ବାପାଙ୍କ ସ୍ମୃତି ପାଇଁ ପୁଅ କଲେନି ଦଶାହ କାର୍ଯ୍ୟ, ୧୧ ଦିନ ବାଣ୍ଟିବେ ମାଗଣା ଔଷଧ

ସମ୍ବଲପୁର (ବାଘୁଆବାର୍ତ୍ତା): ରାଜ୍ୟରେ କୋଭିଡ କଳାବାଦଲ କାୟା ମେଲାଇ ଚାଲିଥିବା ବେଳେ ସମ୍ବଲପୁରରେ ଏକ ବିରଳ ଉଦାହରଣ ସୃଷ୍ଟି କରିଛନ୍ତି ଜଣେ ଯୁବକ । ମୃତକଙ୍କ ପାଇଁ କିଏ ବ୍ରାହ୍ମଣ ଭୋଜନ ଦିଅନ୍ତି ତ କିଏ ଗଙ୍ଗା ଯାଇ ବୁଡ ପକାନ୍ତି । କିଏ ବନ୍ଧୁବାନ୍ଧବଙ୍କୁ ନୂଆ ଲୁଗା ବାଣ୍ଟନ୍ତି ତ କିଏ ମୃତକଙ୍କ ସ୍ମୃତିରେ ମୂର୍ତ୍ତି ନିର୍ମାଣ କରନ୍ତି । ତେବେ ବାପାଙ୍କ ମୃତ୍ୟୁ ପରେ ଶୁଦ୍ଧିକାର୍ଯ୍ୟରେ ଅଯଥା ଅର୍ଥ ଅପଚୟ ନକରି ୧୦ ଦିନଯାଏଁ ମାଗଣା ଔଷଧ ବାଣ୍ଟିବାକୁ ନିଷ୍ପତି ନେଇଛନ୍ତି ସମ୍ବଲପୁରର ଅକ୍ଷୟ ନାୟକ । ସମ୍ବଲପୁରର ପରମାଣପୁରରେ ଗଣେଶ ନାୟକଙ୍କ ପରିବାର ରୀତିକା ମେଡିକାଲ ଷ୍ଟୋର ନାମରେ ଏକ ଔଷଧ ଦୋକାନ ଖୋଲି ଗୁଜୁରାଣ ମେଣ୍ଟାନ୍ତି । ୪ ଦିନ ତଳେ ଗଣେଶ ନାୟକଙ୍କର ହଠାତ ମୃତ୍ୟୁ ହୋଇଥିଲା । ଏହା ପରେ ବାପାଙ୍କୁ ପ୍ରକୃତ ଶ୍ରଦ୍ଧାଞ୍ଜଳି ଦେବା ଲାଗି ଏକ ହାର୍ଦ୍ଧିକ ନିଷ୍ପତ୍ତି ନେଇଛନ୍ତି ପୁତ୍ର ଅକ୍ଷୟ କୁମାର ନାୟକ । ନିଜ ଔଷଧ ଦୋକାନ ଆଗରେ ସେ ଏକ ପୋଷ୍ଟର ଲଗାଇ ବାପାଙ୍କ ମୃତ୍ୟୁର ତ୍ରୟଦଶ ଦିନ ଯାଏଁ ମାଗଣା ଔଷଧ ଦେବାକୁ ଘୋଷଣା କରିଛନ୍ତି । ମେ ୧୪ ତାରିଖରୁ ୨୪ ତାରିଖ ଯାଏଁ ୧୧ ଦିନ ଯେ କେହି ତାଙ୍କ ଔଷଧ ଦୋକାନରୁ ମାଗଣା ଔଷଧ କିଣିପାରିବେ ବୋଲି ସେ ପୋଷ୍ଟରରେ ଲେଖିଛନ୍ତି । ବାପାଙ୍କ ଆତ୍ମାର ସଦଗତି ପାଇଁ ଏହି ସେବା କରିବାର ସୁଯୋଗ ଦିଅନ୍ତୁ ବୋଲି ସ୍ଥାନୀୟ ବାସିନ୍ଦାଙ୍କୁ ଅନୁରୋଧ କରିଛନ୍ତି ଅକ୍ଷୟ । କୋଭିଡ ସମୟରେ ଔଷଧ ଏବେ ସବୁଠୁ ଜରୁରୀ ପାଲଟିଥିବା ବେଳେ ଅକ୍ଷୟଙ୍କ ଏ ଉଦ୍ୟମକୁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟିଛି ।