ବିପୁଳ ପରିମାଣର ସୁନା ଓ ରୂପା ଅଳଙ୍କାର ଜବତ
ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଚାନ୍ଦପୁର ପୁଲିସ ଦୁଇ ଜଣ ବଙ୍ଗୀୟ ମହିଳାଙ୍କୁ ଗିରଫ କରିବା ସହ ବିପୁଳ ପରିମାଣର ସୁନା ଓ ରୂପା ଅଳଙ୍କାର ଜବତ କରିଛି । ମହିଳା ଦୁଇ ଜଣ ପଶ୍ଚିମ ବଙ୍ଗ ମେଦିନପୁର ଅଞ୍ଚଳର ହୋଇଥିବା ବେଳେ ସେମାନଙ୍କ ନାମ ଗୋପନ ରଖାଯାଇଛି । ସୂଚନାନୁସାରେ, ଚାନ୍ଦପୁର ଅଞ୍ଚଳରେ ଚୋରୀ ଡକାୟତୀ ଘଟଣା ଘଟି ଚାଲିଥିବା ବେଳେ ତାହା ପୁଲିସ ପାଇଁ ମୁଣ୍ଡବ୍ୟଥା ସୃଷ୍ଟି କରିଥିଲା । ଗତକାଲି ଚାନ୍ଦପୁର ସୁଶାନ୍ତ ନାୟକଙ୍କ ଘରୁ ଲୁଟ ହୋଇଥିବା ନେଇ ଅଭିଯୋଗ ହୋଇଥିଲା । ପୁଲିସ ଏହି ଘଟଣାର ତଦନ୍ତ କରିବା ସମୟରେ ଦୁଇ ଜଣ ମହିଳା ସୁଶାନ୍ତଙ୍କ ଘରେ ପଶିଥିବା ଜାଣିବାକୁ ପାଇଥିଲେ । ପୁଲିସ ବହୁ ଖୋଜା ଖୋଜି କରିବା ପରେ ଏକ ବୁଦା ମୁଳେ ଦୁଇ ମହିଳା ଲୁଚିଥିବା ଦେଖାଯାଇଥିଲା । ତାଙ୍କୁ ସେଠାରୁ ଉଦ୍ଧାର କରି ଥାନାକୁ ଅଣାଯିବା ସହ ଲୁ କରିଥିବା ସମସ୍ତ ସୁନା ଓ ରୂପା ଅଳଙ୍କାରକୁ ଜବତ କରାଯାଇଥିବା ସୂଚନା ମିଳିଛି । ମହିଳାଙ୍କଠାରୁ ୪୨ ଗ୍ରାମ ସୁନା ଏବଂ ୫୩୯ ରୂପା ଅଳଙ୍କାର ଉଦ୍ଧାର କରାଯାଇଛି । ଯାହାର ଆନୁମାନିକ ମୁଲ୍ୟ ୨ ଲକ୍ଷ ୧୬ ହଜାର ହେବ ବୋଲି ଆକଳନ କରାଯାଇଛି । ମହିଳା ଦୁଇ ଜଣଙ୍କୁ ଗିରଫ କରାଯିବା ପରେ କୋର୍ଟ ଚାଲାଣ କରାଯାଇଥିବା ଚାନ୍ଦପୁର ଥାନା ଅଧିକାରୀ ରଶ୍ମୀ ରଞ୍ଜନ ଦାଶ ସୂଚନା ଦେଇଛନ୍ତି । ଅନ୍ୟପକ୍ଷେ, ଚାନ୍ଦପୁର ଥାନା ପୁଲିସ ୧୨ ଘଣ୍ଟା ମଧ୍ୟରେ ମହିଳାଙ୍କୁ ଗିରଫ କରିବା ଏବଂ ସୁନା ଅଳଙ୍କାର ଉଦ୍ଧାର କରିବା ଘଟଣାକୁ ନେଇ ଆଜି ନୟାଗଡ଼ ଏସ୍ପି ସିଦ୍ଧାର୍ଥ କାଟରିଆ ପ୍ରଶଂସା କରି ଟ୍ୟୁଟ୍ କରିଛନ୍ତି ।
