ନୟାଗଡ଼,(ବାଘୁଆବାର୍ତ୍ଥା): ମଧୁ ବାବୁଙ୍କ ଜନ୍ମଦିନ ଅବସରରେ ଆଇନଜୀବୀ ଦିବସ ତଥା ସ୍ୱାଭିମାନ ଦିବସ ଜିଲ୍ଲା ଓକିଲ ସଂଘ ତରଫରୁ ପାଳିତ ହୋଇଛି । ନୟାଗଡ଼ ଜିଲ୍ଲା ନ୍ୟାୟାଧୀଶ ଆନନ୍ଦ ନାରାୟଣ ମହାରଣା ମୁଖ୍ୟ ଅତିଥି ଭାବେ ଯୋଗ ଦେଇ ଥିବା ବେଳେ ଅନ୍ୟ ସମସ୍ତ ବିଚାରପତିମାନେ ଏହି କାର୍ୟ୍ୟକ୍ରମରେ ଯୋଗ ଦେଇଥିଲେ । ଜିଲ୍ଲା ଓକିଲ ସଂଘର ସଭାପତି ରଣଜିତ ଦାସ ସଭାରେ ସଭାପତିତ୍ବ କରିଥିଲେ ଓ ସମ୍ପାଦକ ସ୍ବଦେଶ ମିଶ୍ର କାର୍ୟ୍ୟକ୍ରମକୁ ପରିଚାଳନା କରିଥିଲେ । ମଧୁ ବାବୁଙ୍କ ଜୀବନ କାହାଣୀ ଉପରେ ଗଭୀର ଆଲୋକପାତ କରିଥିଲେ ପ୍ରାକ୍ତନ ଅଧ୍ୟକ୍ଷ ଅଶୋକ କୁମାର ନାୟକ, ଡ଼ଃ କୈଳାଶ ଚନ୍ଦ୍ର ବାଣ୍ଠ, ଡ଼ଃ ଆଶୁତୋଷ ମିଶ୍ର । ମୁଖ୍ୟ ଅତିଥି ଜିଲ୍ଲା ଜଜ ମଧୁ ବାବୁ ଜନ୍ମ ନେଇଥିବା ଏନ୍ତୁଡ଼ିଶାଳ ପରିଦର୍ଶନର ବର୍ଣ୍ଣନା ସମସ୍ତଙ୍କ ହୃଦୟକୁ ଛୁଇଁଥିଲା । ସମ୍ପାଦକ ସ୍ବଦେଶ ମିଶ୍ର ମଧୁ ବାବୁଙ୍କ ନୀତିଆଦର୍ଶରେ ଅନୁପ୍ରାଣିତ ହେବା ପାଇଁ ଆହ୍ୱାନ ଦେଇଥିଲେ । ବକୃତା ପ୍ରତିଯୋଗିତାରେ ଭାଗନେଇ ଉଭୟ ଇଂରାଜୀ ଓ ଓଡ଼ିଆରେ ପ୍ରଥମ ସ୍ଥାନ ଅଧିକାର କରିଥିବା ଶ୍ରୀ ରାମକୃଷ୍ଣ ଆଦର୍ଶ ଶିକ୍ଷାକେନ୍ଦ୍ରର ଶିଶୁ ପ୍ରତିଭା ଛାତ୍ରୀ ବିଶ୍ୱବିଜିତା ମହାନ୍ତି ଓଜସ୍ୱିନୀ ଭାଷଣ ଦ୍ୱାରା ସମସ୍ତଙ୍କ ମନକୁ ଜିଣିପାରିଥିଲେ । ନଗଦ ଅର୍ଥରାଶି ପୁରସ୍କାର ପ୍ରଦାନ କରିଥିଲେ ବରିଷ୍ଠ ଆଇନଜୀବୀ ଦଣ୍ଡପାଣି ସ୍ୱାଇଁ ପ୍ରମାଣପତ୍ର ଓ ଟ୍ରଫି ପ୍ରଦାନ କରିଥିଲେ । ଜିଲ୍ଲା ନ୍ୟାୟାଧୀଶ ଶ୍ରୀଯୁକ୍ତ ମହାରଣା ବକୃତା ପ୍ରତିଯୋଗିତାରେ ଅନ୍ୟ ସମସ୍ତ ପ୍ରତିଯୋଗୀଙ୍କୁ ପ୍ରମାଣପତ୍ର ଓ ଟ୍ରଫି ପ୍ରଦାନ କରାଯାଇଥିଲା । ଉପସଭାପତି ଶ୍ରୀ ସନ୍ତୋଷ କୁମାର ରାଉତରାୟ ଧନ୍ୟବାଦ ଅର୍ପଣ କରିଥିଲେ ।
