ନୟାଗଡ଼,(ବାଘୁଆବାର୍ତ୍ତା ବ୍ୟୁରୋ): ଓଡ଼ଗାଁ ବ୍ଲକ୍ ଅନ୍ତର୍ଗତ କୁରାଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର ଅବ୍ୟବସ୍ଥା ଯୋଗୁଁ ଗ୍ରାମବାସୀମାନେ ତାଲା ପକାଇଥିବାର ଜଣାପଡିଛି । ସୂଚନା ଅନୁଯାୟୀ କୁରାଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଦୀର୍ଘ ୫ବର୍ଷ ହେଲା ଡାକ୍ତର ନଥିବା ବେଳେ ଯେଉଁ ଆୟୁଷ ଡାକ୍ତର ଅଛନ୍ତି ସେ ଠିକ୍ ସମୟରେ ଆସୁନାହାନ୍ତି ଯାହାଫଳରେ ଆଖପାଖ ୧୦ଖଣ୍ଡ ଗ୍ରାମର ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଡାକ୍ତରଖାନା ଉପରେ ନିର୍ଭର କରୁଥିବା ଜନସାଧାରଣ ବିଭିନ୍ନ ଦାବି ନେଇ ଆଜି ଡାକ୍ତରଖାନାକୁ ତାଲା ପକାଇଦେଇଥିଲେ । ଉକ୍ତ ଡାକ୍ତରଖାନାରେ ଜଣେ ମାତ୍ର କମ୍ପାଉଣ୍ଡର ଥିବା ବେଳେ ସେ ମଧ୍ୟ ବହୁ ସମୟ ଅନୁପସ୍ଥିତ ରହି ଜନସାଧାରଣଙ୍କୁ ସଠିକ୍ ବ୍ୟବହାର ଦେଖାଉନଥିବା ସାଧାରଣରେ ଅଭିଯୋଗ ଆସିଛି । ଠିକ୍ ସମୟରେ ଡାକ୍ତରଖାନାକୁ ନଆସିବା ଭଳି ଅନେକ ସଙ୍ଗୀନ ଅଭିଯୋଗ ଗ୍ରାମବାସୀଙ୍କ ତରଫରୁ ହୋଇଛି । ଡାକ୍ତରଖାନାରେ ଥିବା ଅନ୍ୟ କର୍ମଚାରୀମାନେ ନିଜ ମନଇଛାରେ ଡାକ୍ତରଖାନା ଖୋଲୁଥିବା ବେଳେ ଜୁରୁରୀକାଳୀନ ପରିସ୍ଥିତି ସମୟରେ ଜନସାଧାରଣ ବିଭିନ୍ନ ଅସୁବିଧାର ସମ୍ମୁଖୀନ ହେଉଛନ୍ତି । ଏସବୁ ସମସ୍ୟାର ପ୍ରତିବାଦ କରି ଗ୍ରାମବାସୀଙ୍କ ତରଫରୁ ଅନିର୍ଦ୍ଦିଷ୍ଟ କାଳ ପାଇଁ ତାଲା ପକାଯାଇଛି ।
