ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଅନ୍ତର୍ଗତ ନୂଆଗାଁ ପୁଲିସକୁ ମିଳିଛି ବଡ଼ ସଫଳତା । ତିନି ଲୁଟେରାଙ୍କୁ ଗିରଫ କରିବା ସହ ସେମାନଙ୍କୁ କୋର୍ଟ ଫରୁୱାର୍ଡ ହୋଇଛି । ଏଥି ସହିତ ଲୁଟ ହୋଇଥିବା ଗହଣା ଓ ଟଙ୍କାକୁ ପୁଲିସ ଜବତ କରିଛି । ସୁଚନାନୁସାରେ ଓଡ଼ଗାଁ ଥାନା ଅନ୍ତର୍ଗତ କୁରାଳ ଗ୍ରାମର ଗୋକୁଳ ଚନ୍ଦ୍ର ନିଶଙ୍କ ଓ ତାଙ୍କ ପତ୍ନୀ ଜ୍ୟୋତ୍ସ୍ନା ମହାନ୍ତି ଏକ ବାଇକ ଯୋଗେ ନିଜ ଘରକୁ ଫେରୁଥିଲେ । ନୂଆଗାଁ ଥାନା ଅନ୍ତର୍ଗତ ରାଣୀ ଗାଡିଆ ଛକଠାରୁ ୧୦୦ ମିଟର ଦୁରରେ ତିନି ଜଣ ଅଜଣା ବ୍ୟକ୍ତି ଆସି ସେମାନଙ୍କୁ ଅଟକାଇଥିଲେ । ବନ୍ଧୁକ ଓ ବୋମାର ଭୟ ଦେଖାଇ ଜୀବନରେ ମାରିଦେବାକୁ ଉଦ୍ୟମ କରି ଜ୍ୟୋତ୍ସ୍ନାଙ୍କ ବେକରୁ ଗହଣା, ଭ୍ୟାନିଟ ବ୍ୟାଗ ଓ ମୋବାଇଲ ଫୋନ ଛଡ଼ାଇ ନେଇଥିଲେ । ଏ ନେଇ ଗତ ୧୦ ତାରିଖରେ ଉଭୟ ପତି ପତ୍ନୀ ନୂଆଗାଁ ଥାନାରେ ପହଞ୍ଚି ଏତେଲା ଦେଇଥିଲେ । ନୂଆଗାଁ ପୁଲିସ ପକ୍ଷରୁ ଗାତେରୀ ସମବାୟ ସମିତି ପାଖରେ ଲାଗିଥିବା ସିସିଟିଭି କ୍ୟାମେରାକୁ ଯାଞ୍ଚ କରିଥିଲେ । ପୁଲିସ ଅଭିଯୁକ୍ତଙ୍କ ଘରେ ପହଞ୍ଚି ସେମାନଙ୍କୁ ଉଠାଇ ଆଣିଥିଲା । ଅଭିଯୁକ୍ତ ମାନେ ହେଲେ ଇଟାମାଟି ଜଗନ୍ନାଥ ସାହିର ସୁରେନ୍ଦ୍ର ସେଠିଙ୍କ ପୁଅ ଶିବ ସେଠି, ଇଟାମାଟି ଏକଡାଳିଆ ସାହିର ସୁଦର୍ଶନ ବେହେରାଙ୍କ ପୁଅ ଚନ୍ଦନ ବେହେରା ଓ ଇଟାମାଟି ହରିଜନ ସାହିର ଦିନବନ୍ଧୁ ଘଡେଇଙ୍କ ପୁଅ ତରୁଣ ଘଡେଇଙ୍କୁ ପୁଲିସ ଉଠାଇ ଆଣିଥିଲା । ଅଭିଯୁକ୍ତ ମାନେ ଲୁଟ କରିଥିବା ନେଇ ସ୍ୱୀକାର କରିଥିଲେ । ସେମାନଙ୍କ ଠାରୁ ଲୁଟ ଗହଣା ଓ ୨୦୦ ଟଙ୍କା ଜବତ କରାଯାଇଛି । ନୂଆଗାଁ ଥାନାରେ କେସ୍ ନଂ ୧୨୯ ରେ ମାମଲା ରୁଜୁ କରାଯାଇ ତିନି ଜଣଙ୍କୁ କୋର୍ଟ ଫରୁୱାର୍ଡ କରାଯାଇଛି ।





