ଚନ୍ଦ୍ରଶେଖରପୁର, (ବାଘୁଆବାର୍ତ୍ତା): ପ୍ରେମ ପାଇଁ ପ୍ରେମୀଯୁଗଳ କିଛି ବି କରିପାରନ୍ତି । ଏହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଚନ୍ଦ୍ରଶେଖରପୁର ଥାନା ନୀଳାଦ୍ରି ବିହାର ଅଞ୍ଚଳରେ । ଜଣେ ୪୨ ବର୍ଷିୟା ମାଉସୀ ତାଙ୍କର ଜଣେ ୨୮ ବର୍ଷିୟ ପୁତୁରା ପ୍ରେମରେ ଉବୁଟୁବୁ ହୋଇଛନ୍ତି । ବର୍ତ୍ତମାନ ସ୍ଥିତି ଏମିତି ହୋଇଛି ଯେ ପୁତୁରା ବିବାହ କରିବା ପରେ ବି ମାଉସୀ ତାଙ୍କୁ ଛାଡିବାକୁ ନାରାଜ । ଅଭିଯୋଗ ଅନୁଯାୟୀ ୨୦୧୭ରେ ୟୁନିଟ୍ ୬ ଅଞ୍ଚଳର ୪୨ ବର୍ଷୀୟ ମହିଳା ଛଦ୍ମନାମ (ସାଲିନି ସାହୁ) ନୀଳାଦ୍ରିବିହାରରେ ତାଙ୍କର ଜଣେ ସମ୍ପର୍କୀୟ ଭଉଣୀ ଘରେ ରହୁଥିଲେ । ରହିବା ସମୟରେ ଭଉଣୀଙ୍କ ୨୮ ବର୍ଷୀୟ ପୁଅ ଛଦ୍ମନାମ(ରାହୁଲ)ଙ୍କ ସହ ପ୍ରେମ ସମ୍ପର୍କ ଗଢି ଉଠିଥିଲା । ଉଭୟ ପରେ ଖୁଲମଖୁଲା ବୁଲାବୁଲି କରୁଥିଲେ । ତେବେ ଘର ଲୋକ ହଠାତ୍ ପୁତୁରାର ବାହାଘର କରିଦେବାରୁ ଏବେ ମାଉସୀ ମୁଣ୍ଡରେ ଚଡ଼କ ପଡିଛି । ମାଉସୀ କହୁଛି ତମେ ତାକୁ ବାହା ହେଲେ ମୋର କିଛି ଆପତ୍ତି ନାହିଁ, ହେଲେ ମୁଁ ବି ତୁମ ପାଖରେ ରହିବି । ତେବେ ପୁତୁରା ଏଥିରେ ରାଜି ନହେବାରୁ ସେ ଥାନାରେ ତାଙ୍କୁ ପ୍ରତାରଣା କରି ଶାରିରୀକ ସମ୍ପର୍କ ରଖିଥିବା ଅଭିଯୋଗ କରିଛନ୍ତି । ପୁଲିସ ପୁତୁରାକୁ ଅଟକ ରଖି ପଚରାଉଚରା କରୁଛି । ଅନ୍ୟପଟେ ପୁଅର ପରିବାର ଲୋକ ଅଭିଯୋଗ କରିଛନ୍ତି ଏତଲା ଦେଇଥିବା ଝିଅର ଅନେକ ଯୁବକଙ୍କ ସହ ସମ୍ପର୍କ ରହିଛି । ସେ ଆମ ପୁଅକୁ ଅକାରଣରେ ଫସାଇ ଏପରି କାଣ୍ଡ ଭିଆଇଛନ୍ତି ।
