କପିଳାଶ ପୀଠରେ ଭକ୍ତ ଓ ଶ୍ରଦ୍ଧାଳୁଙ୍କ ଭିଡ

ଢେଙ୍କାନାଳ, (ବାଘୁଆବାର୍ତ୍ତା): ଆଜି ପବିତ୍ର ମହାଶିବରାତ୍ରି । ଶୈବ ପୀଠ ମାନଙ୍କରେ ଦେବ ଦେବ ମହାଦେବଙ୍କର ପାଳିତ ହେଉଛି ଜାଗର ଯାତ୍ରା । ଏହି ଅବସରରେ ରାଜ୍ୟର ପ୍ରମୁଖ ଶୈବ ପୀଠ ଢେଙ୍କାନାଳର କପିଳାଶକୁ ରାଜ୍ୟ ବ୍ୟାପୀ ଭକ୍ତ ଓ ଶ୍ରଦ୍ଧାଳୁଙ୍କ ସୁଅ ଛୁଟୁଛି । ପୀଠର ଅଧୀଶ୍ଵର ପ୍ରଭୁ ଚନ୍ଦ୍ର ଶେଖରଙ୍କ ଦର୍ଶନ କରିବା ସାଙ୍ଗକୁ ଦୀପ ଟିଏ ଜାଳି ନିଜର ମାନସିକ ପୂରଣ ପାଇଁ ବ୍ୟାକୁଳ ହୋଇଉଠିଛନ୍ତି ଶ୍ରଢାଳୁ । ଫଳରେ ସକାଳୁ ସକାଳୁ ଉଭୟ ବାରବାଙ୍କ ଓ ପାହାଚ ରାସ୍ତାରେ ଶ୍ରଦ୍ଧାଳୁଙ୍କ ଲମ୍ବା ଧାଡି ଲାଗିଥିବା ଦେଖିବାକୁ ମିଳିଛି । କପିଳାଶ ପାଦ ଦେଶ ଦେଓଗାଁ ଠାରୁ ମୁଖ୍ୟ ମନ୍ଦିର ଯାଏଁ ଭକ୍ତ ଓ ଶ୍ରଢାଳୁଙ୍କ ଗହଣରେ ଲୋକରଣ୍ୟ ହୋଇ ଉଠିଛି କପିଳାଶ । ହର ହର ମହାଦେବ ଓ ଜୟ ଶିବ ଶମ୍ଭୁ ଧ୍ୱନୀରେ କମ୍ପି ଉଠୁଛି ପୀଠ । ଶ୍ରଦ୍ଧାଳୁ ମାନଙ୍କର ଶୃଙ୍ଖଳିତ ଦର୍ଶନ ପାଇଁ ସ୍ୱତନ୍ତ୍ର ବାରିକେଟ୍ ବ୍ୟବସ୍ଥା କରାଯାଇଛି । ଏପରିକି ଶାନ୍ତି ଶ୍ରୁଖଳା ପାଇଁ ୧୫ପ୍ଲାଟୁନ ପୁଲିସ ଫୋର୍ସ ମୃତୟନ କରି ପୁଲିସ ପଦାଧିକାରୀ ମାନେ ନିଜେ ଭିଡ଼ ପରିଚାଳନା କରୁଥିବା ପରିଲକ୍ଷିତ ହୋଇଛି । କହିବାକୁ ଗଲେ ବିଗତ ଦୁଇ ବର୍ଷ କୋଭିଡ କଟକଣା ପରେ ଚଳିତ ବର୍ଷ କୋଭିଡ କଟକଣା ନଥିବାରୁ ସକାଳୁ ସକାଳୁ ପରିଲକ୍ଷିତ ହେଉଥିବା ଭିଡ଼ ଚଳିତ ବର୍ଷ ଯଥେଷ୍ଠ ଅଧିକ ଭିଡ଼ ହେବ ବୋଲି ଆଶଙ୍କା କରାଯାଇଛି । ସେପଟେ ଜାଗର ଯାତ୍ରା ଉପଲକ୍ଷେ ଏହି ପୀଠର ପରମ୍ପରା ମୁତାବକ ଆଜି ପ୍ରାତଃ ସମୟରୁ ସ୍ୱତନ୍ତ୍ର ନିତି ରୀତିରେ ଚିତାପତ୍ରି ସେବାୟତ ମାନେ ପ୍ରଭୁ ଚନ୍ଦ୍ରଶେଖରଙ୍କ ନୀତିକାନ୍ତି ଆରମ୍ଭ କରିଛନ୍ତି । ସ୍ୱତନ୍ତ୍ର ସେବାୟତ ଓ ରାଜପରିବାର ପକ୍ଷରୁ ଚାରି ପ୍ରହର ଚାରି ପୂଜା ଲେଖାଏଁ ଷୋଳ ପୂଜାସାଙ୍ଗକୁ ଷୋଡ଼ଶ ଉପଚାରରେ ପ୍ରଭୁଙ୍କର ପୂଜାର୍ଚନା କରାଯିବ। ଏହି ଅବସରରେ ସନ୍ଧ୍ୟା ପରେ ପୀଠରେ ମାତା ପର୍ବତୀଙ୍କର ରାଜ ରାଜେଶ୍ୱରୀ ବେଶ, ପ୍ରଭୁଙ୍କର ନାଗାଭରଣ ବେଶ ,ଯୋଗିରାଜ ବେଶ ଓ ହରିହର ଭେଟ ଆଦି କରାଯିବ। ତେବେ ଏହି ଦୁଲ୍ଲଭ ଦର୍ଶନ ପାଇଁ ଭକ୍ତ ଓ ଶ୍ରଢାଳୁଙ୍କ ଭିଡ଼ ଲାଗିରହିବ । ଅପରପକ୍ଷରେ ଭକ୍ତ ଓ ଶ୍ରଢାଳୁଙ୍କ ମୁଖ୍ୟ ଆକର୍ଷଣ ମହାଦୀପ ଭୋର ୩ଟା ୫୫ମିନିଟ ରେ ପାଳିଆ ସେବକ ମାନଙ୍କ ଦ୍ୱାରା ମନ୍ଦିର ବେଢ଼ା ପରିକ୍ରମା କରାଯାଇ ମନ୍ଦିର ଚୁଡାକୁ ଉଠାଯିବ ବୋଲି ସୂଚନା ଦେଇଛନ୍ତି ପୀଠର ସେବାୟତ।