ଭୁବନେଶ୍ବର, (ବାଘୁଆବାର୍ତ୍ତା): ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ପ୍ରତିକ୍ରିୟା ଉପରେ ପ୍ରତିକ୍ରିୟା ରଖିଛନ୍ତି ବିଜେଡି ବରିଷ୍ଠ ଉପ ସଭାପତି ଦେବୀ ମିଶ୍ର । ସେ କହିଛନ୍ତି, ଗାଁ ଲୋକଙ୍କ ସହ ସବୁବେଳେ ରହି ଆସିଛି ବିଜେଡି । ବିଜେପି ବର୍ତ୍ତମାନ ଗାଁକୁ ଯିବା କଥା ଚିନ୍ତା କରୁଛି । କିନ୍ତୁ ବିଜେଡି ସବୁବେଳେ ଗାଁର ଲୋକମାନଙ୍କ ସହ ରହିଛି । ଓଡ଼ିଶାର ଜନତା ନବୀନ ପଟ୍ଟନାୟକଙ୍କୁ ବାରମ୍ବାର ଆର୍ଶୀବାଦ ଦେଇ ଆସିଛନ୍ତି । ପାଞ୍ଚ ପାଞ୍ଚ ଥର ନିର୍ବାଚନରେ ତାହା ପ୍ରତିଫଳିତ ହୋଇଛି । ଆଗାମୀ ନିର୍ବାଚନରେ ଆମେ ସେହି ସଫଳତା ପାଇବୁ । ଯିଏ ଯେଉଁ ରଣନୀତି କଲେ କି ଯେତେ ଅଙ୍କ କଷିଲେ ବି ତାହା କାମ କରିବନି । ସେପଟେ ଦିଲ୍ଲୀରେ କେନ୍ଦ୍ରୀୟ ନେତୃତ୍ଵଙ୍କୁ ଭେଟି ଫେରିବା ପରେ ପ୍ରତିକ୍ରିୟା ରଖିଥିଲେ ଓଡିଶା ବିଜେପି ରାଜ୍ୟ ସଭାପତି ମନମୋହନ ସାମଲ । ସେ କହିଥିଲେ, କେନ୍ଦ୍ରୀୟ ନେତୃତ୍ଵଙ୍କର ବିଭିନ୍ନ ପ୍ରସଙ୍ଗରେ ଆଲୋଚନା ହୋଇଛି । ପୁଣି ଦିଲ୍ଲୀ ଗସ୍ତରେ ଯାଇ କେନ୍ଦ୍ରୀୟ ନେତୃତ୍ଵଙ୍କୁ ଭେଟିବେ ବୋଲି ମନମୋହନ ସୂଚନା ଦେଇଥିଲେ । ଗାଁକୁ ଯିବା ପାଇଁ କେନ୍ଦ୍ରୀୟ ନେତୃତ୍ଵଙ୍କ ନିର୍ଦ୍ଦେଶ ରହିଛି । ନିଜର ଏବଂ ପାଖ ପଞ୍ଚାୟତ ଯିବାକୁ କେନ୍ଦ୍ରୀୟ ନେତୃତ୍ୱ ଟାସ୍କ ଦେଇଥିଲେ । ୧୨ ଶହ ପାଖାପାଖି ପଞ୍ଚାୟତ ଗସ୍ତ ସାରିଲାଣି । ବାକି ୫ହଜାର ପଞ୍ଚାୟତଗୁଡ଼ିକୁ ଶୀଘ୍ର ଗସ୍ତ କରିବେ ସାଂସଦ, ବିଧାୟକ, ପଦାଧିକାରୀ ଏବଂ କାର୍ୟ୍ୟକର୍ତ୍ତା । ଶୀର୍ଷ ନେତୃତ୍ଵଙ୍କ ଠାରୁ ଆରମ୍ଭ କରି ସାଧାରଣ କାର୍ୟ୍ୟକର୍ତ୍ତା ପର୍ୟ୍ୟନ୍ତ ପଞ୍ଚାୟତ ଗସ୍ତରେ ଯିବେ । ତୃଣମୂଳ ସଙ୍ଗଠନ ସୁଦୃଢ଼ କରିବା ପାଇଁ ନିର୍ଦ୍ଦେଶ ଦେଇଛନ୍ତି କେନ୍ଦ୍ରୀୟ ନେତୃତ୍ୱ । ଲୋକ ଚାହୁଁଛନ୍ତି ଡବଲ୍ ଇଞ୍ଜିନ ସରକାର ହେବ, ବିଜେପି ସରକାର କରିବ ବୋଲି ମନମୋହନ ସାମଲ କହିଥିଲେ ।
ମନମୋହନଙ୍କୁ କଡ଼ା ଜବାବ ଦେଲେ ଦେବୀ ମିଶ୍ର
