ନୟାଗଡ଼, (ବାଘୁଆବାର୍ତ୍ତା) : ନୟାଗଡରୁ ମାଲେସିଆ ଯାଇ ୫ଜଣ ଶ୍ରମିକ ଫସିବା ଘଟଣାରେ ପୁଲିସ ୩ ଜଣଙ୍କୁ ଗିରଫ କରିଛି । ସୂଚନାନୁସାରେ, ନୟାଗଡ଼ ଜିଲ୍ଲା ରଣପୁର ଥାନା ଅନ୍ତର୍ଗତ ଲଡ଼ୁକେଶରପ୍ରସାଦ ଲକ୍ଷ୍ମୀଧର ପ୍ରଧାନ, ଅରୁଣ ପ୍ରଧାନ, କୁଶ ବେହେରା, ଆଲୋକ ବେହେରା ଓ ଡମ୍ବୁରଧର ସ୍ୱାଇଁ ଦଲାଲ ମାଧ୍ୟମରେ ଗତମାସ ମାଲେସିଆ ଯାଇଥିଲେ । ମାଲେସିଆଲର କ୍ୱାଲାଲାମ୍ପୁରରେ ରହିଥିବା ଏକ ମଲ୍ରେ କାମ କରିବା ପାଇଁ ଶରଣକୂଳ ଥାନା ହରିହରପୁର ଗ୍ରାମର ରବିନ୍ଦ୍ର ପାଢ଼ୀ ଶ୍ରମିକମାନଙ୍କୁ ପ୍ରଲୋଭିତ କରିଥିଲେ । ଯିବା ପାଇଁ ଭିସା ଏବଂ ପାସପୋର୍ଟ ବାବଦକୁ ରବିନ୍ଦ୍ର ପ୍ରତ୍ୟେକ ଲୋକଙ୍କଠାରୁ ୬୦ ହଜାର ଟଙ୍କା ଲେଖାଁଏ ଅଗ୍ରୀମ ନେଇଥିଲେ । ଏହି ଘଟଣାରେ ପରିବାରର ଅଭିଯୋଗ କ୍ରମେ ରଣପୁର ପୁଲିସ ଏକ ମାମଲା ରୁଜୁ କରିବା ସହ ମୁଖ୍ୟ ଅଭିଯୁକ୍ତ ରବିନ୍ଦ୍ର ପାଢ଼ୀଙ୍କ ତିନିଜଣ ସହଯୋଗୀକୁ ଗିରଫ କରି କୋର୍ଟ ଚାଲାଣ କରିଛି । ସେମାନେ ହେଲେ ଓଡ଼ଗାଁ ଥାନା କୋମଣ୍ଡ ଗ୍ରାମର ଶତ୍ରୃଘ୍ନ ବେହେରା, ଗୈାଡ଼ପୁଟ ଗ୍ରାମର ପ୍ରଫୁଲ ପ୍ରଧାନ, ଶରଣକୂଳ ଥାନା କରଡ଼ା ଶାସନ ଗ୍ରାମର ଦୀନବନ୍ଧୁ ପ୍ରଧାନ । ଏଥିସହିତ ପୁଲିସ ରବିନ୍ଦ୍ର ପାଢ଼ୀ ଏବଂ ତାଙ୍କ ସ୍ତ୍ରୀ ସୂରଧୂନୀ ପଣ୍ଡାଙ୍କ ନାମରେ ମଧ୍ୟ ମାମଲା ରୁଜୁ କରିଛି । ଏଠାରେ ପ୍ରକାଶ ଥାଉ କି, ନୟାଗଡ଼ ଜିଲ୍ଲାରେ ଯୁବକ ଯୁବତୀ ମାନଙ୍କୁ ପ୍ରଲୋଭିତ କରି ଠକେଇ କରିବା ପାଇଁ ଏକ ବଡ଼ ର୍ୟାକେଟ କାମ କରୁଛି ।
