ଜଗତସିଂହପୁର, (ବାଘୁଆବାର୍ତ୍ତା): ଓଏଏସ ପାଇବା ପରେ ଠକିଦେଲେ ଓଏଏସ ଅଫିସର ବାବୁ । ଦୀର୍ଘ ବର୍ଷ ହେଲା ପ୍ରେମ କଲେ । ଲୁଚି ଛପି ବିବାହ କରିବା ସହ ଶାରୀରିକ ସମ୍ପର୍କ ରଖିଲେ । ଏପରିକି ତିନି ଥର ଜୋର ଜବରଦସ୍ତ ଗର୍ଭ ନଷ୍ଟ କରାଇଲେ । ହେଲେ ଦୁଇମାସ ତଳେ ଓଏଏସ ପାଇବା ପରେ ଚଳଚ୍ଚିତ୍ରର କାହାଣୀ ପରି ଆଉ ଯୁବତୀଙ୍କୁ ଗ୍ରହଣ କରୁନାହାନ୍ତି ଓଏଏସ ଅଫିସର ବାବୁ କିମ୍ବା ତାଙ୍କର ପରିବାର ଲୋକେ । ଏପରି ଘଟଣା ଦେଖିବାକୁ ମିଳିଛି ଜଗତସିଂହପୁର ଜିଲା ସଦର ଥାନା ମାର୍କଣ୍ଡପୁର ଗାଁରେ । ପୀଡିତା ଜଣକ କେନ୍ଦୁଝର ଅଞ୍ଚଳର ଜଣେ ଆଦିବାସୀ ସମ୍ପ୍ରଦାୟର ଯୁବତୀ ହୋଇଥିବା ସହିତ ଓଏଏସ ବାବୁ ଜଣକ ମଧ୍ୟ ଜଣେ ଆଦିବାସୀ ସମ୍ପ୍ରଦାୟର । ଏ ବାବଦରେ ପିଡିତା ଜଗତସିଂହପୁର ସଦର ଥାନାରେ ଏତାଲା ଦେବାପରେ ପୋଲିସ ଏତାଲାକୁ ଗ୍ରହଣ କରି ପଞ୍ଜିକୃତ କରିଥିଲେ ମଧ୍ୟ କୌଣସି ତଦନ୍ତ ଆଗକୁ ନେଉନଥିବାର ପୀଡିତା ଅଭିଯୋଗ କରିଛନ୍ତି । ସେପଟେ ପୀଡିତାଙ୍କର ସାବତ ମାଆ ଓ ନିଶାସକ୍ତ ଅବସ୍ଥାରେ ରହୁଥିବା ବାପା ମଧ୍ୟ ତାଙ୍କୁ ବାପ ଘରେ ନିର୍ଯାତନା ଦେଉଥିବାରୁ ସେ ଏବେ ଅସହାୟ ହୋଇ ପଡିଛନ୍ତି । ଏହି ବାବଦରେ ଅଭିଯୁକ୍ତ ଯୁବକଙ୍କ ବାପା ପୀଡିତାଙ୍କ ଅଭିଯୋଗକୁ ଖଣ୍ଡନ କରିଥିବା ସହ ସେ ତାଙ୍କ ପୁଅ ନାରେ ମିଛ ଅଭିଯୋଗ କରୁଛନ୍ତି ବୋଲି କହିଛନ୍ତି । ଅଭିଯୁକ୍ତ ଓଏଏସ ଅଫିସର ବାବୁ ଜଣକ ହେଲେ ଜଗତସିଂହପୁର ମାର୍କଣ୍ଡପୁର ଅଂଚଳର ଗଣେଶ୍ବର ହାନ୍ସଦାଙ୍କ ପୁଅ ଆଲବର୍ଟ ହାନ୍ସଦା । ସେ ଦୁଇମାସ ତଳେ ନୂଆକରି ଓଏଏସ ପାଇବା ପରେ ଏବେ ମୟୂରଭଞ୍ଜରେ ତାଲିମ ନେଉଛନ୍ତି । ଏ ବାବଦରେ ଜଗତସିଂହପୁର ଥାନା ଅଧିକାରୀଙ୍କ ଦୃଷ୍ଟି ଆକର୍ଷଣ କରିବାରୁ ତଦନ୍ତ ଚାଲିଛି ବୋଲି ଆମକୁ ଟେଲିଫୋନ ମାଧ୍ୟମରେ କହିଛନ୍ତି । ଅଭିଯୁକ୍ତ ଯୁବକଙ୍କ ସହ ଯୋଗାଯୋଗ ସମ୍ଭବ ହୋଇପାରିନାହିଁ । ରସିକିଆ ଥାନା ଅଧିକାରୀ ଓ ହୋମଗାର୍ଡଙ୍କ ଲଭ ସେକ୍ସ ଧୋକା ପରେ ଥାନାବାବୁ ଜେଲ୍ ଯିବା ଘଟଣା ଲୋକ ଲୋଚନରୁ ନଲିଭୁଣୁ ପୁଣି ରସିକିଆ ଓଏସ ବାବୁଙ୍କ ନାଁରେ ଏପରି ସଙ୍ଗୀନ ଅଭିଯୋଗ ସାରା ଜିଲାରେ ଆଲୋଡନ ସୃଷ୍ଟି କରିଛି ।
ଦୁଇ ବର୍ଷ ପ୍ରେମ କଲେ, ଓଏଏସ ପାଇବା ପରେ ଯୁବତୀଙ୍କୁ ଠକିଦେଲେ
