ଭୁବନେଶ୍ୱର, (ବାଘୁଆବାର୍ତ୍ତା): ମହାପ୍ରଭୁ ଶ୍ରୀଲିଙ୍ଗରାଜଙ୍କ ମଙ୍ଗନ, ବିବାହ ଓ ଶୀତଳ ଷଷ୍ଠୀ ଯାତ୍ରା ତିଥି ଏବଂ ତାରିଖରେ ପରିବର୍ତ୍ତନ କରାଯାଇଛି । ପୂର୍ବରୁ କେଦାରଗୌରୀ ମନ୍ଦିର ପରିଚାଳନା କମିଟି ପକ୍ଷରୁ ଆସନ୍ତା ୩୦ ତାରିଖରେ ମଙ୍ଗନ, ୩୧ରେ ବିବାହ ଓ ଜୁନ୍ ୧ରେ ପ୍ରତ୍ୟାବର୍ତ୍ତନ ତଥା ଶୀତଳ ଷଷ୍ଠୀ ଯାତ୍ରା ଅନୁଷ୍ଠିତ ହେବ ବୋଲି କୁହାଯାଇଥିଲା । ମାତ୍ର ଶ୍ରୀଲିଙ୍ଗରାଜ ମନ୍ଦିର କାର୍ଯ୍ୟାଳୟରେ ଅତିରିକ୍ତ ଜିଲ୍ଲାପାଳ ତଥା କାର୍ଯ୍ୟ ନିର୍ବାହୀ ଅଧିକାରୀ ରୁଦ୍ର ନାରାୟଣ ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରସ୍ତୁତି ବୈଠକରେ ଏହି ତିଥି ପରିବର୍ତ୍ତନ କରାଯାଇଛି । ନୂତନ ତିଥି ଅନୁଯାଇ ଆସନ୍ତା ୨୯ରେ ମଙ୍ଗନ(ଅଷ୍ଟ ଚଣ୍ଡୀ ନିମନ୍ତ୍ରଣ), ୩୦ରେ ବରାନୁଗମନ ଓ ବାହାଘର ଏବଂ ୩୧ରେ ପ୍ରତ୍ୟାବର୍ତ୍ତନ ତଥା ଶୀତଳ ଷଷ୍ଠୀ ଯାତ୍ରା ଅନୁଷ୍ଠିତ ହେବ । ଚୂଡ଼ାନ୍ତ ହୋଇଥିବା ନୀତି ନିର୍ଘଣ୍ଟ ଅନୁଯାୟୀ, ୩୦ ତାରିଖ ରାତି ୧୧ଟାରେ କେଦାରଗୌରୀ ଅଭିମୁଖେ ବରାନୁଗମନ ଓ ରାତି ସାଢେ ୨ଟା ମଧ୍ୟେ ହାତଗଣ୍ଠି ପଡ଼ିବ । ଭୋର ୪ଟାରେ କଉଡ଼ି ଖେଳ ନୀତି ସମାପନ ହୋଇ ୩୧ ତାରିଖ ସକାଳ ୫ଟାରୁ ନବ ଦମ୍ପତି ଶ୍ରଦ୍ଧାଳୁଙ୍କୁ ଦର୍ଶନ ଦେବେ । ପରେ ସମସ୍ତ ନୀତି ବଢ଼ି ଠିକ ରାତି ୧୦ଟାରେ ଦେଉଳ ପ୍ରତ୍ୟାବର୍ତ୍ତନ(ଶୀତଳ ଷଷ୍ଠୀ) ଶୋଭାଯାତ୍ରା ହେବ । ବୈଠକରେ ମନ୍ଦିର ଜ୍ୟୋତିଷ ଏହି ପ୍ରସ୍ତାବ ରଖିବା ପରେ ସେବାୟତଙ୍କ ମଧ୍ୟରେ କିଛି ସମୟ ବାଦବିବାଦ ହୋଇଥିଲା। ଏହ ପରିବର୍ତ୍ତିତ ତିଥି କେଦାରଗୌରୀ ମନ୍ଦିର ପରିଚାଳନା କମିଟି ଓ ଶୀତଳ ଷଷ୍ଠୀ କମିଟି ପାଇଁ ଅଡୁଆ ପରିସ୍ଥିତି ସୃଷ୍ଟି କରିଥିଲା । କେଦାରଗୌରୀ ପରିଚାଳନା କମିଟି ସମ୍ପାଦକ ଲୁଲୁ ମହାପାତ୍ର କହିଛନ୍ତି, ଆମେ ନିମନ୍ତ୍ରଣ ପତ୍ର ମୁଦ୍ରିତ କରି ବାଣ୍ଟିବା ଆରମ୍ଭ କରିଦେଇଥିଲୁ । ଏବେ ହଠାତ ତିଥି ପରିବର୍ତ୍ତନ ହେଲା । ଜ୍ୟୋତିଷ ଆଗ କହିଥିଲେ ଗୋଟେ ତାରିଖ, ଆଜି ପୁଣି ଆଉ ଏକ ତାରିଖ କହୁଛନ୍ତି । ଯାହା ବି ହେଉ ଆମକୁ ମହାପ୍ରଭୁଙ୍କ ତିଥି ଅନୁଯାୟୀ କାମ କରିବାକୁ ହେବ । ତେଣୁ ସମସ୍ତ ଶ୍ରଦ୍ଧାଳୁଙ୍କୁ ଅନୁରୋଧ କରୁଛୁ, ସେମାନେ ଜୁନ ୧ତାରିଖ ବଦଳରେ ଚଳିତ ମାସ ୩୧ ତାରିଖରେ ନବ ବିବାହିତ ଦେବଦମ୍ପତିଙ୍କ ଦର୍ଶନ ନିମନ୍ତେ ଆସି ପ୍ରୀତିଭୋଜନ ଏବଂ ଶୀତଳ ଷଷ୍ଠୀରେ ଯୋଗ ଦେବେ । ଆଜିର ବୈଠକରେ ବ୍ରାହ୍ମଣ ନିଯୋଗର ନାରାୟଣ ମହାପାତ୍ର, ଭାଗିରଥି ମହାସୁଆର, ହିମାଦ୍ରୀ ମହାପାତ୍ର, ବିରଞ୍ଚି ନାରାୟଣ ପତି, ପୂଜାପଣ୍ଡା ନିଯୋଗର ପ୍ରସନ୍ନ ପୂଜାପଣ୍ଡା ଓ ସଚିକାନ୍ତ ପୂଜାପଣ୍ଡା, ପର୍ବ ଜାତ ବିଷୋୟୀ, ପ୍ରଶାନ୍ତ ସମର୍ଥା, ସୁପରଭାଇଜରଙ୍କ ସମେତ ମନ୍ଦିର କର୍ମଚାରୀ ଉପସ୍ଥିତ ଥିଲେ ।
ବଦଳିଲା ଶ୍ରୀଲିଙ୍ଗରାଜଙ୍କ ବିବାହ ତିଥି, ଆସନ୍ତା ୩୦ ତାରିଖରେ ହେବ ବିବାହ
