ନୟାଗଡ, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଖଣ୍ଡପଡ଼ା ଠାରେ ବିଦ୍ୟୁତ ଗ୍ରୀଡ ପ୍ରକଳ୍ପ ପ୍ରତିଷ୍ଠାରେ ପ୍ରଶାସନିକ ସ୍ଥାଣୁତାକୁ ନେଇ ଅଂଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ତେଣୁ ପ୍ରସ୍ତାବିତ ସ୍ଥାନରେ ତୁରନ୍ତ ଉକ୍ତ ପ୍ରକଳ୍ପ କାର୍ଯ୍ୟ ଆରମ୍ଭ କରିବାକୁ ଅଂଚଳବାସୀ ଦାବି କରିବା ସହ ଏ ସଂପର୍କୀତ ଦାବିପତ୍ର ଖଣ୍ଡପଡ଼ା ତହସିଲଦାରଙ୍କ ଜରିଆରେ ନୟାଗଡ ଜିଲ୍ଲାପାଳଙ୍କୁ ପ୍ରଦାନ କରିଥିବା ଜଣାଯାଇଛି । ଖଣ୍ଡପଡ଼ା ବ୍ଳକ ଅଧ୍ୟକ୍ଷ ମନୋଜ କୁମାର ପ୍ରଧାନ, ଖଣ୍ଡପଡା ଓ ଭାପୁର ବ୍ଳକ ଅଧିନ ବିଭିନ୍ନ ପଂଚାୟତର ଲୋକପ୍ରତିନିଧି, ବରିଷ୍ଠ ନାଗରିକ ମଂଚର ସଦସ୍ୟ ଓ ଗଣମାଧ୍ୟମର ପ୍ରତିନିଧିମାନେ ଗୁରୁବାର ଦିନ ତହସିଲ କାର୍ଯ୍ୟାଳୟରେ ଖଣ୍ଡପଡ଼ା ତହସିଲଦାର ପାର୍ଥସାରଥୀ ହାସଁଦାଙ୍କୁ ଭେଟି ଦାବିପତ୍ର ପ୍ରଦାନ କରିଥିଲେ । ପ୍ରକାଶଥାଉକି ୨୦୧୭ ମସିହାରେ ଖଣ୍ଡପଡ଼ା ଠାରେ ଏକ ବିଦ୍ୟୁତ ଗ୍ରୀଡ୍ ପ୍ରକଳ୍ପ ପ୍ରତିଷ୍ଠା ନିମନ୍ତେ ରାଜ୍ୟସରକାର ୫୪ କୋଟି ଟଙ୍କା ଅନୁଦାନ ଅର୍ଥ ମଞ୍ଜୁର କରିଥିଲେ । ଉକ୍ତ ପ୍ରକଳ୍ପ ପ୍ରତିଷ୍ଠା ନିମନ୍ତେ ଖଣ୍ଡପଡା ସହର ଉପକଣ୍ଠରେ କଇଁଥପଲ୍ଲୀ ଗ୍ରାମ ନିକଟରେ ୧୫ ଏକରରୁ ଉର୍ଦ୍ଧ ସରକାରୀ ଜାଗା ଚିହ୍ନଟ କରାଯାଇଥିଲା । ପରବର୍ତୀ ସମୟରେ ତହସିଲ ପ୍ରଶାସନ ପକ୍ଷରୁ ଏସଂପର୍କୀତ ରିପୋର୍ଟ ଜିଲ୍ଲା ପ୍ରଶାସନକୁ ପ୍ରଦାନ କରାଯାଇଥିଲା । ମାତ୍ର ପ୍ରଶାସନିକ ଉଦାସୀନତା ଯୋଗୁଁ ପ୍ରକଳ୍ପ ପ୍ରତିଷ୍ଠା ନିମନ୍ତେ ପ୍ରସ୍ତାବିତ ସ୍ଥାନଟିକୁ ଅଦ୍ୟାବଧି ତହସିଲ କର୍ତୃପକ୍ଷ ବିଭାଗୀୟ କର୍ତୃପକ୍ଷଙ୍କୁ ହସ୍ତାନ୍ତର କରିପାରୁନଥିବାରୁ ବିଦ୍ୟୁତ ଗ୍ରୀଡ ପ୍ରକଳ୍ପ ପ୍ରତିଷ୍ଠାରେ ଅଯଥା ବିଳମ୍ବ ହେଉଥିବା ଜଣାପଡିଛି । ଖଣ୍ଡପଡା, ଭାପୁର ଓ ଗଣିଆ ବ୍ଳକ ଅଂଚଳବାସୀଙ୍କ ବୃହତର ସ୍ୱାର୍ଥକୁ ଦୃଷ୍ଟିରେ ରଖି ପ୍ରସ୍ତାବିତ ସ୍ଥାନରେ ବିଦ୍ୟୁତ ଗ୍ରୀଡ ପ୍ରତିଷ୍ଠା ନିମନ୍ତେ ପ୍ରଶାସନ ଦୃଷ୍ଟି ନଦେଲେ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ଅଂଚଳବାସୀ ଚେତାବନୀ ଦେଇଛନ୍ତି ।
