ଖୋର୍ଦ୍ଧା, (ବାଘୁଆବାର୍ତ୍ତା): ଉପରେ ନୀଳ ଆକାଶ, ମଝିରେ ପହାଡ଼ ତାହା ବି ଅଧାକଟା । ଆଉ ତଳକୁ ରହିଛି ନୀଳ ରଙ୍ଗର ଜଳରାଶିରେ ଭର୍ତି ଜଳାଶୟ । ପାହାଡ଼କୁ ଭେଦି ସୂର୍ଯ୍ୟଙ୍କ ତୀର୍ଯ୍ୟକ କିରଣ ଛୁଇଁଯାଉଛି । ଚତୁଃପାଶ୍ୱର୍ରେ ଘେରି ରହିଛି, କାଶତଣ୍ଡୀ ଫୁଲର ସମ୍ଭାର । ସକାଳର ସୁଲୁସୁଲିଆ ପବନ ଆଉ ଅପରାହ୍ନରେ ସେଇ ପାହାଡ଼ ଉହାଡ଼ରେ ସୂର୍ଯ୍ୟ ଦେବତାଙ୍କ ଅସ୍ତବେଳର ରକ୍ତିମ ଦୃଶ୍ୟ ଏଠାକୁ ଆସୁଥିବା ଦର୍ଶକଙ୍କୁ ବେଶ ମନ୍ତ୍ରମୁଗ୍ଧ କରିଥାଏ । ତେବେ ଏ ଦୃଶ୍ୟ କୌଣସି ପର୍ଯ୍ୟଟନସ୍ଥଳୀର ନୁହେଁ । ବରଂ ଖୋର୍ଦ୍ଧା ବ୍ଲକ୍ ଅନ୍ତର୍ଗତ ନିଜିଗଡ଼ ତାପଙ୍ଗ ମୌଜାରେ ରହିଥିବା ଅଘୋଷିତ ପର୍ଯ୍ୟଟନସ୍ଥଳୀ ଅଧାକଟା ଗ୍ରାନାଇଟ ପାହାଡ଼ର ଦୃଶ୍ୟ । ଯାହାକି ରାଣୀକ୍ଷେତ ଓ ନୈନିତାଲର ଆଶିଂକ ଭ୍ରମ ସୃଷ୍ଟି କରିଥାଏ । ତେବେ ଏହା କୌଣସି ପର୍ଯ୍ୟଟନସ୍ଥଳୀ ନହୋଇଥିଲେ ବି ଏଠାକାର ମନୋରମ ଦୃଶ୍ୟ ଏହି ସ୍ଥାନକୁ ଲୋକମାନଙ୍କୁ ଆକର୍ଷିତ କରିଥାଏ । ଯାହାଫଳରେ ଏଠାକୁ ଯୁବବର୍ଗ ଏବଂ ବହୁ ଲୋକ ସେମାନଙ୍କ ପରିବାରକୁ ଧରି ଆସି ପ୍ରକୃତିର ସୌନ୍ଦର୍ଯ୍ୟକୁ ଉପଭୋଗ କରୁଥିବା ଦେଖାଯାଇଛି ।ଏପରିକି ଏଠାରେ ବହୁ ଆଲବମ ସୁଟିଂ ମଧ୍ୟ ଚାଲିଛି । ତେବେ ପବନର ତାଳେ ତାଳେ କାଶତଣ୍ଡି ଫୁଲ ର ନୃତ୍ୟକୁ ଉପଭୋଗ କରି ଯୁବବର୍ଗ ସେଲଫି ନେବାର ଦୃଶ୍ୟ ଅତି ମନୋରମ ଦେଖାଯାଉଛି ।
