ପ୍ରେମିକା ଅନ୍ତଃସତ୍ତ୍ଵା ହେବାରୁ ଠକିଦେଲେ ପ୍ରେମିକ, ବିବାହ କରିବାକୁ ମନା କରି ହୋଇଥିଲେ ଫେରାର

ଚଣ୍ଡିଖୋଲ, (ବାଘୁଆବାର୍ତ୍ତା): ବିବାହ କରିବାକୁ ପ୍ରତିଶୃତି ଦେଇ ଯୁବତୀଙ୍କୁ ପ୍ରତାରଣା। ବିବାହ କରିବାକୁ କହି ଶାରିରୀକ ସମ୍ପର୍କ ରଖିଲେ, ହେଲେ ପ୍ରେମିକା ଅନ୍ତଃସତ୍ତ୍ଵା ହେବାରୁ ଠକିଦେଲେ ପ୍ରେମିକ। ବିବାହ କରିବାକୁ ମନା କରି ଫେରାର ଯୁବକ। ଏବେ ନ୍ୟାୟ ପାଇଁ ଥାନାର ଦ୍ଵାରସ୍ଥ ହେଲେ ଯୁବତୀ। ଏଭଳି ଘଟଣା ଘଟିଛି ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ନଳିପୁର ପଞ୍ଚାୟତରେ। ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ନଳିପୁର ପଞ୍ଚାୟତର ମାକରମ ଅଲ୍ଲୀଙ୍କ ଝିଅଙ୍କର ଘର ପାଖର ସାଦତ ଖାଁ ନାମକ ଜଣେ ଯୁବକଙ୍କ ସହ ପ୍ରେମ ସମ୍ପର୍କ ଗଢି ଉଠିଥିଲା। ଦୁହେଁ ଦୀର୍ଘ ଦିନ ଧରି ମିଳାମିଶା କରୁଥିଲେ। ଏହାପରେ ଯୁବକ ଜଣଙ୍କ ଉକ୍ତ ଯୁବତୀଙ୍କୁ ବିବାହ କରିବେ ବୋଲି ପ୍ରଲୋଭନ ଦେଖାଇ ଶାରିରୀକ ସମ୍ପର୍କ ରଖିଥିଲେ। ହେଲେ ଯୁବତୀ ଜଣଙ୍କ ଏବେ ଅନ୍ତଃସତ୍ତ୍ଵା ହେବାରୁ ବିବାହ କରିବାକୁ ମନା କରି ଫେରାର ହୋଇଯାଇଛନ୍ତି ଯୁବକ। ସେପଟେ ଯୁବତୀଙ୍କ ପରିବାର ଲୋକେ ଆପୋଷ ସମାଧାନ କରିବାକୁ କହିବାରୁ ଯୁବକଙ୍କ ପରିବାର ଲୋକେ ବିବାହ ହେବନି ବରଂ ଟଙ୍କା ନେଇ ରଫାଦଫା କରିବାକୁ ସଫା ସଫା କହିଛନ୍ତି। ଫଳରେ ଯୁବତୀ ଜଣଙ୍କ ଏବେ ନ୍ୟାୟ ଦାବିରେ ବାଲିଚନ୍ଦ୍ରପୁର ଥାନାର ଦ୍ଵାରସ୍ଥ ହୋଇଛନ୍ତି। ଏନେଇ ପୀଡିତା ଥାନାରେ ଲିଖିତ ଅଭିଯୋଗ କରିବା ସହ ଯୁବକଙ୍କ ସହ ବିବାହ କରିବାକୁ ଦାବି କରିଛନ୍ତି। ଏନେଇ ବାଲିଚନ୍ଦ୍ରପୁର ପୋଲିସ ଘଟଣାର ଅଧିକ ତଦନ୍ତ କରୁଛି।