ବୟସ୍କ ବ୍ୟକ୍ତିଙ୍କୁ ଧକ୍କା ଦେଲା ପୋଲିସ ଗାଡ଼ି:ବୟସ୍କ ବ୍ୟକ୍ତି ମୃତ

ନୟାଗଡ଼, (ବାଘୁଆବାର୍ତ୍ତା): ପୋଲିସ ଗାଡ଼ି ଧକ୍କାରେ ବୟସ୍କ ବ୍ୟକ୍ତିଙ୍କ ମୃତ୍ୟୁ। ମୃତ ବୟସ୍କ ବ୍ୟକ୍ତି ଜଣଙ୍କ ହେଉଛନ୍ତି ଚିନ୍ତାମଣି ନାୟକ। ସୂଚନାନୁସାରେ, ନୟାଗଡ଼ ଜିଲ୍ଲା ଇଟାମାଟି ଥାନା ଅନ୍ତର୍ଗତ ବାଲିକୁଦିଆ ଗ୍ରାମର ଚିନ୍ତାମଣି ନାୟକ(୫୮) ସୋମବାର ଦିନ ବୋଲଗଡ଼ ଅଞ୍ଚଳ ତାଙ୍କ ବନ୍ଧୁ ଘରକୁ ଯାଇଥିଲେ। ସେଠାରୁ କାମ ସାରି ମଙ୍ଗଳ ବାର ସକାଳୁ ନିଜ ଲୁନା ଗାଡ଼ିରେ ଘରକୁ ଫେରୁଥିବା ବେଳେ ବିପରୀତ ଦିଗରୁ ଯାଉଥିବା ପୋଲିସ ଭ୍ୟାନଗାଡି ନମ୍ବର (ଓଡି ୦୫ ଏଭି୮୪୫୯)ଟି ମୁହାଁମୁହିଁ ଧକ୍କା ଦେଇଥିଲା। ଘଟଣା ସ୍ଥଳରେ ବୟସ୍କ ବ୍ୟକ୍ତି ଜଣଙ୍କ ଛିଟିକି ପଡିଥିଲେ। ବୟସ୍କ ବ୍ୟକ୍ତିଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ସ୍ଥାନୀୟ ଲୋକେ ଉଦ୍ଧାର କରି ପ୍ରଥମେ ନିକଟସ୍ଥ ଚିକିତ୍ସାଳୟ ଓ ପରେ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। କିନ୍ତୁ ଡାକ୍ତର ସେଠାରେ ବୟଷ୍କ ବ୍ୟକ୍ତି ଚିନ୍ତାମଣିଙ୍କୁ ମୃତ ଘୋଷଣା କରିଥିଲେ। ସେପଟେ ଧକ୍କା ଦେଇଥିବା ପୋଲିସ ଭ୍ୟାନରେ ବଲାଙ୍ଗୀର ଜିଲ୍ଲାର ଡିଏସସ୍ପି ଯାଉଥିଲେ ବୋଲି ସୂଚନା ମିଳିଛି। ସେପଟେ ବୋଲଗଡ଼ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଜଣାପଡ଼ିଛି। ତେବେ ବୋଲଗଡ଼ ପୋଲିସ ବୟସ୍କ ବ୍ୟକ୍ତିଙ୍କ ପରିବାରକୁ ନ୍ୟାୟ ଦେଉଛି ନା ପୋଲିସ ଡିଏସସ୍ପିଙ୍କୁ ସୁରକ୍ଷା ଦେଉଛି ତାହା ଆଗାମୀ ଦିନରେ ଜଣାପଡିବ।