ପ୍ରେମରେ କଳଙ୍କ, ବିବାହର ଦିନକ ପରେ ଛାଡ଼ି ଚାଲିଗଲା ପ୍ରେମିକ

ପୁରୀ, (ବାଘୁଆବାର୍ତ୍ତା): ପ୍ରେମ ଥିଲା ଚାରି ବର୍ଷର ପୁରୁଣା । ତିନି ମାସ ତଳୁ ପ୍ରେମିକା ଅନ୍ତଃସତ୍ତ୍ୱା । ତେର ଦିନ ତଳେ ପ୍ରେମୀ ଯୁଗଳ କଲେ ପ୍ରେମ ବିବାହ । ଘର ଲୋକେ ସ୍ୱୀକାର ନକରିବାରୁ ଉଭୟ ଭଡ଼ାଘରେ ରହିଲେ । କିନ୍ତୁ ବିବାହର ଗୋଟିଏ ଦିନ ପରେ ପ୍ରେମିକାକୁ ଛାଡ଼ି ନିଜ ଘରକୁ ଚାଲିଗଲା ପ୍ରେମିକ । ଆଉ ଏହାପରେ ଗର୍ଭବତୀ ପ୍ରେମିକା ଏବେ ହଟହଟା ହେଉଛି । ଶେଷରେ ଅନ୍ତଃସତ୍ତ୍ୱା ଯୁବତୀ ଜଣକ ସମୁଦ୍ର କୂଳ ଥାନାରେ ଏତଲା ଦେଇଛନ୍ତି । ସମୁଦ୍ର କୂଳ ଥାନା ଅଧୀନ ବାଲିସାହି ହରିଜନ ବସ୍ତିରେ ଉଭୟ ଯୁବକ ଯୁବତୀଙ୍କ ଘର । ଦୁହିଁଙ୍କୁ ବୟସ ୧୯ ବର୍ଷ । ୪ ବର୍ଷ ତଳୁ ଉଭୟ ପ୍ରେମ ବନ୍ଧନରେ ବାନ୍ଧି ହୋଇ ଶାରୀରିକ ସମ୍ପର୍କ ରଖିଥିଲେ । ଯୁବତୀ ୩ ମାସର ଗର୍ଭବତୀ ଥିବା ବେଳେ ବିବାହ କରିବାକୁ ଜିଦ୍ କରିଥିଲେ । କିନ୍ତୁ ଯୁବକର ପରିବାର ଲୋକେ ଅରାଜି ଥିବାରୁ ଉଭୟ ଚନ୍ଦନପୁର ଥାନା ଅଧୀନ ବଢ଼େଇ ମନ୍ଦିରରେ ଗତ ୧୩ ତାରିଖରେ ବିବାହ କରିଥିଲେ । ଦୁହେଁ ଭଡ଼ା ଘରେ ରହୁଥିବା ବେଳେ ୧୪ ତାରିଖରେ ଯୁବକକୁ ତା’ ଭିଣୋଇ ଘରକୁ ଡାକି ନେଇଥିଲା । ଘରେ କଥା ହୋଇ ଯୁବତୀକୁ ନେଇଯିବ ବୋଲି ପ୍ରତିଶ୍ରୁତି ଦେଇ ପରିବାର ଲୋକଙ୍କ ପାଖକୁ ଯାଇଥିଲା ଯୁବକ । କିନ୍ତୁ ପରେ ଆଉ ଫେରିନଥିଲା । ମୋବାଇଲ୍ ଫୋନ୍ ସୁଇଚ୍ ଅଫ୍ କରି ରହିଯିବାରୁ ଯୁବତୀ ତାଙ୍କ ପରିବାର ଲୋକଙ୍କୁ ଡାକି ଯୁବକ ଘରକୁ ଯାଇଥିଲେ । ହେଲେ ଯୁବକର ପରିବାର ଲୋକେ ଘରେ ପୂରାଇବାକୁ ମନା କରି ତଡ଼ି ଦେଇଥିଲେ । ଏପରିକି ଘରକୁ ଆସିଲେ ନିଆଁରେ ଜାଳି ହତ୍ୟା କରିବାକୁ ଧମକ ଦେଇଥିବା ଯୁବତୀ ଅଭିଯୋଗ କରିଛନ୍ତି । ଏନେଇ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।