ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ବନବିଭାଗ ଗତ କିଛିମାସ ଧରି ରାତ୍ରି ପାଟ୍ରୋଲିଂ ଜୋର୍ଦାର କରିଛି । ଯାହାଦ୍ୱାରା କି ଏହି ଦୁଇମାସ ଭିତରେ ଅନେକ କାଠ ଜବତ ହେବା ସହ ଆସାମୀ ଗିରଫ ହୋଇଛନ୍ତି । ଗତକାଲି ଓଡ଼ଗାଁ ବନବିଭାଗ ପକ୍ଷରୁ ରାତ୍ରି ପାଟୋଲିଂ ଚାଲିଥିବା ସମୟରେ ବାହାଡ଼ଝୋଲା ଗୁମି ରାସ୍ତାରେ ଅଟୋସହ ଦେଶୀମଦ ନେଇଯାଉଥିବା ଏକ ଗାଡ଼ି ସହ ଦୁଇଜଣକୁ ଅଟକ ରଖିଥିଲେ । ଫରେଷ୍ଟର ସରିତା ବରାଳଙ୍କ ନେତୃତ୍ୱରେ କାଠଗାଡ଼ି ଚେକିଂ ଚାଲୁଥିବା ସମୟରେ ମଦଗାଡ଼ି ଧରାପଡିଥିଲା । ବନବିଭାଗ ପକ୍ଷରୁ ବାହାଡ଼ଝୋଲା ଫାଣ୍ଡିରେ ସେମାନଙ୍କୁ ହସ୍ତାନ୍ତର କରାଯାଇଥିଲା । ଆଜି ଓଡ଼ଗାଁ ପୋଲିସ ପକ୍ଷରୁ କେସ୍ ନଂ ୨୦୪ରେ ଏକ ମାମଲା ରୁଜୁ କରାଯାଇ ଗିରଫ କରାଯାଇଛି । ଅଟୋସହ ୩୬ ଲିଟର ଦେଶୀମଦ ଜବତ କରାଯାଇଛି । ଅଟୋ ଡ୍ରାଇଭର ମାନସ ସେଠୀ ଓ ଆନନ୍ଦ ନାୟକଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ସେହିପରି ଭାବେ ଓଡ଼ଗାଁ ଥାନା ପକ୍ଷରୁ ଆଜି ଚଢ଼ାଉ କରାଯାଇ ୨୦ ଲିଟର ମଦ ଜବତ କରାଯିବା ସହ କେସ୍ ନଂ ୨୦୫ରେ ଏକ ମାମଲା ରୁଜୁ କରାଯାଇ ପଦ୍ମନାଭ ବରାଡଙ୍କୁ ଗିରଫ କରାଯାଇଛି ।
