ଭୁବନେଶ୍ୱର, (ବାଘୁଆବାର୍ତ୍ତା): ଜଣେ ଯୁବତୀଙ୍କୁ ପ୍ରେମ ନିବେଦନ ଏବଂ ପରେ ବିଫଳ ହେବାରୁ ଅଶ୍ଲୀଳ ଫଟୋ ଫେସବୁକ୍ରେ ଭାଇରାଲ ଅଭିଯୋଗରେ ପୁଲିସ ଜଣେ ଅଭିଯୁକ୍ତକୁ ଗିରଫ କରିଛି । ଗିରଫ ଅଭିଯୁକ୍ତ କଟକ ଯୋବ୍ରା ଅଞ୍ଚଳର ବାପୁ ବେଉନ(୩୬) । ମଞ୍ଚେଶ୍ୱର ଥାନା ଅଞ୍ଚଳର ଜଣେ ଯୁବତୀ କଟକରେ ଏକ ଘରୋଇ କଲେଜରେ ପଢୁଥିବା ବେଳେ ସଂପୃକ୍ତ ଯୁବକ ତାଙ୍କୁ ଦେଖିଥିଲେ । ପରେ ତାଙ୍କୁ ସେଠାରେ ବାରମ୍ବାର ପିଛା କରିବା ସହ ପ୍ରେମ ନିବେଦନ କରି ଆସୁଥିଲେ । ଏନେଇ ଛାତ୍ରୀ ଜଣଙ୍କ ମନା କରିବାରୁ ତାଙ୍କୁ ଜୋର ଜବରଦସ୍ତ ଉଠାଇ ନେବା ପାଇଁ ଧମକ ଦେଇଥିଲେ । ଶେଷରେ ପରିବାର ଲୋକେ ବାଧ୍ୟ ହୋଇ କଟକ ଛାଡି ଭୁବନେଶ୍ୱରରେ ଆଶ୍ରୟ ନେଇଥିଲେ । ପରେ ସଂପୃକ୍ତ ଅଭିଯୁକ୍ତ ବାପୁ ପିଛା କରି ମଞ୍ଚେଶ୍ୱରରେ ଆସି ମଧ୍ୟ ଧମକ ଦେଇଥିଲେ । ଗତ କିଛି ଦିନ ତଳେ ଯୁବତୀଙ୍କ ଅନ୍ୟତ୍ର ବିବାହ ହୋଇଥିଲା । ଏହି ରାଗ ରଖି ବାପୁ ଯୁବତୀଙ୍କ ଫଟୋ ସଂଗ୍ରହ କରିବା ସହ ଆପ୍ ମାଧ୍ୟମରେ ଫଟୋ ଅଶ୍ଲୀଳ କରି ଫେସବୁକ୍ରେ ଭାଇରାଲ କରିଥିଲେ । ଏନେଇ ଯୁବତୀଙ୍କ ବାପା ଜାଣିବା ପରେ ମଞ୍ଚେଶ୍ୱର ଥାନାରେ ଲିଖିତ ଅଭିଯୋଗ କରିଥିଲେ । ମଞ୍ଚେଶ୍ୱର ଥାନା ପୁଲିସର ଏକ ଟିମ୍ ଆଜି କଟକ ଯୋବ୍ରା ଅଞ୍ଚଳରେ ଚଢଉ କରିବା ସହ ସଂପୃକ୍ତ ଅଭିଯୁକ୍ତ ବାପୁକୁ ଗିରଫ କରିଛି । ପୁଲିସ ତା ବିରୋଧରେ ଆଇପିସିର ଧାରା ୪୨୦,୨୯୪,୫୦୬, ୬୬ ଆଇଟି ଆକ୍ଟରେ ମାମଲା ରୁଜୁ କରିଛି ।
ପ୍ରେମରେ ବିଫଳ ହୋଇ ଅଜବ କାମ କଲେ ପ୍ରେମିକ, ଶେଷରେ ବନ୍ଧା ହେଲେ
