ବିଶ୍ଵ ଐତିହ୍ୟ ପର୍ୟ୍ୟଟନସ୍ଥଳୀ କୋଣାର୍କର ପାରିପାର୍ଶ୍ଵିକ ସୌନ୍ଦର୍ୟ୍ୟକରଣ ପାଇଁ ପୁରୀ ଜିଲ୍ଲାପାଳଙ୍କ ସମୀକ୍ଷା

କୋଣାର୍କ, (ବାଘୁଆବାର୍ତ୍ତା): ପୁରୀ ଜିଲ୍ଲାପାଳଙ୍କ ଦ୍ଵାରା କୋଣାର୍କ ଉନ୍ନୟନ କାର୍ୟ୍ୟ ସମୀକ୍ଷା କରାଯାଇଛି। ବିଶ୍ଵ ଐତିହ୍ୟ ପର୍ୟ୍ୟଟନସ୍ଥଳୀ କୋଣାର୍କର ପାରିପାର୍ଶ୍ଵିକ ସୌନ୍ଦର୍ୟ୍ୟକରଣ ପାଇଁ ଆରମ୍ଭ ହୋଇଥିବା ବିଭିନ୍ନ ଯୋଜନାକୁ ଆଜି ପୁରୀ ଜିଲ୍ଲାପାଳ ସମର୍ଥ ବର୍ମା ସମୀକ୍ଷା କରିଛନ୍ତି । ପ୍ରାଥମିକ ପର୍ୟ୍ୟାୟରେ ସୂର୍ୟ୍ୟ ମନ୍ଦିର ସମ୍ମୁଖରେ ପ୍ରତ୍ନତତ୍ଵ ବିଭାଗ ଜମିରେ ଜବରଦଖଲ କରିଥିବା ହସ୍ତଶିଳ୍ପ ବ୍ୟବସାୟୀ ମାନଙ୍କୁ ଚିହ୍ନଟ ହୋଇଥିବା ସାଢେ ତିନି ଏକର ଜମିରେ ଆସ୍ଥାୟୀ ଭାବେ ଥଇଥାନ ପାଇଁ ଓ ବି ସି ସି ଦ୍ଵାରା ଆରମ୍ଭ ହୋଇଥିବା କାର୍ୟ୍ୟକୁ ଜିଲ୍ଲାପାଳ ବୁଲି ଦେଖିଛନ୍ତି। ଏହି କାର୍ୟ୍ୟକୁ ଅଗଷ୍ଟ ୫ ତାରିଖ ମଧ୍ୟରେ ଶେଷ କରିବାକୁ ନିର୍ଦେଶ ଦେଇଥିଲେ ଜିଲ୍ଲାପାଳ। ଏଥିସହ ଥଇଥାନ ସମ୍ପର୍କରେ ଜିଲ୍ଲାପାଳ ଉଠାଦୋକାନି ମାନଙ୍କ ସହ ଆଲୋଚନା କରିଥିଲେ । ପରେ ଚନ୍ଦ୍ରଭାଗା ଠାରୁ କୋଣାର୍କ ଓ ସୂର୍ୟ୍ୟ ମନ୍ଦିର ଚତୁଃପାର୍ଶ୍ୱରେ ୪ କିଲୋମିଟର ୫୦୦ ମିଟର ଲମ୍ବରେ ୩୬କୋଟି ଟଙ୍କା ବ୍ୟୟରେ ନିର୍ମାଣଧୀନ ୬ଲେନ ରୋଡ ଓ ସୂର୍ୟ୍ୟମନ୍ଦିର ପଛ ଦେଇ ୧୪୭୦ମିଟର ଲମ୍ବ ପ୍ରସ୍ତାବିତ ୨ଲେନ ବିଶିଷ୍ଟ ରିଙ୍ଗ ରୋଡ କାର୍ୟ୍ୟ , କୋଣାର୍କ କାକଟପୁର ରାସ୍ତାରେ ନିର୍ମାଣଧୀନ ସ୍ମାର୍ଟ ପାର୍କ କାର୍ୟ୍ୟର ସମୀକ୍ଷା କରିଥିଲେ ଜିଲ୍ଲାପାଳ। ଚନ୍ଦ୍ରଭାଗା ବେଳାମାର୍ଗ , ବାଙ୍ଗର ମଉଜାରେ ଥିବା ସରକାରୀ ଜମି ସମ୍ପର୍କରେ ସ୍ଥାନୀୟ ରାଜସ୍ୱ ବିଭାଗ କର୍ମଚାରୀଙ୍କ ଠାରୁ ତଥ୍ୟ ନେଇଥିଲେ । ଅସ୍ଥାୟୀ ଦୋକାନୀଙ୍କ ଥଇଥାନ ପରେ ସୂର୍ୟ୍ୟମନ୍ଦିର ସମ୍ମୁଖରେ ୩୨ଏକର ଜମିରେ ଓ ବି ସି ସି ଦ୍ଵାରା ସୌନ୍ଦର୍ୟ୍ୟକରଣ କାର୍ୟ୍ୟର ଆରମ୍ଭ ହେବ ବୋଲି ଜିଲ୍ଲାପାଳ କହିଥିଲେ ।