ରାଜ୍ୟ ବାହାରକୁ ଚାଲାଣ ହେବାକୁ ଥିବା ୩୯ଜଣ ଦାଦନ ଶ୍ରମିକଙ୍କୁ ଉଦ୍ଧାର କରିଛି କଣ୍ଟାବାଞ୍ଜି ପୋଲିସ

କଣ୍ଟାବାଞ୍ଜି, (ବାଘୁଆବାର୍ତ୍ତା): କଣ୍ଟାବାଞ୍ଜି ପୋଲିସ ରାତି ସମୟରେ ପେଟ୍ରୋଲିଂ କରୁଥିବା ସମୟରେ ରାଜ୍ୟ ବାହାରକୁ ଚାଲାଣ ହେବାକୁ ଥିବା ୩୯ଜଣ ଦାଦନ ଶ୍ରମିକଙ୍କୁ ଉଦ୍ଧାର କରିଛି । ଦାଦନ ଶ୍ରମିକ ମଧ୍ୟରେ ୨୪ ଜଣ ପୁରୁଷ, ୧୫ ମହିଲା ଓ ୩ ଶିଶୁ ଅଛନ୍ତି । ଉଦ୍ଧାର ଶ୍ରମିକ ମାନେ ଖପ୍ରାଖୋଲ ଥାନା ବାହାବଲ, ବାଞ୍ଜିପାଲି, ଟେମ୍ବରିପାଳ , ଗମ୍ଭାରିମାଲ ଗାଁର ବୋଲି ଜଣାଯାଇଛି । ଦାଦନ ଶ୍ରମିକ ମାନେ ୩ ଟି ବୋଲେରୋ ଗାଡିରେ କଣ୍ଟାବାଞ୍ଜି ରେଳ ଷ୍ଟେସନ ଯାଉଥିବା ବେଳେ ପୋଲିସ ଚଟୁଅନକା ଛକ ଠାରେ ସଂଦେହରେ ଗାଡିକୁ ଅଟକାଇଥିଲା । ଗାଡିରେ ଶ୍ରମିକ ମାନେ ଥିବା ବେଳେ ତଦନ୍ତ ପାଇଁ ସମସ୍ତଙ୍କୁ ଥାନାକୁ ଅଣାଯାଇଥିଲା । ଶ୍ରମିକ ମାନେ କୋରବା-ବିଶାଖାପାଟଣା ଲିଙ୍କ ଏକ୍ସପ୍ରେସ ଟ୍ରେନ ଯୋଗେ ବିଜୟନଗରମ୍ ଦାଦାନ ଖଟିବାକୁ ଯାଉଥିଲେ ବୋଲି ଜଣାଯାଇଛି । ତେବେ ପୋଲିସ ଖପ୍ରାଖୋଲ ଥାନା ସର୍ଗିମୁଣ୍ଡା ଗାଁର ଦାଦନ ସର୍ଦାର କାର୍ତିକ ବାଗଙ୍କୁ ଗିରଫ କରିବାରେ ସଫଳ ହୋଇଛି ।