ଫେରିବା ପାଇଁ ଚାଲିଛି ପ୍ରସ୍ତୁତି
ନୟାଗଡ଼, (ବାଘୁଆବାର୍ତ୍ତା) : ନୟାଗଡରୁ ମାଲେସିଆ ଯାଇ ୫ଜଣ ଶ୍ରମିକ କେଉଁ ଅବସ୍ଥାରେ ପଡ଼ିରହିଛନ୍ତି ତାହାର ଭିଡିଓ ‘ବାଘୁଆବାର୍ତ୍ତା’ର ହସ୍ତଗତ ହୋଇଛି । ସୂଚନାନୁସାରେ, ନୟାଗଡ଼ ଜିଲ୍ଲା ରଣପୁର ଥାନା ଅନ୍ତର୍ଗତ ଲଡ଼ୁକେଶରପ୍ରସାଦ ଲକ୍ଷ୍ମୀଧର ପ୍ରଧାନ, ଅରୁଣ ପ୍ରଧାନ, କୁଶ ବେହେରା, ଆଲୋକ ବେହେରା ଓ ଡମ୍ବୁରଧର ସ୍ୱାଇଁ ଦଲାଲ ମାଧ୍ୟମରେ ଗତମାସ ମାଲେସିଆ ଯାଇଥିଲେ । ମାଲେସିଆଲର କ୍ୱାଲାଲାମ୍ପୁରରେ ରହିଥିବା ଏକ ମଲ୍ରେ କାମ କରିବା ପାଇଁ ଶରଣକୂଳ ଥାନା ହରିହରପୁର ଗ୍ରାମର ରବିନ୍ଦ୍ର ପାଢ଼ୀ ଶ୍ରମିକମାନଙ୍କୁ ପ୍ରଲୋଭିତ କରିଥିଲେ । ଯିବା ପାଇଁ ଭିସା ଏବଂ ପାସପୋର୍ଟ ବାବଦକୁ ରବିନ୍ଦ୍ର ପ୍ରତ୍ୟେକ ଲୋକଙ୍କଠାରୁ ୬୦ ହଜାର ଟଙ୍କା ଲେଖାଁଏ ଅଗ୍ରୀମ ନେଇଥିଲେ । ଏହି ଘଟଣାରେ ଶ୍ରମିକଙ୍କ ପରିବାରର ଅଭିଯୋଗ କ୍ରମେ ରଣପୁର ପୁଲିସ ଏକ ମାମଲା ରୁଜୁ କରିବା ସହ ମୁଖ୍ୟ ଅଭିଯୁକ୍ତ ରବିନ୍ଦ୍ର ପାଢ଼ୀଙ୍କ ତିନିଜଣ ସହଯୋଗୀକୁ ଗିରଫ କରି କୋର୍ଟ ଚାଲାଣ କରିଛି । ଏବେବି ମୁଖ୍ୟ ଅଭିଯୁକ୍ତ ରବିନ୍ଦ୍ର ପାଢ଼ୀ ଏବଂ ତାଙ୍କ ସ୍ତ୍ରୀ ସୂରଧୂନୀ ପଣ୍ଡା ଫେରାର ଥିବା ବେଳେ ମାଲେସିଆରେ ରହିଥିବା ଶ୍ରମିକମାନେ ଦୟନୀୟ ଅବସ୍ଥାରେ ରହିଛନ୍ତି । ତାଙ୍କୁ ସ୍ୱଦେଶ ଫେରାଇ ଆଣିବା ପାଇଁ ଭାରତୀୟ ଦୂତବାସା ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି ଚାଲିଥିବା ଜଣାପଡ଼ିଛି ।
