ନୟାଗଡ଼, (ବାଘୁଆବାର୍ତ୍ତା): ଜିଲ୍ଲରେ କରୋନା କଟକଣା ଚଳିତ ମାସ ଆରମ୍ଭରୁ ସଂମ୍ପୂର୍ଣ୍ଣ କୋହଳ ହୋଇଛି । ଫଳରେ ଅନେକ ଲୋକ ପେଟପାଟଣା ପାଇଁ ଲାଗି ପଡ଼ିଥିବା ଜଣାଯାଇଛି । ଫଳରେ ନୟାଗଡ଼ ସହରକୁ ଆସି ଗାଁର ଶ୍ରମିକମାନେ ମଣିଷ ହାଟରେ ନିତି ଭିଡ଼ ଜମାଇଲେଣି । ସୂଚନାନୁସାରେ, ବର୍ଷା ଋତୁରେ ଧାନ ଚାଷ ଆରମ୍ଭ ହେବା ପରେ ଚାଷୀ ତତ୍ପର ହେଉ ଉଠୁଥିବା ବେଳେ ଶୀତ ଋତୁରେ ଧାନ ଅମଳ ପରେ ନିଜ ମୁଣ୍ଡରୁ ବୋଝ ଓହ୍ଲାଇ ଥାଏ । ଧାନ ରୂଆ, ବେଉସା ଶେଷ ହେବା ପରେ ଏବେ ଲୋକଙ୍କ ପାଖରେ ଆଉ କାମ ନାହିଁ । ଫଳରେ ଚାଷକାର୍ଯ୍ୟ ହାତରୁ ଶେଷ ହୋଇଥିବାରୁ ଗାଁ ଗହଳୀର ଲୋକେ ଏବେ କାମ ଖୋଜିବା ପାଇଁ ସହରମୁହାଁ ହୋଇଛନ୍ତି । ଫଳରେ ପ୍ରତ୍ୟେକ ଦିନ ସକାଳୁ ନୟାଗଡ଼ ଟ୍ରାଫିକ ଛକ ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ସାମନା ମଣିଷ ହାଟରେ ଭିଡ଼ ଜମୁଛି । ନୟାଗଡ଼ ସଦର ବ୍ଲକ ଅନ୍ତର୍ଗତ କ୍ରିଦାଶପୁର, ଲକ୍ଷ୍ମୀପ୍ରସାଦ, ଭାଟସାହି, କଇଥଗାଡ଼ିଆ, ଲାଠିପଡ଼ା ପ୍ରଭୃତି ଅଂଚଳର ଲୋକମାନେ ପେଟକୁ ମୁଠାଏ ଦାନା ସହ ପରିବାର ପ୍ରତିପୋଷଣ ପାଇଁ ଏଠାରେ ସକାଳ ସାତଟା ସୁଦ୍ଧା ପହଂଚି ଯାଆନ୍ତି । ସମସ୍ତଙ୍କ ହାତରେ ମଧ୍ୟାହ୍ନ ଖାଇବା ଟିଫିନ ସହ, କିଛି କିଛି ନିର୍ମାଣ ସାମଗ୍ରୀ ଥାଏ । କାହା ହାତରେ ଝୁଡ଼ି, କୋଡ଼ି, ଶାବଳ ରହିଥାଏ ସେ ମାଟି କାମ କରି ପାରିବ ବୋଲି ବୁଝାପଡ଼େ । ସେହିଭଳି ନିର୍ମାଣ ସାମଗ୍ରୀ ଧରିଥିବା ଲୋକ ଶ୍ରମିକ ନତୁବା କାଠ କାରିଗର ବୋଲି ଜଣାପଡ଼େ । ସବୁଦିନ ସକାଳୁ ଏହି ସ୍ଥାନରେ ଶ୍ରମିକ, ରାଜମିସ୍ତ୍ରୀ, ହେଲପର, କାଠ କାରିଗରଙ୍କ ଠାରୁ ଆରମ୍ଭ କରି ଅନେକ ନିର୍ମାଣ ଶ୍ରମିକ ଏବଂ କୁଶଳୀ କାରିଗର ରୁଣ୍ଡ ହୁଅନ୍ତି । କେଉଁ ବାବୁଙ୍କର ଅଥବା ଠିକାଦାରଙ୍କର କାମ ହେବ ସେମାନେ ଏଠାକୁ ଆସି ଶ୍ରମିକଙ୍କ ସହ ମୂଲଚାଲ କରିବା ସହ କାମକୁ ନେଇଥାନ୍ତି । ପ୍ରତ୍ୟେକ ଦିନ ସକାଳୁ ଏଠାରେ ଏବେ ନୂଆ ମୁହଁ ଦେଖିବାକୁ ମିଳୁଛି । ଯେଉଁମାନେ ଗାଁରେ ଚାଷ କାର୍ଯ୍ୟ କରୁଥିଲେ ଅଥବା ଚାଷ କାର୍ଯ୍ୟରେ ଶ୍ରମଦାନ କରୁଥିଲେ ସେମାନେ ଏବେ କାମ ନଥିବାରୁ ମଣିଷହାଟରେ ପହଂଚୁଛନ୍ତି । ସକାଳ ସାତଟାରୁ ଏହି ମଣିଷହାଟ ଆରମ୍ଭ ହୋଇ ଦିନ ଦଶଟା ଯାଏଁ ଚାଲୁଛି । ଯାହାକୁ ଦିନ ଦଶଟା ଭିତରେ କାମ ମିଳିଲା ସେ ଦିନତମାମ କାମ କରି ହାତରେ ଦି ପଇସା ନେଇ ଘରକୁ ଫେରୁଛି । ମାତ୍ର ଯେଉଁମାନଙ୍କୁ ମଣିଷହାଟରେ କାମ ମିଳିଲା ନାହିଁ ସେ ମନଦୁଃଖରେ ଦଶଟା ପରେ ଘରକୁ ଫେରୁଛି । ନୟାଗଡ଼ରେ ଯଦି ଶିଳ୍ପ ସୃଷ୍ଟି ହୋଇପାରନ୍ତା ତେବେ ପେଟ ପାଇଁ ଆମକୁ ରାସ୍ତାକଡ଼ରେ ଛିଡ଼ା ହେବାକୁ ପଡ଼ନ୍ତା ନାହିଁ ବୋଲି ଅନ୍ୟ ଜଣେ କହିଛନ୍ତି । ଅନ୍ୟପକ୍ଷେ, ଏହି ଶ୍ରମିକମାନଙ୍କୁ ଅନେକ ସମୟରେ ହଇରାଣ କରାଯାଉଥିବା ନେଇ ଅଭିଯୋଗ ମଧ୍ୟ ଆସୁଛି । କୋଭିଡ୍ କଟକଣା ନାମରେ କିଛି ପୁଲିସ ସେମାନଙ୍କୁ ବାରମ୍ବାର ନାଲି ଆଖି ଦେଖାଉଥିବା ନେଇ ଶ୍ରମିକମାନେ ମତ ଦେଉଛନ୍ତି ।
