ଓଡ଼ଗାଁ,(ବାଘୁଆବାର୍ତ୍ତା): ଗରିବ ଅସହାୟଙ୍କ ପାଇଁ ସରକାର ବିଭିନ୍ନ ଯୋଜନା କରୁଛନ୍ତି । ଯୋଜନାର ସଫଳ ରୂପାୟନ ପାଇଁ କୋଟି କୋଟି ଅର୍ଥ ବ୍ୟୟ ବରାଦ ହେଉଛି । ହେଲେ ଉପଯୁକ୍ତ ହିତାଧିକାରୀଙ୍କୁ ମିଳୁନି ସହାୟତା । ଏଭଳି ଚିତ୍ର ଦେଖିବାକୁ ମିଳିଛି ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ରବିଗାଡ଼ିଆ ଗ୍ରାମପଂଚାୟତ ଅନ୍ତର୍ଗତ ଜାମୁପାଟଣା ଗ୍ରାମରେ । ରାଜନ ନାୟକ, ବୟସ ୨୫। ପିଲାଟି ଦିନରୁ ବାପା ମା ଛେଉଣ୍ଡ ।ଦୀର୍ଘ ୫ବର୍ଷରୁ ଉର୍ଦ୍ଧ୍ବ ସମୟଧରି କିଡନୀ ରୋଗରେ ଆକ୍ରାନ୍ତ ହୋଇଥିବାରୁ ସମ୍ପୁର୍ଣ୍ଣ ଅଚଳ ହୋଇପଡିଛନ୍ତି ରାଜନ । ନିଜ ଜୀବନ ବଞ୍ଚାଇବା ପାଇଁ ସଂଗ୍ରାମ କରୁଛନ୍ତି । ସାନ ଭାଇର ସ୍ୱଳ୍ପ ରୋଜଗାରରେ ବଡ଼ କଷ୍ଟରେ ପରିବାରର ୫ ଜଣଙ୍କର ପରିବାର ପ୍ରତିପୋଷଣ ହୁଏ । ମୁଣ୍ଡ ଗୁଞ୍ଜିବାକୁ ଦୁଇ ବଖରା ଚାଳ ଘର ବ୍ୟତୀତ ଜମି ଗୁଣ୍ଠେ ନାହିଁ । ଚିକିତ୍ସା ପାଇଁ ଆବଶ୍ୟକ ଅର୍ଥ ଯୋଗାଡ଼ ହୋଇପାରୁନଥିବାରୁ ଦିନକୁ ଦିନ ରାଜନଙ୍କ ସ୍ୱାସ୍ଥ୍ୟବସ୍ଥା ବିଗିଡିବାରେ ଲାଗିଅଛି । ପରିବାର ଲୋକେ ସରକାରୀ ତଥା ବେସରକାରୀ ସହାୟତାକୁ ଚାହିଁ ରହିଥିବାବେଳେ ବର୍ତ୍ତମାନ ପର୍ଯ୍ୟନ୍ତ କୌଣସି ବି ସରକାରୀ ସୁବିଧା ତାଙ୍କ ପାଖରେ ପହଂଚିପାରିନାହିଁ । ଏଭଳି ସ୍ଥିତିରେ ନିଜର ଚିକିତ୍ସା ନିମନ୍ତେ ରାଜନ ଆର୍ଥିକ ସହାୟତା ନିମନ୍ତେ ଆକୁଳ ନିବେଦନ କରିଛନ୍ତି ।
