ଖଜୁରୀପଡା, (ବାଘୁଆବାର୍ତ୍ତା): ଘରକୁ ଚାଲି ଚାଲି ଫେରୁଥିଲେ ନାବାଳକ । ପ୍ୟାଣ୍ଟ୍ ପକେଟ୍ରେ ଥିଲା ମୋବାଇଲ୍ । ନାବାଳକଙ୍କ ନିକଟରେ ବଜ୍ରପାତ ହେବାରୁ ପକେଟରେ ଥିବା ମୋବାଇଲ୍ଟି ଜଳିଯାଇଛି । ଏଭଳି ଏକ ଅଭାବନୀୟ ଘଟଣା ମଙ୍ଗଳବାର ଖଜୁରୀପଡ଼ା ବ୍ଲକ ବେରେଡ଼ାପଦର ଗ୍ରାମରେ ଘଟିଛି । ଆହତ ନାବାଳକ ବୈଦ୍ଧଚନ୍ଦ୍ର ନାୟକଙ୍କ ୧୩ ବର୍ଷର ପୁଅ ବିନୟ ଫୁଲବାଣୀ ଜିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସାଧୀନ ରହିଛନ୍ତି । ବୈଦ୍ଧଚନ୍ଦ୍ର ସୂଚନା ଅନୁଯାୟୀ, ଦିନ ତମାମ ଖରା ରହିଥିଲା । ମାତ୍ର ଅପରାହ୍ଣରେ ବର୍ଷା, ପବନ ମାଡ଼ି ଆସିବାସହ ବଜ୍ରପାତ ହୋଇଥିଲା । ବିନୟ ଦୋକାନରୁ ଘରକୁ ଫେରୁଥିଲେ । କିଛି ସମୟ ପରେ ବିନୟ ଘରେ ପହଞ୍ଚିଥାନ୍ତେ । ଏହି ସମୟରେ ଘଟିଗଲା ଏକ ଅଘଟଣ । ବଜ୍ରପାତ ହେବାରୁ ପ୍ୟାଣ୍ଟ ପକେଟ୍ରେ ଥିବା ମୋବାଇଲ୍ରେ ନିଆଁ ଲାଗିଯାଇଥିଲା । ପ୍ୟାଣ୍ଟ୍, ସାର୍ଟରେ ନିଆଁ ଲାଗିଯାଇଥିବାବେଳେ ପାଟି ଶୁଣି ସ୍ଥାନୀୟ ଲୋକ ଉଦ୍ଧାର କରିଛନ୍ତି । ତାଙ୍କୁ ଖଜୁରୀପଡ଼ା ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ଫୁଲବାଣୀ ଡାକ୍ତରଖାନାକୁ ନିଆଯାଇଛି । ବିନୟଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସିଥିବା ତାଙ୍କ ପରିବାର ଲୋକ କହିଛନ୍ତି ।
