟକ୍ତ କରି ମମତା କହିଛନ୍ତି, ବୈଠକକୁ ସମସ୍ତ ମୁଖ୍ୟମନ୍ତ୍ରୀଙ୍କୁ ଡକାଯାଇଥିଲା, ହେଲେ କାହାରିକୁ କିଛି କହିବାକୁ ଦିଆଗଲା ନାହିଁ । ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀଙ୍କୁ କହିବାକୁ ସୁଯୋଗ ଦିଆଗଲା । ଆମକୁ କହିବାକୁ ଥରୁଟିଏ ବି ସୁଯୋଗ ଦିଆଗଲା ନାହିଁ । ଆଲୋଚନା ବେଳେ ଆମେ ନିଜକୁ ଅପମାନିତ ଅନୁଭବ କରୁଥିଲୁ । ୧୦ ରାଜ୍ୟର ଜିଲ୍ଲାପାଳଙ୍କ ସହ ପ୍ରଧାନମନ୍ତ୍ରୀଙ୍କ ବୈଠକରେ ଅନ୍ୟ କିଛି ମୁଖ୍ୟମନ୍ତ୍ରୀଙ୍କ ସହିତ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସାମିଲ ଥିଲେ । ମମତା କହିଛନ୍ତି, ଏହା ଦୁର୍ଭାଗ୍ୟପୂର୍ଣ୍ଣ ଯେ, ମୁଖ୍ୟମନ୍ତ୍ରୀ ମାନଙ୍କୁ ବୈଠକକୁ ଡକାଇ ଦେଲେ । ମାତ୍ର ନା ଆମ ସହ କିଛି ଆଲୋଚନା କଲେ ନା କିଛି କହିବାକୁ ବୈଠକକୁ ଡକାଇ ଦେଲେ । ମାତ୍ର ନା ଆମ ସହ କିଛି ଆଲୋଚନା କଲେ ନା କିଛି କହିବାକୁ ଦେଲେ । ମୁଖ୍ୟମନ୍ତ୍ରୀଙ୍କୁ ବୈଠକରେ କାଠପୁତୁଳା କରି ରଖି ଦିଆଗଲା । ପ୍ରଧାନମନ୍ତ୍ରୀ ଛୋଟ ଭାଷଣ ଦେଇ ବୈଠକ ସାରି ଦେଲେ । ଏହା ଗୋଟିଏ ପ୍ରକାରର ସାଧାରଣ ମିଟିଂ ଥିଲା ବୋଲି ମମତା କହିଛନ୍ତି । ସେ କହିଛନ୍ତି, ଆମକୁ ଅପମାନିତ କରାଗଲା । ପ୍ରଧାନମନ୍ତ୍ରୀ ଅକ୍ସିଜେନ କିମ୍ବା ରେମଡେସିଭିର ସମସ୍ୟାକୁ ନେଇ କିଛି ବି ପଚାରିନଥିଲେ । ଏପରିକି ବ୍ଲାକ ଫଙ୍ଗସ ବିଷୟରେ ମଧ୍ୟ ଆମକୁ ପଦୁଟିଏ ମଧ୍ୟ ପଚାରିଲେ ନାହିଁ । ମୁଁ ବୈଠକରେ ପଶ୍ଚିମବଙ୍ଗରେ ଭ୍ୟାକ୍ସିନ ଅଭାବ ପ୍ରସଙ୍ଗ ଉଠାଇବାକୁ ଚାହୁଁଥିଲି ଏବଂ ଅଧିକ ଭ୍ୟାକ୍ସିନ ଯୋଗାଇବା ପାଇଁ ଦାବି କରିବାକୁ ଚାହୁଁଥିଲି । ମାତ୍ର ଆମକୁ କହିବାକୁ ମଧ୍ୟ ଦିଆଗଲା ନାହିଁ ।