ବିଳାସପୁର (ବାଘୁଆବାର୍ତ୍ତା): କରୋନାକୁ ନେଇ ସରକାରଙ୍କ ପକ୍ଷରୁ ବାରମ୍ବାର ସତର୍କ କରାଯାଉଛି । ସତର୍କ ରୁହନ୍ତୁ, ସଚେତନ ରୁହନ୍ତୁ, ଦରକାର ପଡ଼ିଲେ ଡାକ୍ତରଙ୍କ ପରାମର୍ଶ ନିଅନ୍ତୁ ବୋଲି ସରକାର କହୁଛନ୍ତି । ଛତିଶଗଡ଼ର ବିଳାସପୁରରେ ଘଟିଛି ଏକ ଅଘଟଣ । ଗୋଟିଏ ପରିବାରର ୮ ଜଣ ପ୍ରାଣ ହରାଇଥିବା ବେଳେ ଅନ୍ୟ ୫ ଅସୁସ୍ଥ ହୋଇପଡିଛନ୍ତି । କରୋନା ଲକ୍ଷଣ ଦେଖାଯିବା ପରେ ପରିବାର ଲୋକ କୌଣସି ଏକ ନକଲି ଡାକ୍ତର (କ୍ୱାକ)ଙ୍କୁ ଔଷଧ ପାଇଁ ପରାମର୍ଶ ମାଗିଥିଲେ । ଡାକ୍ତରଙ୍କ ପରାମର୍ଶ କ୍ରମେ ପରିବାରର ସମସ୍ତ ସଦସ୍ୟ ହୋମିଓପାଥି ମେଡିସିନ ସେବନ କରିଥିଲେ । ମାମଲାରେ ପୋଲିସ ଯାଞ୍ଚ କରୁଥିବା ବେଳେ ବିଭିନ୍ନ ଦିଗ ଉପରେ ଧ୍ୟାନ ଦେଇ ତଦନ୍ତ କରୁଥିବା ଜଣାପଡିଛି । ଘଟଣାଟି ବିଳାସପୁରର ସିରଗିଟ୍ଟି ଥାନା ଅଞ୍ଚଳରେ ଘଟିଛି । କୋରମୀ ଗାଁର ଏହି ପରିବାର ଆଲକହଲ ଯୁକ୍ତ ହୋମିଓପାଥି ମେଡିସିନ ଖାଇଥିଲେ । ସେମାନେ ହୋମିଓପାଥି ଔଷଧ ଡ୍ରୋସେରା ୩୦ ସେବନ କରିଥିଲେ । ମେଡିସିନ ଖାଇବା ପରେ ସେମାନଙ୍କ ସ୍ୱାସ୍ଥ୍ୟବସ୍ତା ବିଗିଡିଥିଲା । ଏହା ପରେ ଜଣଙ୍କ ପରେ ଜଣେ ୮ ଜଣଙ୍କ ଜୀବନ ଯାଇଥିଲା । ମୃତକଙ୍କ ମଧ୍ୟରେ ୪ ଜଣଙ୍କ ଅନ୍ତିମ ସଂସ୍କାର ରାତିରେ କରିଦିଆଯାଇଥିଲା । ତେଣୁ ମାମଲାକୁ ନେଇ ସନ୍ଦେହ ବଢ଼ିଥିଲା । ଏବେ ଆହୁରି ୫ ଜଣଙ୍କ ଅବସ୍ଥା ସଙ୍କଟାପନ୍ନ ଥିବା ବେଳେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ସେମାନେ ଖାଇଥିବା ମେଡିସିନ ଡ୍ରୋସେରା ୩୦ରେ ୯୧ ପ୍ରତିଶତ ଆଲକହଲ ରହିଛି । ତେବେ ଅଭିଯୁକ୍ତ ନକଲି ଡାକ୍ତର ଫେରାର ହୋଇଯାଇଥିବା ଜଣାପଡିଛି ।
