ସ୍ମାର୍ଟ ଫୋନ ନଥିବାରୁ ପାଠପଢ଼ାରୁ ବଂଚିତ ଥିଲା ବେଳେ ସାମାଜିକ ସଂଗଠନ ‘ମେ ଆଇ ହେଲ୍ପ ୟୁ’ ପିଲାମାନଙ୍କୁ ପାଠ ପଢ଼ାଉଛନ୍ତି

ଜଳେଶ୍ୱର, (ବାଘୁଆବାର୍ତ୍ତା): କରୋନା ପାଇଁ ଦେଢ଼ ବର୍ଷରୁ ଉର୍ଦ୍ଧ୍ୱ ସମୟ ଧରି ସ୍କୁଲ ଅଙ୍ଗନୱାଡି ବନ୍ଦ ରହିଛି । ସ୍ମାର୍ଟ ଫୋନ ନଥିବାରୁ ଆଦିବାସୀ ସାହିରେ ପିଲାମାନେ ପାଠପଢ଼ାରୁ ବଂଚିତ ଥିଲା ବେଳେ ସାମାଜିକ ସଂଗଠନ ‘ମେ ଆଇ ହେଲ୍ପ ୟୁ’ ପିଲାମାନଙ୍କୁ ସାହି ସାହି ବୁଲି ପାଠ ପଢ଼ାଉଛନ୍ତି । ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକ ଗୋବରଘାଟା ପଞ୍ଚାୟତର ଚନ୍ଦନା ଗ୍ରାମର କୃଷ୍ଣ ନଗର ଆଦିବାସୀ ସାହିରେ ଏହି ସେବା ଯୋଗାଇ ଦେଇଛି ସଂଗଠନ । ପାଠପଢା ବନ୍ଦ ଥିବାରୁ ଖେଳ କୁଦ କରିବା ସହିତ ଗାଈଗୋରୁ ଚରାଉ ଛନ୍ତି ପିଲାମାନେ । ଏହାକୁ ଦେଖି ଜଳେଶ୍ୱର ସହରରେ ଥିବା ଏହି ସାମାଜିକ ସଂଗଠନର ସଦସ୍ୟମାନେ ସାହିର ପିଲାମାନଙ୍କୁ ଏକଜୁଟ କରି ଗଛମୂଳେ ପାଠ ପଢ଼ାଉଛନ୍ତି । ଏହି କାର୍ୟ୍ୟକ୍ରମ ସବୁ ଦିନ ସକାଳ ସମୟରେ ସଂଗଠନର ସଦସ୍ୟମାନଙ୍କ ଦ୍ଵାରା ଜାରି ରହିଛି । ପାଠପଢା ସହିତ ବ୍ୟୟାମ, ଯୋଗ, ସାଧାରଣଜ୍ଞାନ ଆଦି ଶିକ୍ଷା ଦିଆଯିବା ସହିତ ପିଲାମାନଙ୍କୁ ଜଳଖିଆ ମଧ୍ୟ ପ୍ରଦାନ କରାଯାଉଛି । ଫଳରେ ପିଲାମାନେ ଖେଳକୁଦ ଛାଡି ଏବେ ଆନନ୍ଦ ସହକାରରେ ପାଠ ପଢୁଛନ୍ତି ।